தேர்தல் பிரசாரங்கள் ரத்து! - லதா மங்கேஷ்கருக்கு இறுதி அஞ்சலி செலுத்த மும்பை விரையும் பிரதமர் மோடி

By Logi

Updated: Monday, February 7, 2022, 0:27 [IST]

Subscribe to Oneindia Tamil

டெல்லி: பிரதமர் மோடி தன்னுடைய தேர்தல் பிரசாரங்களை ரத்து செய்துவிட்டு, பாடகி லதா மங்கேஷ்கருக்கு இறுதி அஞ்சலி செலுத்த இன்று மும்பை செல்கிறார்.

பிரதமர் மோடி

பிரதமர் மோடி தமது ட்விட்டர் பதிவில், லதா மங்கேஷ்கர் திரைத்துறைக்கு அப்பால் தேசத்தின் மீதும் பற்று கொண்டிருந்தார். வலிமையான பாரதத்தை காண விரும்பியவர் லதா திதி. அவரிடமிருந்து ஏராளமான அன்பைப் பெற்றிருக்கிறேன். அடுத்தடுத்த தலைமுறைகளால் எப்போதும் நினைவு கொள்ளத்தக்கவராக லதா மங்கேஷ்கர் திகழ்வார். யாராலும் நிரப்பவே முடியாத வெற்றிடத்தை விட்டுச் சென்றுள்ளார் லதா மங்கேஷ்கர் என பதிவிட்டுள்ளார்.

பிரசாரம் தள்ளிவைப்பு

லதா மங்கேஷ்கர் மறைவை முன்னிட்டு மத்திய அரசு 2 நாள் துக்க தினமாக கடைபிடிக்கப்படும்; தேசியக் கொடி அரைக்கம்பத்தில் பறக்கவிடப்படும் என அறிவிக்கப்பட்டுள்ளது. இந்நிலையில், உத்தரப்பிரதேச மாநில சட்டசபை தேர்தலை முன்னிட்டு இன்று நடைபெற இருந்த பாஜக தேர்தல் அறிக்கை நிகழ்ச்சி ஒத்திவைக்கப்பட்டுள்ளது.

பாஜக‌

உத்தரப்பிரதேச பாஜக அலுவலகத்தில் உள்துறை அமைச்சர் அமித்ஷா, முதல்வர் யோகி ஆதித்யநாத் மற்றும் அமைச்சர்கள், லதா மங்கேஷ்கர் ஆன்மா சாந்தியடைய இரண்டு நிமிடம் மெளன அஞ்சலி செலுத்தினார்கள். உத்தரப்பிரதேசம் மற்றும் கோவா தேர்தலுக்கான இன்று அங்கு நடைபெறவிருந்த அனைத்து தேர்தல் பிரசாரங்களும் கூட்டங்களும் தள்ளிவைக்கப்பட்டிருக்கின்றன. உத்தரப்பிரதேசத்தில் உள்துறை அமைச்சர் அமித்ஷா கலந்துகொள்ளவிருந்த அனைத்து நிகழ்ச்சிகளும் ரத்து செய்யப்பட்டிருக்கின்றன.

பிரதமர் பயணம்

கோவா சட்டசபைத் தேர்தலுக்காக காணொலி மூலம் பிரசாரம் செய்ய ஏற்பாடு செய்யப்பட்டிருந்தது. அந்த நிகழ்ச்சி லதா மங்கேஷ்கர் மறைவையடுத்து ரத்து செய்யப்பட்டிருக்கிறது. கோவா மாநிலத்தின் பாஜக தேர்தல் அறிக்கை வெளியிடுவதையும் தள்ளிவைத்துள்ளனர். இதையடுத்து, மும்பையில் இன்று மாலை நடைபெறவுள்ள லதா மங்கேஷ்வர் இறுதி ஊர்வலத்தில் பிரதமர் மோடி பங்கேற்கவுள்ளார்.