டெல்லி தேர்தல்- முதல் கட்ட வேட்பாளர் பட்டியலை வெளியிட்டது பாஜக! கெஜ்ரிவாலுக்கு எதிராக பர்வேஷ் வர்மா!
டெல்லி: டெல்லி யூனியன் பிரதேச சட்டசபை தேர்தலுக்கான முதல் கட்ட வேட்பாளர் பட்டியலை பாஜக வெளியிட்டுள்ளது. புதுடெல்லி சட்டசபை தொகுதியில் ஆம் ஆத்மி கட்சியின் தலைவரான முன்னாள் முதல்வர் அரவிந்த் கெஜிர்வாலுக்கு எதிராக பர்வேஷ் வர்மா வேட்பாளராக அறிவிக்கப்பட்டுள்ளார். 2013-ம் ஆண்டு முதல் அரவிந்த் கெஜ்ரிவால் தொடர்ந்து 3 முறை வெற்றி பெற்ற தொகுதி புதுடெல்லி.
டெல்லி யூனியன் பிரதேச சட்டசபை தேர்தல் விரைவில் நடைபெற உள்ளது. 70 சட்டசபை தொகுதிகளைக் கொண்ட டெல்லியை தக்க வைக்க ஆம் ஆத்மி கட்சி தீவிரம் காட்டுகிறது. தலைநகர் டெல்லியில் ஆட்சியைக் கைப்பற்றுவதை கவுரவமாக கருதுகிறது பாஜக. இதனால்தான் டெல்லியில் பிரதமர் நரேந்திர மோடி தேர்தல் பிரசாரத்தை தொடங்கினார். டெல்லியை பிடித்திருக்கும் பேரழிவு சக்திதான் ஆம் ஆத்மி அரசு எனவும் கடுமையாக விமர்சித்தார் மோடி. மேலும் டெல்லி யூனியன் அரசு நிர்வாகத்தில் அனைத்து துறைகளிலும் ஊழல் மலிந்துவிட்டதாகவும் பிரதமர் மோடி குற்றம்சாட்டினார்.
இந்த நிலையில் இன்று டெல்லி யூனியன் பிரதேச சட்டசபைக்கான முதல் கட்ட வேட்பாளர் பட்டியலை பாஜக வெளியிட்டது. மொத்தம் 29 வேட்பாளர்கள், இந்த முதல் கட்ட பட்டியலில் இடம் பெற்றுள்ளனர்.
டெல்லி முன்னாள் முதல்வரும் ஆம் ஆத்மி தலைவருமான அரவிந்த் கெஜ்ரிவாலை எதிர்த்து பர்வேஷ் வர்மா, புதுடெல்லி தொகுதியில் போட்டியிடுகிறார். கல்காஜி தொகுதியில் முதல்வர் அதிஷியை எதிர்த்து முன்னாள் எம்பி ரமேஷ் பிதூரி களமிறக்கப்பட்டுள்ளார்.
ஆம் ஆத்மியில் இருந்து விலகி பாஜகவில் இணைந்த கைலாஷ் கெலாட், பிஜ்வாசன் தொகுதியில் போட்டியிடுகிறார்.
புதுடெல்லி தொகுதி
அரவிந்த் கெஜ்ரிவால் 4-வது முறையாக போட்டியிடும் புதுடெல்லி சட்டசபை தொகுதி விஐபி தொகுதியாகவே இருந்து வருகிறது. 1993-ம் ஆண்டு பாஜகவின் கீர்த்தி ஆசாத் இத்தொகுதியில் வென்றார். அவரைத் தொடர்ந்து காங்கிரஸ் மூத்த தலைவரும் முன்னாள் முதல்வருமான ஷீலா தீட்சித், 1998.2003 -ல் வென்றார். 2008-ல் தொகுதி மறுசீரமைப்புக்குப் பின்னர் புதுடெல்லி தொகுதி என பெயர் மாற்றப்பட்டது. அதுவரை கோலே மார்க்கெட் தொகுதியாக இருந்தது. 2008 சட்டசபை தேர்தலில் ஷீலா தீட்சித் வென்றார்.
ஆனால் 2013-ம் ஆண்டு முதல் தொடர்ந்து 3 முறை ஆம் ஆத்மியின் தலைவரான முன்னாள் முதல்வர் அரவிந்த் கெஜ்ரிவால் போட்டியிட்டு வென்றுள்ளார்.
தற்போதைய தேர்தலில் புதுடெல்லி தொகுதியில் அரவிந்த் கெஜ்ரிவாலை எதிர்த்து ஷீலா தீட்சித் மகன் சந்தீப் தீட்சித், பாஜகவின் பர்வேஷ் சாஹிப் சிங் வர்மா களம் காண்கின்றனர்.
Click it and Unblock the Notifications
Sign in with Google