27ஆண்டுகளுக்கு பின் டெல்லியில் பாஜக ஆட்சி-அமெரிக்காவில் இருந்து மோடி திரும்பிய பின் பதவியேற்பு விழா?
டெல்லி: நாட்டின் தலைநகரான டெல்லியில் 27 ஆண்டுகளுக்குப் பின்னர் பாஜக ஆட்சியைக் கைப்பற்றி உள்ளது. டெல்லியில் பெரும்பான்மைக்கும் அதிகமான இடங்களைப் பெற்றுள்ள பாஜக புதிய முதல்வரை தேர்வு செய்வது மற்றும் பதவியேற்பு விழாவை எப்போது நடத்துவது என்பது தொடர்பாக தீவிர ஆலோசனைகளை நடத்தி வருகிறது. பிரதமர் நரேந்திர மோடியின் அமெரிக்கா பயணம் முடிந்த பின்னரே டெல்லியின் புதிய முதல்வர் பதவியேற்பு விழா நடைபெற வாய்ப்புள்ளதாக பாஜக வட்டாரங்கள் தெரிவிக்கின்றன.
டெல்லி யூனியன் பிரதேச சட்டசபை தேர்தலில் மொத்தம் உள்ள 70 இடங்களில் பாஜக 48 இடங்களைக் கைப்பற்றியது. டெல்லியில் ஆட்சி அமைப்பதற்கு தேவையான பெரும்பான்மை இடங்கள் 36. டெல்லி தேர்தலில் ஆம் ஆத்மி கட்சி 22 இடங்களை மட்டுமே பெற்றது. ஆம் ஆத்மியின் தலைவர்கள் அரவிந்த் கெஜ்ரிவால், மணீஷ் சிசோடியா, சோம்நாத் பார்தி உள்ளிட்ட பலரும் அதிர்ச்சி தோல்வி அடைந்தனர்.
டெல்லியில் 27 ஆண்டுகளுக்குப் பின்னர் பாஜகவின் ஆட்சி அமைகிறது. டெல்லியின் புதிய முதல்வர் யார்? என்பது குறித்து பாஜகவில் தீவிர ஆலோசனை நடைபெற்று வருகிறது. பாஜக முன்னாள் முதல்வர் சாஹிப் சிங் வர்மாவின் மகனும் புதுடெல்லி தொகுதியில் அரவிந்த் கெஜ்ரிவாலை தோற்கடித்தவருமான பர்வேஷ் சாஹிப் சிங் வர்மா, டெல்லியின் புதிய முதல்வராக தேர்ந்தெடுக்கப்பட அதிக வாய்ப்புகள் இருப்பதாகவும் கூறப்படுகிறது.
இந்த நிலையில் டெல்லியில் புதிய முதல்வர் மற்றும் முதல்வர் பதவியேற்பு விழாவை எப்போது நடத்துவது என்பது தொடர்பாக பாஜக தலைவர்கள் தீவிர ஆலோசனை நடத்தி வருகின்றனர். பிரதமர் நரேந்திர மோடி அமெரிக்கா பயணத்தை பிப்ரவரி 13-ந் தேதி நிறைவு செய்கிறார். இதன் பின்னரே பிரம்மாண்டமாக டெல்லியில் பாஜகவின் புதிய முதல்வர் பதவியேற்பு விழா நடைபெறக் கூடும் என்கின்றன அக்கட்சி வட்டாரங்கள்.
டெல்லி பாஜக முதல்வர் பட்டியலில் முன்னாள் மத்திய அமைச்சர் ஸ்மிருதி இரானி, பாஜக எம்பி பன்சூரி ஸ்வராஜ் (சுஷ்மா ஸ்வராஜ் மகள்) உள்ளிட்ட பலரது பெயர்கள் அடிபடுகின்றன என்பதும் குறிப்பிடத்தக்கது.
அதிஷி ராஜினாமா
இதனிடையே டெல்லியில் இன்று துணை நிலை ஆளுநரை நேரில் சந்தித்த முதல்வர் அதிஷி, தமது பதவியை ராஜினாமா செய்யும் கடிதத்தை கொடுத்தார். புதிய ஆட்சி அமையும் வரை இடைக்கால முதல்வராக அதிஷி தொடர ஆளுநர் கேட்டுக் கொண்டார்.
Click it and Unblock the Notifications
Sign in with Google