பாதுகாப்பு துறைக்கான பட்ஜெட்.. இந்திய விமானப் படைக்கு அதிக நிதி ஒதுக்கீடு!

டெல்லி: பாதுகாப்புத் துறைக்கான பட்ஜெட்டில் இந்திய விமானப் படைக்கு ரூ 5 ஆயிரம் கோடி நிதி ஒதுக்கப்பட்டுள்ளதாக மத்திய நிதியமைச்சர் நிர்மலா சீதாராமன் தெரிவித்தார். முப்படைகளில் இந்திய விமான படைக்குத்தான் அதிக நிதி.

2022-2023 ஆம் நிதியாண்டுக்கான மத்திய பட்ஜெட்டை நாடாளுமன்றத்தில் தாக்கல் செய்தார். 4ஆவது முறையாக அமைச்சர் நிர்மலா சீதாராமன் தாக்கல் செய்யும் பட்ஜெட், இரண்டாவது ஆண்டாக காகிதமில்லா பட்ஜெட்டாக தாக்கல் செய்யப்பட்டது.

பட்ஜெட் உரையில் மத்திய அமைச்சர் நிர்மலா சீதாராமன் பேசுகையில், இந்திய கடற்படையை நவீனமயமாக்க 43 சதவீதம் நிதி ஒதுக்கீடு செய்யப்பட்டுள்ளது.

விமான படைக்கு எவ்வளவு

அது போல் இந்திய விமான படைக்கு ரூ 56,851 கோடி ஒதுக்கீடு செய்யப்பட்டுள்ளது. இது கடந்த நிதியாண்டை ஒப்பிடும் போது 4.5 சதவீதம் அதிகமாகும். ஆனால் இந்திய ராணுவத்திற்கு ரூ 32,102 கோடி நிதி ஒதுக்கீடு செய்யப்பட்டுள்ளது. இது கடந்த ஆண்டை காட்டிலும் குறைவாகும். கடந்த நிதியாண்டில் ரூ 36,481.90 கோடி ஒதுக்கப்பட்டது. இந்திய கடற்படைக்கு ரூ 47,590 கோடி நிதி ஒதுக்கீடு செய்யப்பட்டுள்ளது. இது கடந்த ஆண்டை விட 43 சதவீதம் அதிகம். கடந்த ஆண்டு ரூ 33,253 கோடி நிதி ஒதுக்கீடு செய்யப்பட்டது.

5.25 லட்சம் கோடி

ஒட்டுமொத்தமாக பாதுகாப்புத் துறைக்கென பட்ஜெட் நிதி ரூ 5.25 லட்சம் கோடியாக அதிகரித்துள்ளது. இது கடந்த நிதியாண்டில் ரூ 4.78 லட்சம் கோடியாக இருந்த பட்ஜெட் நிதியை விட ரூ 46,970 கோடி அதிகமாகும். அதாவது 9.82 சதவீதம் அதிகம். இதில் ஆயுத படைகளுக்கான ஓய்வூதிய தொகை ரூ 1.19 லட்சம் கோடியும் அடங்கும். இந்த தொகை கடந்த ஆண்டை விட 3 சதவீதம் அதிகரித்துள்ளது.

12 சதவீதம் அதிகம்

இந்த ரூ 5.25 லட்சத்தில் புதிய ஆயுதங்கள், போர் விமானங்கள், போர் கப்பல்கள், இதர ராணுவ தளவாடங்கள் வாங்க 1.52 லட்சம் கோடி ஒதுக்கப்பட்டுள்ளது. இது கடந்த ஆண்டை விட 12 சதவீதம் அதிகமாகும். கடந்த நிதியாண்டில் 1.35 லட்சம் கோடி ஒதுக்கீடு செய்யப்பட்டிருந்தது. ஊழியர்களின் ஊதியம், பராமரிப்பு உள்ளிட்டவைகளுக்காக 2.33 லட்சம் கோடி ஒதுக்கீடு செய்யப்பட்டுள்ளது. நாட்டின் ராணுவம் உள்ளிட்ட பாதுகாப்புத்துறைகளின் ஆராய்ச்சிக்கு கூடுதல் நிதி ஒதுக்கீடு செய்யப்படும். ராணுவத்திற்கான பட்ஜெட் மதிப்பில் 25% நிதி பாதுகாப்புத் துறை ஆராய்ச்சிக்காக ஒதுக்கீடு செய்யப்படும்.

மேம்பாட்டு பிரிவு

ராணுவ ஆராய்ச்சி மற்றும் மேம்பாட்டு பிரிவில் ஸ்டார்ட் அப் நிறுவனங்கள் தொடங்க அனுமதி வழங்கப்படுகிறது. உள்நாட்டு உற்பத்தியை அதிகரிக்கும் வகையில் 68% ராணுவ தளவாடங்களை இந்தியாவில் உற்பத்தி செய்ய நடவடிக்கை எடுக்கப்பட்டுள்ளது. மேலும் இறக்குமதிகள் குறைக்கப்படும் என்றார் நிர்மலா சீதாராமன்.

English summary

Budget 2022: Navy gets 43% capital outlay hike in this financial year budget.