கர்நாடகா முதல்வர் சித்தராமையா; துணை முதல்வர் டிகே சிவகுமார்- காங். அதிரடி அறிவிப்பு
டெல்லி: கர்நாடகா முதல்வராக சித்தராமையா; துணை முதல்வராக டி.கே.சிவக்குமார் தேர்ந்தெடுக்கப்பட்டுள்ளதாக காங்கிரஸ் தலைமை அதிகாரப்பூர்வமாக அறிவித்துள்ளது. 2024-ம் ஆண்டு வரை கர்நாடகா காங்கிரஸ் கமிட்டி தலைவராகவும் டிகே சிவகுமார் பதவி வகிப்பார் எனவும் ஒரே ஒரு துணை முதல்வர் பதவி மட்டுமே உருவாக்கப்பட்டுள்ளது எனவும் காங்கிரஸ் தலைமை அதிகாரப்பூர்வமாக அறிவித்துள்ளது.
கர்நாடகா சட்டசபை தேர்தலில் 135 இடங்களில் வென்று ஆட்சியை கைப்பற்றியது காங்கிரஸ். ஆனால் முதல்வர் பதவி யாருக்கு என்பதில் முடிவு எடுக்க முடியாமல் கடந்த 5 நாட்களாக காங்கிரஸ் தலைமை திணறி வந்தது. இதனால் டெல்லியில் கர்நாடகா மாநில காங்கிரஸ் தலைவர்கள் அனைவரும் முகாமிட்டு விடிய விடிய ஆலோசனை நடத்தினர்.
இந்த ஆலோசனைகளின் முடிவில் சித்தராமையா முதல்வராகவும் டிகே சிவகுமார் துணை முதல்வராகவும் முடிவு செய்யப்பட்டது. டெல்லியில் இன்று செய்தியாளர்களை காங்கிரஸ் பொதுச்செயலாலர் வேணுகோபால் சந்தித்தார். இந்த சந்திப்பின் போது கர்நாடகா முதல்வராக சித்தராமையா தேர்வு செய்யப்பட்டதை அதிகாரப்பூர்வமாக வேணுகோபால் அறிவித்தார். மேலும் துணை முதல்வராக டிகே சிவகுமார் தேர்வு செய்யப்பட்டுள்ளார்; ஒரே ஒரு துணை முதல்வர் பதவிதான் என முடிவு செய்யப்பட்டுள்ளது என்றும் வேணுகோபால் கூறினார்.
வரும் 20-ந் தேதி பெங்களூருவில் சித்தராமையா, டிகே சிவகுமார் மற்றும் அமைச்சர்கள் பதவியேற்பு நிகழ்ச்சி நடைபெறும்; இந்த பதவியேற்பு நிகழ்ச்சிக்கு ஒத்த கருத்துள்ள தலைவர்கள் அனைவரும் அழைக்கப்படுவர் என்றும் கேசி வேணுகோபால் தெரிவித்தார்.
மேலும் கர்நாடகாவில் காங்கிரஸ் கட்சியின் வெற்றிக்கு சித்தராமையா, டிகே சிவகுமார் இருவரும் பாடுபட்டனர்; இருவருமே காங்கிரஸ் கட்சியின் சொத்துகள்தான். காங்கிரஸ் கட்சியில் முழுமையாக கருத்து ஒற்றுமை ஏற்பட வேண்டும் என்பதற்காகவே ஆலோசனைகள் தொடர்ந்து நடத்தப்பட்டன என்றார் கேசி வேணுகோபால்.
Click it and Unblock the Notifications
Sign in with Google