கொரோனா தடுப்பூசி போடுவது கட்டாயம் அல்ல: மத்திய சுகாதாரத்துறை அமைச்சகம்

டெல்லி: கொரோனா தடுப்பூசி போடுவது என்பது கட்டாயமானது அல்ல என மத்திய சுகாதாரத்துறை அமைச்சகம் விளக்கம் அளித்துள்ளது.

உலக நாடுகளைப் போலவே இந்தியாவிலும் கொரோனா தடுப்பூசி போடுவதற்கான பணிகள் தீவிரப்படுத்தப்பட்டுள்ளன. இதற்கான ஏற்பாடுகள் முழு வீச்சில் நடைபெறுகின்றன.

தற்போதைய நிலையில் இந்தியாவில் மொத்தம் 6 கொரோனா தடுப்பூசிகளை பயன்படுத்தும் திட்டம் இருக்கிறது. இந்த நிலையில் கொரோனா தடுப்பூசி தொடர்பான விளக்கங்களை மத்திய சுகாதாரத்துறை அமைச்சகம் வெளியிட்டுள்ளது.

அதில், கொரோனா தடுப்பூசியை அனைவரும் போட வேண்டும் என்பது கட்டாயம் அல்ல. விருப்பப்பட்டால் மட்டும் தடுப்பூசி போட்டுக்கொள்ளலாம் என தெரிவிக்கப்பட்டுள்ளது.

அதேநேரத்தில் நீரிழிவு, ரத்தக்கொதிப்பு போன்ற பாதிப்பு உள்ளவர்களை கொரோனா தாக்கும் அபாயம் உள்ளது என்பதால் அவர்கள் இந்த தடுப்பூசியை போட்டுக் கொள்ளலாம்.

முதல் டோஸ் போட்டு 28 நாட்கள் கழித்து மற்றொரு டோஸ் போட வேண்டும். அப்போதுதான் முழுமையான பலன் கிடைக்கும் எனவும் சுகாதாரத்துறை அமைச்சக அறிக்கையில் சுட்டிக்காட்டப்பட்டிருக்கிறது.

தடுப்பூசி போடுவது என முடிவு செய்துவிட்டால் ஏதேனும் ஒரு அடையாள அட்டை மூலம் முன்பதிவு செய்ய வேண்டும். சுகாதார பணியாளர்கள், 50 வயதை தாண்டியவர்கள் கட்டாயம் கொரோனா தடுப்பூசி போட வேண்டும்.

English summary

Union Health Ministry has said Vaccination for COVID-19 is voluntary.