என்னது இந்திய ரூபாய் மதிப்பு வீழ்ச்சியா? மத்திய நிதி அமைச்சர் நிர்மலா சீதாராமன் திட்டவட்ட மறுப்பு
டெல்லி: இந்தியாவின் ரூபாய் மதிப்பு வீழ்ச்சியடைந்துவிட்டதாக முன்வைக்கப்படும் குற்றச்சாட்டுகளை மத்திய நிதி அமைச்சர் நிர்மலா சீதாராமன் ராஜ்யசபாவில் திட்டவட்டமாக இன்று மறுத்துள்ளார்.
நாடாளுமன்ற மழைக்காலக் கூட்டத் தொடர் தொடங்கி 2 வாரங்களாகிவிட்டது. கடந்த சில நாட்களாகத்தான் நாடாளுமன்றத்தில் ஆரோக்கியமான விவாதங்கள் நடைபெற்று வருகின்றன.
நாடாளுமன்ற லோக்சபாவில் லைவாசி உயர்வு தொடர்பாக விவாதிக்கப்பட்டது. திமுகவின் கனிமொழி எம்.பி, காங்கிரஸின் ஜோதிமணி எம்.பி. உள்ளிட்டோர் தமிழில் பேசினர். இதற்கு பதிலளிக்கும் வகையில் லோக்சபாவில் நேற்று தமிழில் பேசிய மத்திய நிதி அமைச்சர் நிர்மலா சீதாராமன்,
பெரும்பாலான நாடுகளைவிட இந்தியாவின் பொருளாதாரம் சிறப்பான இடத்தில் இருக்கிறது. இலங்கை, பாகிஸ்தான் போன்ற அண்டை நாடுகளில் ஏற்பட்டதைப் போன்று இந்தியப் பொருளாதாரம் தேக்கமடைய, நெருக்கடி ஏற்பட வாய்ப்பே இல்லை. கொரோனா இரண்டாவது அலை, ஒமைக்ரான், உக்ரைன் போர் போன்ற பல்வேறு பிரச்சினைகளுக்கு மத்தியில் 7%-க்கும் குறைவாகவே பணவீக்கம் உள்ளது; நாட்டில் வங்கிகள் மீதான நெருக்கடி குறைவாகவே உள்ளது என்றார்.
இதனைத் தொடர்ந்து இன்று ராஜ்யசபாவிலும் விலைவாசி உயர்வு தொடர்பான விவாதம் நடைபெற்றது. இந்த விவாதத்தில் பேசிய திரிணாமுல் காங்கிரஸ் கட்சியின் மூத்த தலைவரான லூசின்ஹோ, நாட்டின் ரூபாய் மதிப்பு 28 முறை சுமார் 34% சரிவை சந்தித்துள்ளது. நாட்டின் அன்னிய செலாவணி கையிருப்பும் குறைந்துள்ளது என குற்றம்சாட்டினார். இதேபோல் எம்.பி.க்கள் பலரும் பொருளாதார நிலவரம் தொடர்பாக கேள்விகள் எழுப்பினர்.
இதற்கு மத்திய நிதி அமைச்சர் நிர்மலா சீதாராமன் பதிலளித்ததாவது: நமது நாட்டின் ரூபாய் மதிப்பு தற்போது வீழ்ச்சி அடையவில்லை. நமது ரூபாய் மதிப்பு நிலையானதாகவே இருக்கிறது. நாட்டின் ரூபாய் மதிப்பு நிலவரத்தை ரிசர்வ் வங்கி தொடர்ந்து கண்காணித்து வருகிறது. ரூபாய் மதிப்பில் ஏற்றம், இறக்கம் என்கிற தடுமாற்றம் இருந்தால்தான் ரிசர்வ் வங்கி தலையிடும். இருந்த போதும் ரூபாய் மதிப்பு இயல்பாகவே சரி செய்து கொள்ளக்கூடியதுதான். நமது ரூபாய் மதிப்பு கவலைப்படக் கூடியதாகவும் இல்லை. அன்னிய செலாவணி கையிருப்பும் ஆரோக்கியமான நிலையில்தான் உள்ளது. இவ்வாறு நிர்மலா சீதாராமன் கூறினார்.
Click it and Unblock the Notifications
Sign in with Google