"6.8% தான்!" குறையும் இந்திய பொருளாதார வளர்ச்சி.. சர்வதேச நாணய நிதியம் கணிப்பு! ஏன் முக்கியம்

Updated: Tuesday, October 11, 2022, 21:51 [IST]

Subscribe to Oneindia Tamil

டெல்லி: இந்தியா பொருளாதார வளர்ச்சி 2022ஆம் ஆண்டில் குறையும் என்று சர்வதேச நாணய நிதியம் கணித்து உள்ளது.

கொரோனா பரவல் காரணமாக உலகின் பல்வேறு நாடுகளின் பொருளாதாரமும் கடுமையாகப் பாதிக்கப்பட்டு உள்ளன. இலங்கை உள்ளிட்ட சில நாடுகளில் மோசமான நிதி நெருக்கடி ஏற்பட்டு உள்ளது.

இந்தச் சூழலில் இந்தியாவின் பொருளாதார வளர்ச்சி என்னவாக இருக்கும் என்பது குறித்து சர்வதேச நாணய நிதியம் புதிய கணிப்பை வெளியிட்டு உள்ளது.

பொருளாதாரம்

பல்வேறு காரணங்களால் இந்த ஆண்டு பல நாடுகளின் பொருளாதார வளர்ச்சி குறையும் என்று சர்வதேச நாணய நிதியம் தெரிவித்து உள்ளது. உலக ஜிபிடி இந்தாண்டு 3.2 சதவீதம் வளரும் என்று சர்வதேச நாணய நிதியம் கணித்து உள்ளது. அடுத்து 2023ஆம் ஆண்டில் வளர்ச்சி 2.7 சதவீதமாக இருக்கும் என்று கூறப்பட்டு உள்ளது. இது கடந்த ஜூலை மாதம் வெளியிட்ட கணிப்பைக் காட்டிலும் 0.2% குறைவாகும்.

சர்வதேச பொருளாதாரம்

கடந்த 2001ஆம் ஆண்டிற்குப் பின்னர் சர்வதேச பொருளாதாரம் இந்தளவுக்குப் பலவீனமாக இருப்பது இதுவே முதல்முறையாகும். சர்வதேச பணவீக்கம் இந்த ஆண்டு அதிகபட்சமாக 9.5%ஐ எட்டும் என்று கணிக்கப்பட்டு உள்ளது. வரும் ஆண்டுகளில் அது மெல்லக் குறைந்து 2024ஆம் ஆண்டு பணவீக்கம் 4.1%ஆகக் குறையும் என்று கூறப்பட்டு உள்ளது. இதனால் வளரும் நாடுகள் கடுமையாகப் பாதிக்கப்பட வாய்ப்புகள் உள்ளது.

இந்தியாவின் வளர்ச்சி

இந்தியாவைப் பொறுத்தவரை இந்தாண்டு பொருளாதார வளர்ச்சி 6.8%ஆக இருக்கும் என்று கூறப்பட்டு உள்ளது. கடந்த ஜூலை மாதம் வெளியிட்ட கணிப்பில் இந்தியாவின் ஜிடிபி வளர்ச்சி 7.4%ஆக இருக்கும் என்று கணித்து இருந்தது குறிப்பிடத்தக்கது. முன்னதாக ஜனவரியில் வெளியிட்ட கணிப்பில் இந்தியாவின் பொருளாதார வளர்ச்சி 8.2 சதவீதமாக இருக்கும் என்று கூறப்பட்டு இருந்தது குறிப்பிடத்தக்கது.

காரணம்

2021-22 நிதியாண்டில் (ஏப்ரல் 2021 முதல் மார்ச் 2022 வரை) இந்தியாவின் வளர்ச்சி 8.7 சதவீதமாக இருந்தது. இது தொடர்பாகச் சர்வதேச நாணய நிதியம் வெளியிட்டுள்ள அறிவிப்பில், "2022இல் இந்தியாவின் பொருளாதார வளர்ச்சி 6.8 சதவீதமாக இருக்கும்" என்று கூறப்பட்டு உள்ளது. இரண்டாம் காலாண்டில் எதிர்பார்த்ததைக் காட்டிலும் வளர்ச்சி குறைவாக இருந்ததே இதற்குக் காரணம் என்று சொல்லப்பட்டு உள்ளது.

உலக நாடுகள்

அமெரிக்கா இந்த ஆண்டு 1.6 சதவிகிதமும், சீனா 3.2 சதவிகிதம் மட்டுமே வளரும் என்று சர்வதேச நாணய நிதியம் தெரிவித்து உள்ளது. இந்தாண்டைக் காட்டிலும் அடுத்தாண்டு தான் பொருளாதார வளர்ச்சி மோசமாக இருக்கும் என்று கூறப்பட்டு உள்ளது. குறிப்பாக அமெரிக்காவில் 2023கான வளர்ச்சி 1% ஆக மட்டுமே இருக்கும் என்று அதில் கூறப்பட்டு உள்ளது.