குட்நியூஸ்.. சமையல் எண்ணெய் விலை குறைகிறது.. வரியை குறைத்தது மத்திய அரசு

Updated: Friday, June 18, 2021, 11:09 [IST]

Subscribe to Oneindia Tamil

டெல்லி: கடுமையாக உயர்ந்து வரும் சமையல் எண்ணெய் விலையை குறைக்கும் நோக்குடன் மத்திய அரசு இறக்குமதி வரியை குறைத்துள்ளது இதன் காரணமாக பாமாயில் விலை கணிசமாக குறையும் என்று எதிர்பார்க்கப்படுகிறது.

இந்தியாவில் கடந்த சில ஆண்டுகளாக சமையல் எண்ணெய் விலை கடுமையாக உயர்ந்து வருகிறது. ஆனால் கடந்த இரண்டு ஆண்டுகளாக கொரோனா பாதிப்பு மற்றும் ஊரடங்கு காரணமாக வேலையை இழந்து வருவாயை இழந்து தவித்து வருகிறார்கள் மக்கள்.

அவர்களுக்கு பெட்ரோல், டீசல் விலை உயர்வு, சிலிண்டர் விலை உயர்வு மற்றும் சமையல் எண்ணெய் விலை உயர்வு பெரும் சுமையாக மாறி வருகிறது.

வரி அதிகம்

இந்தியாவில் பயன்படுத்தப்படும் சமையல் எண்ணெய்களில் மூன்றில் இரண்டு பங்கு வெளிநாடுகளில் இருந்துதான் இறக்குமதி செய்யப்படுகிறது. இவற்றுக்கு மத்திய அரசு அளவுக்கு அதிகமாக இறக்குமதி வரி விதிப்பதால் உள்நாட்டில் இவற்றின் விலைகள் உயர்கின்றன. இந்நிலையில் வெளிநாடுகளில் இருந்து இறக்குமதி செய்யப்படும் சமையல் எண்ணெய்களுக்கான வரியை மத்திய அரசு நேற்று அதிரடியாக குறைத்துள்ளது.

சோயா பீன்

இதன்படி பாமாயில் மீதான இறக்குமதி வரியை டன்னுக்கு ரூ.8288 வரை குறைக்கப்பட்டுள்ளது. இதேபோல் சோயா பீன் எண்ணெய் மீதான இறக்குமதி வரை ஒரு டன்னுக்கு ரூ.2758 வரை குறைக்கப்பட்டுள்ளது. இந்த விலை குறைப்பு நேற்று முதல் அமலுக்கு வந்துள்ளது. இதன் மூலம் உள்நாட்டில் சமையல் எண்ணெய்களின் விலை குறையும் என்று எதிர்பார்க்கப்படுகிறது.

எவ்வளவு உயர்வு

இதனிடையே தமிழகத்தில் கடந்த 2020ம் ஆண்டு ஜூன் மாதத்தில் இருந்த எண்ணெய் விலை மற்றும் 2021 ஜூனில் விற்பனை செய்யப்படும் எண்ணெய் விலைகளை இப்போது பார்ப்போம். கடலை எண்ணெய் விலை கடந்த ஆண்டு இதே மாதத்தில் 179 ரூபாய்க்கு (ஒரு லிட்டர்) விற்பனையானது. ஆனால் இப்போது அதன் விலை 9 சதவீதம் அளவிற்கு உயர்ந்து 196 ரூபாய் ஆக உள்ளது. கடுகு எண்ணெய் விலை கடந்த ஆண்டு 132 ரூபாயாக இருந்தது. இந்த ஆண்டு 177 ரூபாய் ஆக அதிகரித்துள்ளது. அதாவது 34 சதவீதம் அளவிற்கு கடுகு எண்ணெய் விலை உயர்ந்துள்ளது.

வனஸ்பதி எண்ணெய்

வனஸ்பதி எண்ணெய் விலை 106ரூபாயில் இருந்து 141 ரூபாயாக உயர்ந்துள்ளது. சோயா எண்ணெய் 117 ரூபாயில் இருந்து 169 ரூபாய் ஆக உயர்ந்துள்ளது. சூரியகாந்தி எண்ணெய் விலை 128 ரூபாயில் இருந்து 195 ரூபாய் ஆக உயர்ந்துள்ளது. பாமாயில் விலை 95 ரூபாயில் இருந்து 130 ரூபாய் ஆக உயர்ந்துள்ளது.