ஆகஸ்ட்டில் ஜிஎஸ்டி மொத்த வருவாய் ரூ.1,43,612 கோடி; தமிழ்நாட்டில் ஜிஎஸ்டி நிலவரம் என்ன தெரியுமா?

டெல்லி: ஆகஸ்ட் மாதத்தில் நாட்டின் மொத்த ஜிஎஸ்டி வருவாய் ரூ1,43,612 கோடி என மத்திய அரசு தெரிவித்துள்ளது.

மத்திய அரசின் ஜிஎஸ்டி வரிகள் குறித்த சர்ச்சையும் விமர்சனங்களும் ஓயவில்லை. ஜிஎஸ்டி வரி விதிப்பு, ஜிஎஸ்டி வரி நிலுவையை தராமல் மத்திய அரசு இழுத்தடிப்பது என்பது நாட்டின் கூட்டாட்சி தத்துவத்துக்கு எதிரானது என்பது மாநில கட்சிகளின் கருத்து.

இந்நிலையில் நடப்பாண்டில் அதாவது 2022 ஆகஸ்ட் மாதத்தில் வசூலிக்கப்பட்ட ஜிஎஸ்டி வருவாய் தொடர்பாக மத்திய அரசு புள்ளி விவரங்களை வெளியிட்டுள்ளது.

ஆகஸ்ட் மாதத்தில் மொத்த ஜிஎஸ்டி வருவாய் ரூ.1,43,612 கோடியாகும். இதில் மத்திய ஜிஸ்டி ரூ.24,710 கோடி, மாநில ஜிஎஸ்டி ரூ.30,951 கோடி, ஒருங்கிணைந்த ஜிஎஸ்டி (இறக்குமதி பொருட்கள் மூலம் வசூலிக்கப்பட்ட ரூ.42,067 கோடி உட்பட) ரூ.77,782 கோடி, கூடுதல் வரி (செஸ்) ரூ.10,168 கோடி (இறக்குமதி பொருட்கள் மூலம் வசூலிக்கப்பட்ட ரூ.1,018 கோடி உட்பட).

ஒருங்கிணைந்த ஜிஎஸ்டி-யிலிருந்து மத்திய ஜிஎஸ்டி-க்கு ரூ.29,524 கோடியையும், மாநில ஜிஎஸ்டி-க்கு ரூ.25,119 கோடியையும் அரசு வழங்கியுள்ளது. முறைப்படியான பைசலுக்கு பின், 2022 ஆகஸ்ட் மாதத்தில் மத்திய ஜிஎஸ்டி-க்கான வருவாய் ரூ.54,234 கோடியாகவும், மாநில ஜிஎஸ்டி-க்கான வருவாய் ரூ.56,070 கோடியாகவும் இருந்தது.

கடந்த ஆண்டு இதே மாதத்தில் ஜிஎஸ்டி வருவாய் ரூ.1,12,020 கோடி என இருந்த நிலையில், இந்த ஆண்டு வருவாயில் 28 சதவீதம் உயர்ந்துள்ளது. சென்ற ஆண்டு இதே காலத்தைவிட பொருட்கள் இறக்குமதி மூலமான வருவாய் 57 சதவீதமும் உள்நாட்டு பரிவர்த்தனை மூலமான வருவாய் (சேவைகள் இறக்குமதி உட்பட) 19 சதவீதமும் அதிகரித்துள்ளது.

தமிழ்நாட்டில், 2021 ஆகஸ்ட் மாதத்தில் 7,060 கோடியாக இருந்த ஜிஎஸ்டி வருவாய், 2022 ஆகஸ்ட் மாதத்தில் ரூ.8,386 கோடியாகி 19 சதவீத வளர்ச்சி கண்டுள்ளது. புதுச்சேரியில் 2021 ஆகஸ்ட் மாதத்தில் ரூ.156 கோடியாக இருந்த ஜிஎஸ்டி வருவாய், 2022 ஆகஸ்ட் மாதத்தில் ரூ.200 கோடியாகி 28 சதவீத வளர்ச்சி கண்டுள்ளது என மத்திய அரசு தெரிவித்துள்ளது.

ஆகஸ்ட் மாத ஜிஎஸ்டி

மொத்த வருவாய் - ரூ.1,43,612 கோடி

மத்திய ஜிஎஸ்டி - ரூ 24,710 கோடி

மாநில ஜிஎஸ்டி - ரூ 30,951 கோடி

ஒருங்கிணைந்த ஜிஎஸ்டி - ரூ 77,782 கோடி

மத்திய ஜிஎஸ்டிக்கு - ரூ29,524 கோடி

மாநில ஜிஎஸ்டிக்கு - ரூ25,119 கோடி

தமிழகம்: ஜிஎஸ்டி- 19% வளர்ச்சி

2021 ஆகஸ்ட் ரூ7,060 கோடி

2022 ஆகஸ்ட் ரூ8,386 கோடி

புதுச்சேரி ஜிஎஸ்டி 28% வளர்ச்சி

2021 ஆகஸ்ட் ரூ156 கோடி

2022 ஆகஸ்ட் ரூ200 கோடி

English summary

Union finance ministry said that The Goods and Services Tax revenue in August to Rs1,43,612 crore.