INDIA - NDA.. இரண்டு கூட்டணியும் வேணாம்! "தனி ரூட் " எடுக்கும் மாயாவதி.. அவரே சொன்ன காரணத்தை பாருங்க

டெல்லி: தேர்தலுக்கு ஆளும் பாஜகவும் எதிர்க்கட்சிகளும் தயாராகி வரும் நிலையில், பகுஜன் சமாஜ் கட்சியின் தலைவர் மாயாவதி எதிர்க்கட்சிகளின் கூட்டணியில் இணைய போவது இல்லை என்று அறிவித்துள்ளார்.

வரும் நாடாளுமன்ற தேர்தலில் எதிர்க்கட்சிகள் ஓரணியில் திரண்டு போட்டியிட திட்டமிட்டுள்ளன. காங்கிரஸ், திரிணாமூல் காங்கிரஸ், ஐக்கிய ஜனதா தளம், திமுக உள்பட 26 எதிர்க்கட்சிகள் ஒருங்கிணைந்து போட்டியிடுவதாக அறிவித்துள்ளது. இதற்கான செயல் திட்டம், இட பங்கீடு குறித்து ஆலோசிக்க அடுத்த அடுத்த கூட்டங்களுக்கு ஏற்பாடு செய்யப்பட்டுள்ளது. எதிர்க்கட்சிகள் தங்கள் கூட்டணிக்கு இந்தியா என பெயர் வைத்துள்ளது.

எதிர்க்கட்சிகளின் இரண்டு கூட்டங்கள் முடிந்த நிலையில், அடுத்த கூட்டம் மும்பையில் நடைபெறுகிறது. அதேபோல், தேசிய ஜனநாயக கட்சிகளின் கூட்டணியும் நேற்று நடைபெற்றது. தேர்தலுக்கு ஆளும் பாஜகவும் எதிர்க்கட்சிகளும் தயாராகி வரும் நிலையில், பகுஜன் சமாஜ் கட்சியின் தலைவர் மாயாவதி எதிர்க்கட்சிகளின் கூட்டணியில் இணைய போவது இல்லை என்று அறிவித்துள்ளார். இது குறித்து மாயாவதி கூறியதாவது:-

வரும் மக்களவை தேர்தலில் பகுஜன் சமாஜ் கட்சி தனித்தே போட்டியிடும். அதேபோல், ராஜஸ்தான், மத்திய பிரதேசம், சத்தீஷ்கர், தெலுங்கானா ஆகிய மாநில சட்டமன்ற தேர்தலிலும் பகுஜன் சமாஜ் கட்சி தனித்து போட்டியிடும். பஞ்சாப், ஹரியானா ஆகிய மாநிலங்களில் நிபந்தனைகளுடன் பிராந்திய கட்சிகளுடன் கூட்டணி அமைக்கும். ஆனால், இந்தக் கட்சிகள் தேசிய ஜனநாயக கூட்டணியிலோ அல்லது எதிர்க்கட்சிகளின் கூட்டணியிலோ இடம் பெற்றிருக்காது" என்றார்.

மேலும் பாஜக, காங்கிரஸ் ஆகிய இரு கட்சிகளையுமே விமர்சித்த மாயாவதி, பாஜக மற்றும் காங்கிரஸ் தலைமையிலான கூட்டணி கட்சிகளின் நோக்கம் மற்றும் கொள்கைகள் ஒரே மாதிரியாகவே உள்ளன. குறிப்பாக தலித், பழங்குடியினர், ஏழை மக்கள், பிற்படுத்தப்பட்ட வகுப்பினர், முஸ்லீம் மற்றும் பிற சிறுபான்மை வகுப்பினர் விவகாரத்தில் இரண்டு கட்சிகளின் கொள்கைகளும் ஒரே மாதிரியாகவே உள்ளது.

இரண்டு கட்சிகளுமே போலியான வாக்குறுதிகளை மட்டுமே அளித்து வருகின்றன. பாஜக மற்றும் காங்கிரஸ் இடையே எந்த வேறுபாடும் இல்லை. அதிகாரத்திற்காக காங்கிரஸ் கட்சி சாதியவாத முதலாளித்துவ கட்சிகளுடன் கூட்டணி அமைத்துள்ளது. பாஜகவும் தனது என்.டி.ஏ கூட்டணியை வலுப்படுத்தி வருகிறது.

ஆனால், அவர்களின் கொள்கைகள் முஸ்லீம்களுக்கும் தலித்களுக்கும் எதிராகவே உள்ளது. இரண்டு கட்சிகளுமே ஆட்சிக்கு வந்தால் வாக்குறுதிகளை நிறைவேற்றுவதில்லை. இதன் காரணமாகவே நான் பாஜகவுடனோ காங்கிரஸ் கூட்டணியுடனோ கை கோர்க்கவில்லை" என்றார்.

English summary

As the ruling BJP and opposition parties are gearing up for the elections, Bahujan Samaj Party chief Mayawati has announced that she will not join the alliance of opposition parties.