புதிய மைல்கல்.. 100 கோடி வாக்காளர்களை தொடும் இந்தியா.. இப்போ எவ்வளவு? தேர்தல் ஆணையம் தந்த டேட்டா

டெல்லி: நம் நாட்டின் வாக்காளர்களின் எண்ணிக்கை 100 கோடியை விரைவில் தொட்டு புதிய சாதனை படைக்க உள்ளது என்று இந்திய தேர்தல் ஆணையத்தின் தலைமை தேர்தல் ஆணையர் ராஜீவ் குமார் தெரிவித்தார்.

நம் நாட்டின் தலைநகர் டெல்லியில் ஆம்ஆத்மி கட்சியின் ஆட்சி நடந்து வருகிறது. கடந்த 10 ஆண்டுகளாக ஆம்ஆத்மி தான் டெல்லியில் ஆட்சி புரிந்து வருகிறது. முதல்வராக இருந்த அரவிந்த் கெஜ்ரிவால் ராஜினாமா செய்ததை தொடர்ந்து அதிஷி முதல்வராக உள்ளார்.

டெல்லி சட்டசபையின் 5 ஆண்டு பதவிக்காலம் அடுத்த மாதம் (பிப்ரவரி) 23ம் தேதி முடிவுக்கு வருகிறது. இதனால் விரைவில் தேர்தல் அறிவிக்கப்படும் என்று எதிர்பார்க்கப்பட்டது. அதன்படி டெல்லி சட்டசபைக்கு ஒரே கட்டமாக தேர்தல் தேதி அறிவிக்கப்பட்டுள்ளது.

டெல்லியை பொறுத்தவரை மொத்தம் 70 சட்டசபை தொகுதிகள் உள்ளன. ஒரு கட்சி தனித்து ஆட்சியை பிடிக்க 36 தொகுதிகளில் வெல்ல வேண்டும். இந்நிலையில் தான் 70 சட்டசபை தொகுதிகளுக்கும் ஒரே கட்டமாக பிப்ரவரி 5ம் தேதி சட்டசபை தேர்தல் என்பது நடைபெற உள்ளது. அதன்பிறகு பிப்ரவரி 8 ம் தேதி ஓட்டுகள் எண்ணப்பட்டு முடிவுகள் அறிவிக்கப்பட உள்ளதாக இன்று இந்திய தேர்தல் ஆணையத்தின் தலைமை தேர்தல் ஆணையர் ராஜீவ் குமார் அறிவித்தார்.

இதுதொடர்பாக அவர் இன்று டெல்லியில் பேட்டியளித்தார். அந்த பேட்டியில் நம் நாட்டில் மொத்த வாக்காளர்களின் எண்ணிக்கை தொடர்பான முக்கிய விபரங்களை அவர் வெளியிட்டார். அதன்படி நம் நாட்டில் உள்ள வாக்காளர்களின் எண்ணிக்கை என்பது விரைவில் 100 கோடியை தொட உள்ளது என்று அவர் கூறினார். இதுதொடர்பாக தலைமை தேர்தல் ஆணையர் ராஜீவ் குமார் கூறியதாவது:

கடந்த 2024ம் ஆண்டில் உலகளவிலான மக்கள்தொகையில் 3ல் 2 பங்கு மக்கள் வெவ்வேறு தேர்தல்களில் வாக்களித்தனர். நம் நாட்டை பொறுத்தவரை 8 மாநிலங்கள், யூனியன் பிரதேசங்களில் தேர்தல் நடந்து முடிந்தது. லோக்சபா தேர்தலை எடுத்து கொண்டால் ஓட்டு சதவீதம், பெண்கள் அதிகம் ஓட்டளித்தது என்று சாதனைகள் படைக்கப்பட்டுள்ளது.

நாடு முழுவதும் நேற்று வாக்காளர் பட்டியல் வெளியிடப்பட்டது. அதன்படி நம் நாட்டில் உள்ள வாக்காளர்களின் மொத்த எண்ணிக்கை 99 கோடியை கடந்துவிட்டது. விரைவில் நம் நாட்டின் வாக்காளர்களின் எண்ணிக்கை 100 கோடியை நெருங்கும். இது நம் நாட்டுக்கு புதிய சாதனையாக அமையும்.'' என்றார்.

English summary

‛‛Electoral rolls were released yesterday. We are crossing 99 crore voters. We are going to be a nation of one billion voters very soon, which will be another record in voting’’, says Chief Election Commissioner Rajiv Kumar who addressing a press conference in New Delhi today.