லோக்சபா சபாநாயகரை தேர்வு செய்ய ஜூன் 26ம் தேதி! வந்த அதிகாரப்பூர்வ அறிவிப்பு! அடுத்து என்ன நடக்கும்?

Updated: Friday, June 14, 2024, 6:38 [IST]

Subscribe to Oneindia Tamil

டெல்லி: லோக்சபா தேர்தல் முடிவுகள் சமீபத்தில் தான் வெளியான நிலையில், மக்களவை சபாநாயகரைத் தேர்வு செய்ய ஜூன் 26ம் தேதி தேர்தல் நடைபெறும் என அறிவிக்கப்பட்டுள்ளது.

நடந்து முடிந்த லோக்சபா தேர்தலில் பாஜக தனிப்பெரும் கட்சியாக உருவெடுத்துள்ள நிலையில், என்டிஏ கூட்டணிக் கட்சிகளின் ஆதரவுடன் பாஜக மீண்டும் ஆட்சியை அமைத்துள்ளது.

மோடி கடந்த ஞாயிற்றுக்கிழமை மூன்றாவது முறையாகப் பிரதமராகப் பதவியேற்ற நிலையில், அவருடன் மற்ற மத்திய அமைச்சர்களும் பதவியேற்றனர். மேலும், திங்கள்கிழமை மத்திய அமைச்சர்களுக்கான துறைகளும் ஒதுக்கப்பட்டன.

சபாநாயகர் யார்: அடுத்த கட்டமாக இப்போது பலரது கவனமும் மக்களவை சபாநாயகர் யார் என்பதில் தான் இருக்கிறது. இதற்கிடையே மக்களவை சபாநாயகரைத் தேர்வு செய்ய ஜூன் 26ம் தேதி தேர்தல் நடைபெறும் என அறிவிக்கப்பட்டுள்ளது. லோக்சபா கூட்டத்தொடர் ஜூன் 24ஆம் தேதி தொடங்கும் என அறிவிக்கப்பட்டுள்ள நிலையில், இரண்டு நாட்கள் கழித்து புதிய சபாநாயகரைத் தேர்வு செய்யத் தேர்தல் நடைபெறுகிறது.

லோக்சபா தேர்தல் முடிவுகள் வெளியாகி இருக்கும் நிலையில், 18வது லோக்சபாவின் கூட்டத்தொடர் ஜூன் 24ம் தேதி தொடங்குகிறது. இந்த கூட்டத்தொடரில் தேர்தலில் தேர்வான அனைத்து எம்பிக்களும் பதவியேற்க உள்ளனர். இதையடுத்து ஜூலை 3ஆம் தேதி இந்தக் கூட்டத்தொடர் நிறைவடைய இருக்கிறது.

திரௌபதி முர்மு: சபாநாயகர் நியமிக்கப்பட்ட பிறகு ஜூன் 27-ம் தேதி லோக்சபா மற்றும் ராஜ்யசபா கூட்டுக் கூட்டத்தில் குடியரசுத் தலைவர் திரௌபதி உரையாற்றுகிறார். இந்த என்டிஏ அரசு அடுத்த ஐந்து ஆண்டுகளில் எதில் கவனம் செலுத்த உள்ளது என்பது குறித்த விவரங்கள் இடம்பெற்று இருக்கும் எனத் தெரிகிறது.

ஏன் முக்கியம்: கடந்த 10 ஆண்டுகளாக பாஜக தனிப்பெரும்பான்மையுடன் ஆட்சி அமைத்த போது, பாஜக வசமே மக்களவை சபாநாயகர் பதவி இருந்தது. இப்போது கூட்டணி ஆட்சி அமைந்துள்ள நிலையில், தெலுங்கு தேசம் மற்றும் ஜேடியு சபாநாயகர் பதவியைக் கேட்பதாகக் கூறப்படுகிறது. அதேநேரம் கூட்டணி ஆட்சி அமையும் போது சபாநாயகர் பதவி ரொம்பவே முக்கியம் என்பதால் பாஜக தரப்பு சபாநாயகர் பதவியைத் தன்னிடமே வைத்துக் கொள்ள முடிவு செய்துள்ளதாகக் கூறப்படுகிறது.

மறுபுறம் இந்தியா கூட்டணியும் சபாநாயகர் தேர்தலில் கடும் போட்டி தர முடிவு செய்துள்ளது. பொது வேட்பாளர் ஒருவரை நிறுத்தி அழுத்தம் தர இந்தியா கூட்டணி முடிவு செய்துள்ளதாகக் கூறப்படுகிறது. இப்போது லோக்சபாவில் பாஜக கூட்டணிக்கு 293 உறுப்பினர்களும், எதிர்க்கட்சிகளுக்கு 234 உறுப்பினர்களும் உள்ளது குறிப்பிடத்தக்கது.