மோடியை நீச் ஆத்மி என விமர்சித்தது சரிதான்.. மீண்டும் மணிசங்கர் அய்யர்- பாஜக 'பொளேர்' பதில்!

டெல்லி: பிரதமர் மோடியை நீச் ஆத்மி என தாம் 2 ஆண்டுகளுக்கு முன்னர் விமர்சித்தது சரிதான் என காங்கிரஸ் மூத்த தலைவர் மணிசங்கர் அய்யர் கூறியுள்ளார். அவரது இந்த கருத்துக்கு கண்டனம் தெரிவித்துள்ள பாஜக, அவதூறுகளின் தலைவர் மணிசங்கர் எனவும் விமர்சனம் செய்துள்ளது.

2017-ம் ஆண்டு மோடியை 'நீச் ஆத்மி' என மணிசங்கர் ஐயர் விமர்சித்தது பெரும் சர்ச்சையானது. இதையடுத்து காங்கிரஸ் கட்சியில் இருந்து மணிசங்கர் ஐயர் சஸ்பென்ட் செய்யப்பட்டார். பின்னர் அவர் தமது கருத்துக்கு வருத்தம் தெரிவித்தார்.

இந்நிலையில் இணைய ஊடகம் ஒன்றில் கட்டுரை ஒன்றை மணிசங்கர் ஐயர் எழுதியிருந்தார். அதில், மோடியின் தற்போதைய மோசமான தேர்தல் பிரசாரத்தை கடுமையாக விமர்சித்திருந்தார் மணிசங்கர் ஐயர்.

மேலும் 2017-ம் ஆண்டு தாம் மோடியை நீச் ஆத்மி என விமர்சித்திருந்தேன்.. என் கணிப்பு சரியானதுதானே எனவும் கிண்டலடித்தார் மணிசங்கர். இதை கடுமையாக சமூக வலைதளங்களில் பாஜக தலைவர்கள் விமர்சித்துள்ளனர்.

பாஜக மூத்த தலைவர் ஜி.வி.எல். நரசிம்மராவ், காங்கிரஸின் இரட்டை முகத்தை அம்பலப்படுத்துவதாகவே மணிசங்கர் கருத்துகள் உள்ளன என சாடியுள்ளார்.

English summary

Mani Shankar Aiyar claimed that his ‘neech’ remark for PM Narendra Modi was prophetic.