மணிப்பூர் கொடூரம்- நாடாளுமன்ற வளாகத்தில் 26 கட்சிகளின் இந்தியா கூட்டணி எம்பிக்கள் மாஸ் போராட்டம்!

டெல்லி: மணிப்பூர் வன்முறைகளை ஒடுக்க தவறிய மத்திய அரசைக் கண்டித்தும் பிரதமர் மோடி அறிக்கை தாக்கல் செய்ய வலியுறுத்தியும் 26 எதிர்க்கட்சிகளின் கூட்டமைப்பான இந்தியா கூட்டணி எம்.பி.க்கள் இன்று நாடாளுமன்ற வளாகத்தில் போராட்டம் நடத்தினர்.

மணிப்பூர் மாநிலத்தில் 3 மாதங்களாக வன்முறை சம்பவங்கள் தொடருகின்றன. மணிப்பூர் வன்முறைகளைக் கட்டுப்படுத்த மத்திய அரசு தவறிவிட்டது என்பது எதிர்க்கட்சிகளின் குற்றச்சாட்டு. மணிப்பூரில் குக்கி இன பெண்கள் பலாத்காரம் செய்யப்பட்டு நிர்வாணமாக ஊர்வலமாக அழைத்துச் செல்லப்பட்டனர். இந்த வீடியோ காட்சிகள் பெரும் அதிர்ச்சியை ஏற்படுத்தின.

மத்திய உள்துறை அமைச்சர் அமித்ஷா, மணிப்பூர் மாநிலம் சென்று முகாமிட்டிருந்தார். மணிப்பூரில் அமைதி திரும்ப பல்வேறு நடவடிக்கைகளை மத்திய அரசு சார்பாக அமித்ஷா மேற்கொண்டிருந்தார். மேலும் அமைதி குழு ஒன்றும் அமைக்கப்பட்டிருந்தது. ஆனாலும் மணிப்பூரில் வன்முறைகள் தொடர்ந்து நீடித்து வருகின்றன.

மணிப்பூர் வன்முறைகளை மத்திய அரசு கட்டுப்படுத்தவில்லை; மணிப்பூர் வன்முறை தொடர்பாக பிரதமர் மோடி நாடாளுமன்றத்தில் விளக்கம் தர வேண்டும் என்பதை எதிர்க்கட்சிகள் தொடர்ந்து வலியுறுத்துகின்றன. இதனால் நாடாளுமன்ற மழைக்காலக் கூட்டத் தொடரில் 2 சபைகளையும் எதிர்க்கட்சிகள் தொடர்ந்து முடக்கி வருகின்றன.

இதன் அடுத்த கட்டமாக டெல்லி நாடாளுமன்ற வளாகத்தில் மகாத்மா காந்தி சிலை முன்பாக 26 எதிர்க்கட்சிகளின் இந்தியா கூட்டணி சார்பாக அனைத்து எம்பிக்களும் இன்று கண்டன போராட்டம் நடத்தினர். லோக்சபா தேர்தலுக்கு 26 எதிர்க்கட்சிகளை உள்ளடக்கிய புதிய கூட்டணி உருவாக்கப்பட்டுள்ளது. இந்த கூட்டணிக்கு INDIA என பெங்களூரு ஆலோசனைக் கூட்டத்தில் பெயரிடப்பட்டது. இந்தியா கூட்டணி எம்பிக்கள் சார்பாக இன்று நாடாளுமன்ற வளாகத்தில் முதலாவது போராட்டம் நடத்தப்பட்டது. இப்போராட்டத்தின் போது மணிப்பூர் படுகொலைகளுக்கு கண்டனம் தெரிவிக்கப்பட்டது. மேலும் பிரதமர் மோடி அறிக்கை தாக்கல் செய்ய வேண்டும் எனவும் வலியுறுத்தி முழக்கங்கள் எழுப்பப்பட்டன.

English summary

26 Opposition paties India alliance MPs will hold protest in Parliament complex today to demand for PM's statement on Manipur.