22 மாநிலங்களில் ஆட்சியை கலைக்க பாஜக முடிவு! முன்கூட்டியே திட்டமிடப்படும் ஒரே நாடு ஒரே தேர்தல்!
டெல்லி: நாடு முழுவதும் உள்ள மக்களவை மற்றும் மாநில சட்டசபைகளுக்கு ஒரே நேரத்தில் தேர்தல் நடத்தும் 'ஒரே நாடு, ஒரே தேர்தல்' திட்டத்தை அமல்படுத்துவது குறித்து நாடாளுமன்ற கூட்டுக் குழு பல்வேறு தரப்பினருடன் தீவிர ஆலோசனைகளை மேற்கொண்டு வருகிறது.
தற்போதுள்ள வரைவு மசோதாவின்படி 2034-ஆம் ஆண்டில்தான் இந்த நடைமுறை சாத்தியமாகும் எனக் கூறப்பட்டு வந்த நிலையில், பாரதிய ஜனதா கட்சி தலைமையிலான தேசிய ஜனநாயகக் கூட்டணி ஆட்சி செய்யும் 22 மாநிலங்கள் மற்றும் யூனியன் பிரதேசங்களில், இந்த நடைமுறையை 2029 மக்களவைத் தேர்தலிலேயே முன்கூட்டியே அமல்படுத்த தீவிர ஆலோசனைகள் நடைபெற்று வருகின்றன.
இதற்காக அந்தந்த மாநில சட்டசபைகளை அவற்றின் பதவிக்காலம் முடிவதற்கு முன்பாகவே முன்கூட்டியே கலைக்க என்.டி.ஏ திட்டமிட்டு வருவதாக தகவல்கள் வெளியாகியுள்ளன.
2029-ல் சாத்தியமா? என்.டி.ஏ-வின் வியூகம்
தேசிய ஜனநாயகக் கூட்டணி வசமுள்ள 22 மாநிலங்கள் மற்றும் யூனியன் பிரதேசங்களில், 11 மாநிலங்களின் சட்டசபை தேர்தல் அடுத்த இரண்டு ஆண்டுகளுக்குள், அதாவது 2029 மக்களவைத் தேர்தலுக்கு முன்பாகவே வரவுள்ளன. மேலும், ஆந்திரப் பிரதேசம், அருணாச்சலப் பிரதேசம், சிக்கிம் மற்றும் ஒடிசா ஆகிய 4 மாநிலங்கள் ஏற்கனவே மக்களவைத் தேர்தலுடன் சேர்ந்தே சட்டசபைத் தேர்தலை எதிர்கொள்கின்றன.
அடுத்த இரண்டு ஆண்டுகளில் நடைபெறவுள்ள தேர்தல்களிலும் என்.டி.ஏ ஆட்சி அமைக்கும் பட்சத்தில், 2029 ஜனவரி மாதத்திற்குள் சம்பந்தப்பட்ட 22 மாநில அரசுகளின் அமைச்சரவை பரிந்துரையின் பேரில், ஆளுநர்கள் மூலம் சட்டசபைகள் கலைக்கப்படலாம் என்று இந்த விவகாரத்தை நன்கு அறிந்த வட்டாரங்கள் தெரிவிக்கின்றன.
இந்திய அரசியலமைப்புச் சட்டத்தின் 174 (2)(b) பிரிவு, அமைச்சரவையின் பரிந்துரையின் பேரில் சட்டசபையைக் கலைக்கும் அதிகாரத்தை மாநில ஆளுநர்களுக்கு வழங்குகிறது என்பது குறிப்பிடத்தக்கது.
மசோதா கூறுவது என்ன?
2024 டிசம்பரில் அமைக்கப்பட்ட நாடாளுமன்ற கூட்டுக் குழு, அரசியலமைப்பு (129-வது திருத்தம்) மசோதா 2024 மற்றும் யூனியன் பிரதேசங்கள் சட்டத் திருத்த மசோதா 2024 ஆகியவற்றை ஆய்வு செய்து வருகிறது. இந்த மசோதாக்களின்படி, 2029 பொதுத்தேர்தலுக்குப் பின் அமையும் முதல் மக்களவைக் கூட்டத்தொடருக்குப் பிறகு தேர்ந்தெடுக்கப்படும் சட்டசபைகளின் பதவிக்காலம் குறைக்கப்பட்டு, அடுத்த தேர்தல் சுழற்சியில், அதாவது 2034-ல் அனைத்துத் தேர்தல்களும் ஒருங்கிணைக்கப்படும்.
எனினும், திட்டமிட்டதற்கு முன்னதாகவே 2029-ல் தேர்தலை நடத்த முடியுமா என்று ஆலோசனைகளை தற்போது பாஜக செய்து வருகிறது.
மாநில முதலமைச்சர்களின் ஆதரவு
நாடாளுமன்றக் குழுவைச் சந்தித்த பிறகு, கோவா, உத்தரகாண்ட், அரியானா மற்றும் டெல்லி உள்ளிட்ட பாஜக ஆளும் மாநிலங்களின் முதல்வர்கள் இந்தத் திட்டத்திற்கு முழு ஆதரவு தெரிவித்துள்ளனர். டெல்லி முதலமைச்சர் ரேகா குப்தா ஆலோசனைக் கூட்டத்தில் பேசுகையில், "தேசிய அளவில் தேர்தல் அட்டவணையை ஒருங்கிணைக்க டெல்லி சட்டசபையின் பதவிக்காலத்தை முன்கூட்டியே குறைக்க வேண்டிய நிலை ஏற்பட்டால், தேச நலன் கருதி டெல்லி அரசு முழு ஒத்துழைப்பு வழங்கும்" என்று தெரிவித்துள்ளார். இதன் மூலம் டெல்லி சட்டசபையின் பதவிக்காலம் ஓராண்டு குறைய வாய்ப்புள்ளது.
இந்த முடிவு நடைமுறைக்கு வந்தால், 2027 மற்றும் 2028-ல் தேர்தலை சந்திக்கவுள்ள கோவா, குஜராத், மணிப்பூர், உத்தரப் பிரதேசம், உத்தரகாண்ட் ஆகிய மாநிலங்களின் சட்டசபை ஆயுட்காலம் 3 ஆண்டுகளும்; சத்தீஸ்கர், மத்தியப் பிரதேசம், மேகாலயா, நாகாலாந்து, ராஜஸ்தான், திரிபுரா ஆகிய மாநிலங்களின் பதவிக்காலம் 4 ஆண்டுகளும் குறைக்கப்படலாம்.
எதிர்க்கட்சிகளின் கடும் எதிர்ப்பு
மறுபுறம், பஞ்சாப் (2027), இமாச்சலப் பிரதேசம், கர்நாடகா, மிசோரம், தெலங்கானா (2028) போன்ற எதிர்க்கட்சிகள் ஆளும் மாநிலங்களில் சட்டசபைத் தேர்தல்கள் முடிந்த சில மாதங்களிலேயே 2029 மக்களவைத் தேர்தல் வரும் சூழல் உள்ளது. இதனால் இந்தத் திட்டம் என்.டி.ஏ கூட்டணிக்கும் எதிர்க்கட்சிகளுக்கும் இடையிலான அரசியல் மோதலை மேலும் தீவிரப்படுத்தியுள்ளது.
Click it and Unblock the Notifications
Sign in with Google
