ஆட்சியை பறிகொடுத்த ஆம் ஆத்மி.. தனது வெற்றியை டான்ஸ் ஆடி கொண்டாடிய முதல்வர் அதிஷி!

டெல்லி: ஆம் ஆத்மி கட்சி டெல்லியில் ஆட்சியைப் பற்கொடுத்த நிலையிலும், கல்கஜி சட்டப்பேரவைத் தொகுதியில் வெற்றி பெற்ற டெல்லி முதலமைச்சர் அதிஷி, தனது ஆதரவாளர்களுடன் இணைந்து மகிழ்ச்சியாக நடனம் ஆடினார்.

டெல்லி சட்டப்பேரவைத் தேர்தலில் முன்னாள் முதலமைச்சர் அரவிந்த் கெஜ்ரிவால், மணீஷ் சிசோடியா உள்ளிட்ட ஆம் ஆத்மி கட்சியின் ஸ்டார் வேட்பாளர்கள் தோல்வியை தழுவியுள்ளனர். ஆட்சியை பிடிக்க 36 இடங்கள் தேவை என்றி நிலையில் 49 தொகுதிகளில் பா.ஜ.க வெற்றி பெற்றுள்ளது. ஆம் ஆத்மி 22 தொகுதிகளில் வென்றுள்ளது. காங்கிரஸ் கட்சி தாங்கள் போட்டியிட்ட ஒரு தொகுதியில் கூட வெற்றி பெறவில்லை.

தனிப் பெரும்பான்மையுடன் 27 ஆண்டுகளுக்கு பிறகு டெல்லியில் பாஜக ஆட்சியை பிடிக்கிறது. பாஜகவின் வெற்றியை அக்கட்சியினர் கொண்டாடி வருகின்றனர். பாஜக தலைமை அலுவலகத்தில் இன்று வெற்றிக் கொண்டாட்டம் நடைபெற்றது. இதில் பிரதமர் மோடி, பாஜக தேசிய தலைவர் ஜேபி நட்டா உள்ளிட்ட தலைவர்கள் பங்கேற்றனர்.

கெஜ்ரிவால் தோல்வி - அதிஷி வெற்றி

டெல்லி சட்டசபை தேர்தலில் கல்கஜி தொகுதியில், டெல்லி முதல்வரான ஆம் ஆத்மி கட்சியின் அதிஷி போட்டியிட்டார். அவரை எதிர்த்து பாஜகவின் ரமேஷ் பிதூரி போட்டியிட்டார். கல்கஜி தொகுதியில் பதிவான வாக்குகள் 12 சுற்றுகளாக எண்ணப்பட்டன. பாஜகவின் ரமேஷ்தான் ஆரம்பம் முதலே முன்னிலை வகித்து வந்தார். அதிஷிக்கு வெற்றி வாய்ப்பு இல்லை என ஆம் ஆத்மி கட்சியினரே சோர்ந்து போயினர்.

இந்நிலையில், 7வது ரவுண்டில் திடீரென லீட் எடுத்து, பாஜக வேட்பாளர் ரமேஷை ஓவர் டேக் செய்தார் அதிஷி. அதன்பின் இறுதி வரை முன்னிலையில் இருந்த அவர், 3,521 ஓட்டுகள் வித்தியாசத்தில் வெற்றி பெற்றார். ஆம் ஆத்மி கட்சியின் ஒருங்கிணைப்பாளர் அரவிந்த் கெஜ்ரிவால், முன்னாள் துணை முதலமைச்சர் மனீஷ் சிசோடியா உட்பட பெருந்தலைகளே தேர்தலில் தோல்வி அடைந்த நிலையில் அதிஷி வெற்றி பெற்றுள்ளார்.

ஆட்சியை இழந்த ஆம் ஆத்மி

புதுடெல்லி தொகுதியில் 3 ஆயிரம் வாக்குகள் வித்தியாசத்தில் அரவிந்த் கெஜ்ரிவால் தோல்வி அடைந்துள்ளார். 3 முறை டெல்லி முதலமைச்சராக இருந்த அரவிந்த் கெஜ்ரிவால் புதுடெல்லி தொகுதியில் படுதோல்வி அடைந்துள்ளார். 2013, 2015, 2020 சட்டமன்ற தேர்தலில் போட்டியிட்டு பெரும்பான்மையான வாக்குகள் வித்தியாசத்தில் வென்ற அரவிந்த் கெஜ்ரிவால் இந்த முறை முன்னாள் முதல்வர் சாஹிப் சிங் வர்மாவின் மகனான பாஜக வேட்பாளர் பர்வேஷ் வர்மாவிடம் தோல்வி அடைந்துள்ளார்.

கெஜ்ரிவால் தோல்வியோடு, ஆம் ஆத்மி கட்சி, டெல்லியில் ஆட்சியைப் பறிகொடுத்துள்ளது அக்கட்சியினரை சோகத்தில் ஆழ்த்தியுள்ளது. இந்த தேர்தல் முடிவுகள் பற்றி கூறிய அதிஷி, "டெல்லி தேர்தலில் ஆம் ஆத்மி தோற்றது பெரும் பின்னடைவுதான். மக்களின் ஆணையை ஏற்றுக்கொள்கிறோம்" எனத் தெரிவித்தார்.

அதிஷி உற்சாக நடனம்

இந்நிலையில், கல்கஜி சட்டப்பேரவைத் தொகுதியில் வெற்றி பெற்ற முதலமைச்சர் அதிஷி, தனது ஆதரவாளர்களுடன் இணைந்து மகிழ்ச்சியாக நடனம் ஆடினார். வெற்றிக் கொண்டாட்டத்தில் கட்சியினருடன் இணைந்து சிரித்தபடி பாடலுக்கு நடனம் ஆடினார் அதிஷி. ஆம் ஆத்மி கட்சி, ஆட்சியைப் பறிகொடுத்துள்ள நிலையில், பதவியில் இருந்து வெளியேறும் முதல்வர் அதிஷி நடனம் ஆடிய வீடியோ சமூக வலைதளங்களில் பரவி வருகிறது.

English summary

Aam Aadmi Party winning candidate from Kalkaji and outgoing CM Atishi dances and celebrates her victory with the supporters and party workers.