இந்திய கப்பல்களுக்கு அனுமதி? ஈரான் அதிபருக்கு போன் போட்ட மோடி! பிரச்சனை தீருமா!

Updated: Friday, March 13, 2026, 7:05 [IST]

Subscribe to Oneindia Tamil

டெல்லி: ஈரான் ஹர்முஸ் நீரிணையை தனது கட்டுப்பாட்டுக்குள் கொண்டு வந்திருக்கிறது. அந்த வழியாக கப்பல்கள் வந்தால்தான் இந்தியாவில் எரிபொருள் பிரச்சனை இருக்காது. இந்நிலையில், பிரதமர் நரேந்திர மோடி ஈரான் அதிபர் மசூத் பெசெக்ஷியானுடன் தொலைபேசி வாயிலாக பேசியிருக்கிறார்

இந்த உரையாடலில் இந்தியர்களின் பாதுகாப்பு உள்ளிட்ட விஷயங்கள் குறித்து பேசப்பட்டிருக்கிறது. இருப்பினும் ஹர்முஸ் நீரிணை வழியாக இந்திய கப்பல்கள் வருமா? என்பது குறித்து தெரியவில்லை.

ஈரான் அதிபருடன் பேச்சு

இந்த உரையாடலில், ஈரானில் தீவிரமடைந்து வரும் மோதல்கள் மற்றும் பொதுமக்களின் உயிரிழப்புகள் குறித்து மோடி தனது ஆழ்ந்த கவலையை வெளிப்படுத்தினார். மேலும், இந்திய குடிமக்களின் பாதுகாப்பு மற்றும் நலன், அத்துடன் பொருட்கள் மற்றும் எரிசக்தியின் தடையற்ற போக்குவரத்து ஆகியவை இந்தியாவின் மிக முக்கியமானவை என்று பிரதமர் மோடி வலியுறுத்தினார். போர் தொடங்கிய பிறகு இரு நாட்டு தலைவர்களுக்குமிடையே நடந்த முதல் நேரடித் தொடர்பு இதுவாகும்.

என்ன பேசினார் மோடி

இது குறித்து மோடி தனது x பக்கத்தில் பதிவிட்டிருப்பதாவது, "பிராந்தியத்தில் நிலவும் கடினமான சூழல் குறித்து ஈரானிய அதிபர் டாக்டர் மசூத் பெசெஷ்கியானுடன் பேசினேன். பதற்றங்கள் அதிகரித்து வருவது, பொதுமக்கள் உயிரிழப்புகள் மற்றும் பொதுமக்கள் கட்டமைப்புகளுக்கு ஏற்பட்ட சேதம் குறித்து தனது ஆழ்ந்த கவலையைத் தெரிவித்தேன்.

இந்தியர்களின் நலன்

இந்திய குடிமக்களின் பாதுகாப்பு மற்றும் நலன், அத்துடன் பொருட்கள் மற்றும் எரிசக்தியின் தடையற்ற போக்குவரத்து ஆகியவை இந்தியாவின் முக்கிய முன்னுரிமைகளாகும். அமைதி மற்றும் நிலைத்தன்மைக்கான இந்தியாவின் உறுதியான நிலைப்பாட்டை மீண்டும் வலியுறுத்தி, பேச்சுவார்த்தை மற்றும் ராஜதந்திர அணுகுமுறைக்கு அழைப்பு விடுத்தேன்." என்று குறிப்பிட்டிருக்கிறார்.

வளைகுடா நாடுகளில் பதற்றம்

மேற்கு ஆசியாவில் பதற்றங்களைக் குறைத்து, அமைதியைக் கொண்டு வர பேச்சுவார்த்தை மற்றும் ராஜதந்திர அணுகுமுறையின் அவசியத்தை இந்தியத் தலைமை தொடர்ந்து வலியுறுத்தி வருகிறது. இப்பிராந்தியத்தில் பதற்றங்கள் தீவிரமடைந்து வரும் நிலையில், குறிப்பாக வளைகுடா நாடுகள் மீது ஈரான் தாக்குதல்கள் நடத்தியிருக்கும் சூழ்நிலையில், அங்கு கணிசமான எண்ணிக்கையிலான இந்தியர்கள் வாழ்ந்து வருகின்றனர்.

வளைகுடா நாடுகள் மற்றும் ஜோர்டான் மீது ஈரான் நடத்திய தாக்குதல்களைக் கண்டித்து ஐ.நா. பாதுகாப்பு கவுன்சிலில் கொண்டுவரப்பட்ட தீர்மானத்திற்கு இந்தியா ஆதரவு அளித்த சில நாட்களுக்குப் பிறகு, அதிபர் பெசெஷ்கியானுடன் பிரதமர் மோடி இந்த உரையாடலை நடத்தினார்.

ஐநா தீர்மானத்திற்கு இந்தியா ஆதரவு

அந்த ஐ.நா. தீர்மானம், ஈரான் நடத்திய தீவிரமான தாக்குதல்களை கடுமையாக கண்டித்தது. மேலும், தெஹ்ரான் உடனடியாக அனைத்து தாக்குதல்களையும் நிறுத்த வேண்டும் என்று அது வலியுறுத்தியது. உலகளாவிய எரிசக்தி விநியோகத்தைப் பாதித்து, எண்ணெய் மற்றும் எரிவாயு விலைகளை உயர்த்தக் கூடிய ஹோர்முஸ் நீரிணையை மூடுவதற்கான அச்சுறுத்தல்களையும் அந்தத் தீர்மானம் கடுமையாகச் சாடியது.

இந்திய எண்ணெய் கப்பல்கள்

ஆனால், இரு நாடுகளுக்கும் இடையேயான ராஜதந்திர ரீதியிலான பேச்சுவார்த்தைகளுக்குப் பிறகு, இந்தியக் கொடியுடன் கூடிய கப்பல்களை ஹோர்முஸ் நீரிணை வழியாகச் செல்ல ஈரான் அனுமதித்ததாக தகவல்கள் தெரிவிக்கின்றன. இதன் மூலம் கச்சா எண்ணெய் மற்றும் இயற்கை எரிவாயு சரக்குகளின் பாதுகாப்பான போக்குவரத்தை உறுதி செய்ய புதுடெல்லி முயற்சித்தது. மோதலுக்கு மத்தியில், புஷ்பக் மற்றும் பரிமள் என்ற இந்தியக் கொடியிட்ட டேங்கர்கள் பாதுகாப்பாகச் சென்றதாகத் தகவலறிந்த வட்டாரங்கள் உறுதிப்படுத்தின.