நக்கல்ணா உனக்கு.. பேட்டியளித்த மத்திய அமைச்சர்களின் பின்னால் போய் ராகுல் செய்த செயல்! வைரல் வீடியோ

டெல்லி: நாடாளுமன்ற வளாகத்தில் இன்று மத்திய அமைச்சர்கள் பிரகலாத் ஜோஷி மற்றும் அஸ்வினி வைஷ்ணவ் ஆகியோர் பத்திரிகையாளர்களை சந்தித்தனர். அப்போது அவர்களுக்கு பின்னால் சென்று ராகுல் காந்தி செய்த செயல் தொடர்பான வீடியோ தற்போது இணையதளங்களில் வெளியாகி அதிக கவனம் பெற்றுள்ளது.

நாடாளுமன்ற பட்ஜெட் கூட்டத்தொடர் கடந்த மாதம் 28 ம் தேதி தொடங்கியது. ஆண்டின் முதல் கூட்டத்தொடர் என்பதால் ஜனாதிபதி திரெளபதி முர்மு நாடாளுமன்ற கூட்டுக்குழுவில் உரையாற்றினர். அதன்பிறகு மத்திய பட்ஜெட் கடந்த 1ம் தேதி தாக்கல் செய்யப்பட்டது.

இதையடுத்து ஜனாதிபதி உரைக்கு நன்றி தெரிவிக்கும் தீர்மானத்தின் மீது விவாதம் நடந்தது. தற்போது பட்ஜெட் மீதான விவாதம் தொடங்கி நடந்து வருகிறது. இன்றும் லோக்சபாவில் பட்ஜெட் மீதான விவாதத்தில் ஆளும் கட்சி, எதிர்க்கட்சி எம்பிக்கள் பங்கேற்று பேசினர்.

மத்திய அமைச்சர்கள் பேட்டி

இன்று நாடாளுமன்ற சபை நடவடிக்கை முடிவடைந்தது. அதன்பிறகு நாடாளுமன்ற வளாகத்தில் மத்திய உணவு மற்றும் நுகர்வோர் விவகாரத்துறை அமைச்சர் பிரகலாத் ஜோஷி மற்றும் ரயில்வே மற்றும் தகவல் தொழில்நுட்பத்துறை அமைச்சர் அஸ்வினி வைஷ்ணவ் ஆகியோர் பத்திரிகையாளர்களை சந்தித்தனர்.

பின்னால் வந்த ராகுல் காந்தி

இந்த வேளையில் ராகுல் காந்தி அங்கு நடந்து வந்தார். மத்திய அமைச்சர்கள் இருவரும் பேட்டியளித்து கொண்டிருந்தபோது அவர்களுக்கு பின்னால் ராகுல் காந்தி வந்தார். பத்திரிகையாளர்களை ராகுல் காந்தி நெருங்கியதும் மத்திய அமைச்சர்கள் விலகி சென்றனர்.

ஜாலியாக சொன்ன வார்த்தை

இதையடுத்து ராகுல் காந்தி ஜாலியாக, ‛‛வாருங்கள்.. நாம் அனைவரும் ஒன்றாக நிற்போம். ஒன்றாக பேட்டிக்கொடுப்போம்'' என்று கூறினார். ஆனால், அவர்கள் விலகி சென்றனர். இந்த வேளையில், ராகுல் காந்தி, மத்திய அமைச்சர் பிரகலாத் ஜோஷியின் கையை பிடித்து இழுத்தார்.

ஆனால் பிரகலாத் ஜோஷி, ராகுல் காந்தியை விட்டு விலகி சென்றார். இதனை அங்கிருந்த பிரியங்கா காந்தி சிரித்தபடி பார்த்து கொண்டிருந்தார். இதுதொடர்பான வீடியோ தற்போது இணையதளங்களில் வெளியாகி வேகமாக பரவி வருகிறது.

#WATCH | "Come, let's stand together. Let's do it together,' says LoP, Lok Sabha, Rahul Gandhi, to Union Ministers Pralhad Joshi and Ashwini Vaishnaw as he approaches the media stand in Parliament premises, where the Union Ministers were already present. pic.twitter.com/susfZ9ZeeW

— ANI (@ANI) February 11, 2026

நெட்டிசன்கள் கருத்து

இந்த வீடியோவுக்கு தற்போது கலவையான கருத்துகளை நெட்டிசன்கள் தெரிவித்து வருகின்றனர். ஒரு தரப்பினர், ‛‛ராகுல் காந்தியின் இந்த நகைச்சுவையை யாரும் எதிர்பார்த்து இருக்கமாட்டார்கள்’’ என்று கூறி வருகின்றனர்.

அதேவேளையில் இன்னொரு தரப்போ, ‛‛மத்திய அமைச்சர்கள் பேட்டியளிக்கும்போது எப்படி நடந்து கொள்ள வேண்டும் என்பது கூட ராகுல் காந்திக்கு தெரியவில்லை. பள்ளி மாணவன் போல் டிஸ்டர்ப் செய்துள்ளார்’’ என்று விமர்சனம் செய்துள்ளனர். இப்படியாக இந்த வீடியோ டிரெண்ட்டாகி வருகிறது.

English summary

Rahul Gandhi in Parliament Campus: "Come, let's stand together. Let's do it together,' says Loksabha Opposition Leader, Rahul Gandhi, to Union Ministers Pralhad Joshi and Ashwini Vaishnaw as he approaches the media stand in Parliament premises, where the Union Ministers were already present.