ஆர்எஸ்எஸ்-இடம் “சரண்டர்” ஆன பாஜக.. 3 மாநிலங்களின் புதிய முதலமைச்சர்கள்.. ஒரே தொடர்பு என்ன தெரியுமா?

டெல்லி: 3 மாநிலங்களில் முதலமைச்சர்களாக பாஜக அறிவித்து உள்ள 3 பேருக்கும் உள்ள ஒரே தொடர்பு ஆர்.எஸ்.எஸ். அமைப்பாக உள்ளது. இந்த மூன்று பேர் யார்? தீவிர ஆர்.எஸ்.எஸ். அபிமானிகளை முதலமைச்சராக பாஜக தேர்வு செய்ததன் பின்னணி என்ன என்று அலசுவோம்.

பாஜக வெற்றிபெற்ற 3 மாநிலங்களில் நீண்ட இழுபறிக்கு பிறகு முதலமைச்சர்கள் யார் என்று பாஜக தலைமை அறிவித்து உள்ளது. பஜன்லால் சர்மா ராஜஸ்தானின் முதலமைச்சராகவும், மோகன் யாதவ் மத்திய பிரதேசத்தின் முதலமைச்சராகவும், விஷ்ணு தேவ் சாய் சத்தீஸ்கரின் முதலமைச்சராகவும் தேர்வு செய்யப்பட்டு உள்ளனர். இவர்கள் 3 பேருமே முதலமைச்சர் ஆவார்கள் என்று அவர்களுக்கு கூட தெரிந்து இருக்காது. யாருமே இவர்களை பற்றி பேசவில்லை. ஸ்டார் வேட்பாளர்கள் பட்டியலில் கூட இல்லாமல் இருந்தனர்.

தற்போது 3 பேரும் முதல் முறை முதலமைச்சர்களாக அறிவிக்கப்பட உள்ளார்கள். இந்த அறிவிப்பின் மூலம் பாஜக தனது உறுப்பினர்கள் உட்பட அனைவரையும் ஆச்சரியத்தில் ஆழ்த்தி உள்ளது. இந்த முடிவு அரசியல் வட்டாரத்தில் நிலவிய கணிப்புகளையும் தகர்க்கும் வகையில் அமைந்து உள்ளது. விரைவில் மூவரும் முதல்முறையாக முதலமைச்சர்களாக பொறுப்பேற்கவுள்ளனர். இவர்களில் சத்தீஸ்கர் முதலமைச்சர் பழங்குடியின சமூகத்தைச் சேர்ந்தவர், மத்திய பிரதேச முதலமைச்சர் பிற்படுத்தப்பட்ட வகுப்பைச் (OBC) சேர்ந்தவர், ராஜஸ்தான் முதலமைச்சர் பிராமண சமூகத்தை சேர்ந்தவர். வெவ்வேறு மாநிலங்கள், வெவ்வேறு சாதிகளை சேர்ந்தவர்களாக இருந்தாலும் இவர்கள் மூவருக்கும் ஒரு பொதுவான ஒற்றுமை உள்ளது.

அது பாஜக என்று மட்டும் நினைத்துவிடார்கள். அதையும் தாண்டி பாஜகவின் சித்தாந்த அமைப்பான ராஷ்ட்ரிய சுயம்சேவக் (ஆர்.எஸ்.எஸ்) இயக்கத்தால் வளர்க்கப்பட்டவர்கள் இவர்கள். மத்திய பிரதேச முதலமைச்சர் மோகன் யாதவ் ஆர்.எஸ்.எஸ். அமைப்பின் மாணவர் அமைப்பான அகில பாரதிய வித்யார்த்தி பரிஷத் எனப்படும் ஏபிவிபி அமைப்பை சேர்ந்தவராவார். மோகன் யாதவ் மத்திய பிரதேச மாநிலத்தின் முதலமைச்சராக நியமிக்கப்பட்டதை அடுத்து, ஆர்.எஸ்.எஸ்.-ன் மூத்த நிர்வாகிகள் மற்றும் மாநிலத்திலுள்ள அமைப்பின் தொடர்கள் இதனை வரவேற்று கொண்டாடினர். மோகன் யாதவ் ஏபிவிபியின் தேசிய செயலாளராக தனது அரசியல் வாழ்க்கையைத் தொடங்கியவர்.

அதேபோன்று சத்தீஸ்கர் மாநிலத்தின் முதலமைச்சர் விஷ்ணு தேவ் சாய்க்கும் ஆர்.எஸ்.எஸ். அமைப்பிற்கும் நெருங்கிய தொடர்பு உள்ளது.. அவர் சத்தீஸ்கரின் முதலமைச்சராக தேர்வு செய்யப்பட்ட பிறகு, அம்மாநில ஆர்.எஸ்.எஸ். தலைமையகத்திற்கு சென்றார். ஆர்.எஸ்.எஸ். மீதான அவரது கருத்தியல் ஈடுபாடு மிகவும் தீவிரமானது என்று அம்மாநில மக்கள் கூறுகிறார்கள். சத்தீஸ்கரில் ஆர்.எஸ்.எஸ். அமைப்பின் அங்கமாகவே சாய் பார்க்கப்படுகிறது.

சாய் கிறிஸ்துவ மதத்திற்கு மாறிய தனது பழங்குடியின மக்களை மீண்டும் இந்து மதத்திற்கு மாற்றும் கர் வாப்ஸி திட்டத்தை கையில் எடுத்து ஆர்.எஸ்.எஸ். மற்றும் பாஜக தலைமையின் நம்பிக்கையை பெற்றவர். மதமாற்றத்தைத் தடுக்க, சத்தீஸ்கரில் மதமாற்ற தடை சட்டத்தையும் ஆர்.எஸ்.எஸ். ஆதரித்தது. ஆனால் பாஜகவை சேர்ந்த முன்னாள் முதலமைச்சர் ராமன் சிங் அரசு வளர்ச்சியை மட்டுமே தேர்தல் உத்தியாகக் கருதி அந்த சட்டத்திற்கு எதிர்ப்பு தெரிவித்தது. எனவே அவர் இம்முறை ஓரம்கட்டப்பட்டு உள்ளார்.

அதேபோன்று ராஜஸ்தான் முதலமைச்சராக அறிவிக்கப்பட்டு உள்ள முதல் முறை எம்.எல்.ஏவான பஜன்லால் சர்மாவுக்கும் ஆர்.எஸ்.எஸ் அமைப்புடன் வலுவான தொடர்பு உள்ளது. அவர் ராஜஸ்தான் மாநிலத்தில் ஏவிபிவியின் முக்கிய தலைவராக இருந்தவர். அதன் மூலம் கிடைத்த பிரபல்யத்தால் பாஜகவில் எம்.எல்.ஏ. சீட் அவருக்கு கிடைத்தது. ஓபிஎஸிக்கு எதிரான கட்சி பாஜக என்ற ராகுல் காந்தியின் பிரச்சாரத்தை முறியடிக்க ஆர்.எஸ்.எஸ். கொள்கைவாதியான யாதவை முதலமைச்சராக்க வேண்டும் என ஆர்.எஸ்.எஸ். சொன்னதை கேட்டு தட்டாமல் அதை செய்திருக்கிறது பாஜக.

கடந்த சில ஆண்டுகளாக பிரதமர் மோடி, அமித்ஷாவுக்கும் ஆர்.எஸ்.எஸ். அமைப்புக்கும் இடையே லேசான உரசல்கள் இருப்பதாக கூறப்பட்டு வந்த நிலையில், 2024 மக்களவைத் தேர்தலில் வெற்றிபெறும் முனைப்புடன் செயலாற்றி வரும் பாஜக தலைமை, 3 மாநில தேர்தல்களில் ஆர்.எஸ்.எஸ். அமைப்பிடம் சரணாகதி அடைந்துவிட்டதாக கூறப்படுகிறது.

English summary

RSS is the only connection between the 3 persons announced by BJP as Chief Ministers of 3 states. is the system. Who are these three people? Let us analyze the background of BJP choosing RSS cadres as Chief Minister.