சவுதி இளவரசர் - பிரதமர் மோடி சந்திப்பில் கையெழுத்தான 8 முக்கிய ஒப்பந்தங்கள்.. முழு விவரம்!

டெல்லி: ஜி 20 மாநாட்டில் பங்கேற்க இந்தியா வந்த சவுதி அரேபிய பட்டத்து இளவரசர் இன்று பிரதமர் மோடியை சந்தித்து பேசினார். இந்த சந்திப்பின் போது இரு நாடுகளுக்கும் இடையே எரிசக்தி துறை உள்பட 8 முக்கிய ஒப்பந்தங்கள் கையெழுத்தாகின.

இந்தியாவில் கடந்த 9 மற்றும் 10 ஆம் தேதிகளில் ஜி 20 உச்சி மாநாடு நடைபெற்றது. இந்த மாநாட்டில் ஜி 20 நாடுகளில் அங்கம் வகிக்கும் உறுப்பு நாடுகளின் தலைவர்கள் பங்கேற்றனர். கூட்டம் முடிந்த பிறகு தங்கள் நாட்டிற்கு திரும்பி சென்றனர். அமெரிக்க அதிபர் ஜோ பைடன் வியட்நாம் புறப்பட்டு சென்றார். அதேவேளையில் ஜி 20 மாநாட்டில் பங்கேற்ற சவுதி அரேபிய பட்டத்து இளவரசர் முகம்மது பின் சல்மான், இந்தியாவிலேயே தங்கினார்.

இன்று காலை பிரதமர் மோடியை முகம்மது பின் சல்மான் சந்தித்தார். இந்த சந்திப்பின் போது இரு தரப்பு விவகாரங்கள் உள்பட பல்வேறு முக்கிய விவகாரங்கள் குறித்து ஆலோசிக்கப்பட்டது. இந்த சந்திப்பு குறித்து பிரதமர் மோடி தனது எக்ஸ் தளத்தில் வெளியிட்டுள்ள பதிவில் கூறியிருப்பதாவது:- சவுதி இளவரசர் முகம்மது பின் சல்மானை சந்தித்து பேசினேன். மிகவும் பயனுள்ள பேச்சுவார்த்தையாக இருந்தது.

வரும் காலங்களில் இரு நாடுகளுக்கு இடையேயுமான வர்த்தக தொடர்புகள் மேலும் அதிகரிக்கும் என நம்புகிறோம். நமது வர்த்தக உறவுகளை ஆய்வு செய்தோம். கிரிட் கனெக்ட்டிவிட்டி, புதுப்பிக்கத்தக்க எரிசக்தி, உணவு பாதுகாப்பு, செமி கண்டக்டர்ஸ் மற்றும் விநியோக சங்கிலி ஆகியவற்றில் இருநாடுகளுக்கு இடையேயான ஒத்துழைப்பு மகத்தானதாக இருக்க வாய்ப்புள்ளது" என்றார்.

இந்தியா - சவுதி அரேபியா இடையே எரிசக்தி துறை உள்ளிட்ட பல்வேறு முக்கிய துறைகளில் 8 முக்கிய ஒப்பந்தங்கள் கையெழுத்தாகின. இது தொடர்பாக வெளியுறவுத்துறை செய்தி தொடர்பாளர் கூறுகையில், "சவுதி அரேபியாவும் இந்தியாவும் எரிசக்தி துறையில் ஒத்துழைப்பை மேலும் மேம்படுத்தியுள்ளது. புதுப்பிக்கத்தக்க எரிசக்தி, எரிக்சதி செயல் திறன், ஹைட்ரஜன் எலட்ரிசிட்டி, மற்றும் பெட்ரோலிய இருப்புகளில் முதலீடுகள், ஆகியவற்றை உள்ளடக்கியது.

இந்தக் கூட்டத்தில் பொருளாதர வழித்தடம் தொடர்பாகவும் ஆலோசிக்கப்பட்டது" என்றார். சவுதி அரேபிய பட்டத்து இளவரசர் முகம்மது பின் சல்மான் - பிரதமர் மோடி இடையேயான சந்திப்பு இருநாடுகளுக்கும் இடையேயான உறவை புதிய அத்தியாத்தித்திற்கு எடுத்து செல்லும் என்றும் மத்திய அரசு வட்டாரங்கள் கூறுகின்றன.

English summary

The Crown Prince of Saudi Arabia, who came to India to participate in the G20 conference, met Prime Minister Modi today. During this meeting, 8 important agreements were signed between the two countries, including in the energy sector.