மைக்கேல்பட்டி மாணவி மரணத்திற்கு.. மதமாற்றம் காரணம் இல்லை! உச்சநீதிமன்றத்தில் சிபிஐ திட்டவட்டம்

டெல்லி: கடந்த 2022ம் ஆண்டு தஞ்சாவூர் மைக்கேல்பட்டியில் 12ம் வகுப்பு மாணவி லாவண்யா, தற்கொலை செய்துகொண்டார். அவரது மரணத்திற்கு கட்டாய மத மாற்றம்தான் காரணம் என்று அப்போதைய பாஜக தலைவர் அண்ணாமலை உள்ளிட்டோர் குற்றம்சாட்டியிருந்தனர். இந்நிலையில் இன்று உச்சநீதிமன்றத்தில் இந்த வழக்கு தொடர்பாக சிபிஐ குற்றப்பத்திரிகை தாக்கல் செய்திருக்கிறது. அதில் மரணத்திற்கு கட்டாய மத மாற்றம் காரணம் கிடையாது என்று கூறியுள்ளது.

மாணவி எந்த ஒரு வீடியோவிலும் மத மாற்றம் தொடர்பாக ஒரு வார்த்தை கூட பேசவில்லை என்றும், பள்ளியில் படித்த வெளியேறிய முன்னாள் மாணவர்களின் சான்றிதழை ஆய்வு செய்ததில் எந்த மாணவர்களும் மதம் மாறவில்லை என்றும் சிபிஐ தனது குற்றப்பத்திரிகையில் தெரிவித்திருக்கிறது.

சிபிஐ தாக்கல் செய்த குற்றப்பத்திரிகையில், "மைக்கேல்பட்டி புனித இருதய மேல்நிலைப் பள்ளியின் கன்னியாஸ்திரிகள் மற்றும் ஆசிரியர்கள் செய்ததாக கூறப்படும் மதமாற்ற முயற்சி நிரூபிக்கப்படவில்லை" என தெரிவிக்கப்பட்டிருக்கிறது.

அதேசமயம், சிபிஐ விசாரணையில், விடுதி காப்பாளரான சகோதரி சகாய மேரி, அப்போது 12-ஆம் வகுப்பு படித்துக்கொண்டிருந்த மாணவியை தொடர்ந்து துன்புறுத்தியது தெரியவந்தது. இது அவளுக்கு கடுமையான மன உளைச்சலை ஏற்படுத்தி, இறுதியில் தற்கொலைக்குத் தூண்டியுள்ளது.

சிபிஐ தகவலின்படி, சகோதரி சகாய மேரி மாணவியை விடுதிக் கணக்கு வேலைகளைச் செய்ய வற்புறுத்தி, அவளது படிப்பைத் தடுத்தார். தொடர்ச்சியான துன்புறுத்தலால் மாணவி தற்கொலை செய்துகொண்டார். இதனால், இந்திய தண்டனைச் சட்டம் 305 மற்றும் சிறார் நீதிச் சட்டம் 75 பிரிவுகளின் கீழ் சகோதரி சகாய மேரி குற்றத்திற்குப் பொறுப்பு என சிபிஐ கூறியுள்ளது.

2022-ஆம் ஆண்டில், மாணவியின் மரணம் மதமாற்ற குற்றச்சாட்டுகளால் பெரிய அரசியல் சர்ச்சையை உருவாக்க, சென்னை உயர் நீதிமன்றம் வழக்கை சிபிஐ-க்கு மாற்றியது. மதமாற்ற முயற்சி சாத்தியமற்றது அல்ல என்றும், இக்கோணத்தை நிராகரித்த மாநில அரசை உயர் நீதிமன்றம் குறை கூறியது.

உயர் நீதிமன்ற உத்தரவுக்கு எதிராக தமிழக அரசு உச்ச நீதிமன்றத்தை நாடியது. மாநில அரசின் மேல்முறையீட்டை ஏற்ற உச்ச நீதிமன்றம், சிபிஐ விசாரணையை நிறுத்தவில்லை. 2025 நவம்பரில் உச்ச நீதிமன்ற உத்தரவை அடுத்து, ஜனவரி 20 அன்று பிரமாணப் பத்திரத்துடன் குற்றப்பத்திரிகையை தாக்கல் செய்தது. நீதிபதிகள் தீபங்கர் தத்தா மற்றும் சதீஷ் சந்திர சர்மா அடங்கிய அமர்வு இந்த வழக்கை நாளை விசாரிக்கும்.

English summary

Thanjavur Student Suicide Case: In 2022, Lavanya, a class 12 student in Michaelpatti, Thanjavur, committed suicide. The then BJP leader Annamalai and others had alleged that forced religious conversion was the reason for her death. In this situation, the CBI has filed a chargesheet in the Supreme Court today in this case. It has said that forced religious conversion was not the reason for the death.