உபி சம்பல்: மசூதியில் ஆய்வுக்கு எதிரான போலீசாருடனான வன்முறையில் 2 பேர் பலி- நீடிக்கும் பதற்றம்!

Updated: Sunday, November 24, 2024, 16:25 [IST]

Subscribe to Oneindia Tamil

டெல்லி: உத்தரப்பிரதேச மாநிலம் சம்பல் ஷாஜி ஜமா மசூதியை நீதிமன்ற உத்தரவுப்படி ஆய்வு செய்ய சென்ற அதிகாரிகளுக்கு எதிர்ப்பு தெரிவித்து நடைபெற்ற போராட்டம் வன்முறையாக வெடித்தது. மசூதி ஆய்வுக்கு எதிராக போராட்டக்காரர்களுக்கும் போலீசாருக்கும் இடையே வன்முறை வெடித்ததில் பொதுமக்கள் 2 பேர் உயிரிழந்துள்ளனர். இதனால் அப்பகுதியில் பெரும் பதற்றம் நீடிக்கிறது.

உ.பி. சம்பல் ஷாஜி ஜமா மசூதியானது இந்து கோவிலை இடித்துவிட்டு அந்த இடத்தில் கட்டப்பட்டது; இது தொடர்பாக ஆய்வு நடத்த வேண்டும் என்பது வழக்கு.இந்த வழக்கை விசாரித்த நீதிமன்றம், சம்பல் ஷாஜி ஜமா மசூதியை ஆய்வு செய்வதற்காக அதிகாரிகள் குழு ஒன்றை அமைத்தும் உத்தரவிட்டது. இந்த குழுவினர் கடந்த 19-ந் தேதி மசூதிக்குள் சென்று ஆய்வு நடத்தியது. அப்போது மசூதி நிர்வாகிகள் உடனிருந்தனர்.

இதனைத் தொடர்ந்து இன்று 2-வது நாளாக நீதிமன்ற உத்தரவின் அடிப்படையில் அரசு அதிகாரிகள் குழு ஒன்று சம்பல் ஷாஜி ஜமா மசூதியை ஆய்வு செய்ய சென்றது. அவர்களுக்கு பாதுகாப்பாக ஏராளமான போலீசாரும் அப்பகுதியில் குவிக்கப்பட்டிருந்தனர்.

ஆனால் 300-க்கும் மேற்பட்டோர் அப்பகுதியில் ஒன்று திரண்டு அரசு அதிகாரிகளின் ஆய்வுக்கு கடும் எதிர்ப்புத் தெரிவித்தனர். மேலும் அரசு அதிகாரிகள் மீது கற்களை வீசித் தாக்கினர்; அரசு அதிகாரிகள் வந்த வாகனங்கள், போலீசார் வாகனங்கள் தீ வைத்தும் எரிக்கப்பட்டன.

அப்போது போராட்டத்தில் ஈடுபட்டவர்களை போலீசார் கலைந்து போகச் செய்ய கண்ணீர் புகை குண்டுகளை வீசினர்; இதற்கு பதிலாக பொதுமக்கள் தரப்பில் இருந்து சரமாரியாக போலீசார் மீது கல்வீச்சுத் தாக்குதல் நடத்தப்பட்டது; டயர்கள் தீ வைத்து கொளுத்தப்பட்டு வீதிகளில் வீசி எறியப்பட்டன. அப்போது நிலைமையைக் கட்டுப்படுத்த போலீசார் துப்பாக்கிச் சூடும் நடத்தினர்.

இதனையடுத்து அரசு அதிகாரிகள் குழு மசூதிக்குள் சென்று நீதிமன்றத்தின் உத்தரவுப்படி ஆய்வு நடத்தியது. சம்பல் பகுதியில் நிகழ்ந்த இந்த வன்முறை சம்பவங்களில் 2 பேர் பலியாகி உள்ளனர். இதனால் அங்கு பெரும் பதற்றம் நிலவுகிறது.