காய்ச்சல் + Pain Killer மாத்திரை - சிரப்புக்கு தடை.. மத்திய அரசு அதிரடி.. பின்னணியில் ‛நிமெசுலைட்’
டெல்லி: 100 மில்லி கிராமுக்கு மேல் உள்ள ‛நிமெசுலைட்' எனும் ‛பெயின் கில்லர்' மாத்திரை, மருந்துக்கு இந்தியாவில் அதிரடியாக தடை விதிக்கப்பட்டுள்ளது. இதனை பயன்படுத்துவதன் மூலமாக உடல்நல பிரச்சனை வரும் என்பதால் மத்திய சுகாதாரத்துறை அமைச்சகம் அதிரடியாக தடை விதித்துள்ளது.
இந்தியா உள்பட பல நாடுகளில் ‛நிமெசுலைட்' மாத்திரை, மருந்துகள் பயன்படுத்தப்பட்டு வருகிறது. பெயின் கில்லராகவும், அழற்சி எதிர்ப்பு, காய்ச்சலை குணப்படுத்தும் வகையில் இது பயன்படுத்தப்பட்டு வருகிறது. ‛நிமெசுலைட்' என்பது மாத்திரை, கேப்சூல் மற்றும் டானிக் (சிரப்) என 3 வகைகளிலும் பயன்படுத்தப்பட்டு வருகிறது.
இந்நிலையில் தான் சமீபகாலமாக ‛நிமெசுலைட்' தயாரிப்பு பெரும் சர்ச்சையை ஏற்படுத்தியது. ‛நிமெசுலைட்' மாத்திரை, மருந்துகளை எடுத்து கொள்ளும் மக்களுக்கு பிற உடல்நல பாதிப்புகள் ஏற்படலாம் என்ற அச்சம் ஏற்பட்டது. இதையடுத்து சில இடங்களில் தடை செய்யப்பட்டன.
இந்நிலையில் தான் தற்போது இந்தியாவில் தடை செய்யப்பட்டுள்ளது. அதாவது ‛நிமெசுலைட்'டின் அனைத்து வகை மாத்திரை, மருந்துக்கும் தடை விதிக்க வேண்டும் என்று மருந்து கட்டுப்பாட்டு பிரிவு பரிந்துரை செய்தது.
இந்த மருந்து, மாத்திரையை எடுத்து கொள்வதால் இரைப்பை குடலில் ரத்தம் வடிதல், துளை ஏற்படுதல் உள்ளிட்ட பாதிப்புகள் முதியவர்கள் உள்பட அனைத்து தரப்பினரும் எதிர்கொள்ளலாம் என்று கண்டறியப்பட்டதாக கூறப்படுகிறது.
இதையடுத்து தடை விதிக்க ஐசிஎம்ஆர் எனும் இந்திய மருத்துவ ஆராய்ச்சி கவுன்சில் சார்பில் மத்திய அரசுக்கு பரிந்துரை செய்யப்பட்டது. அதன்படி நம் நாட்டில் 100 மில்லி கிராமுக்கு மேல் உள்ள நிமெசுலைட் மருந்து, மாத்திரைகளை தயாரிக்கவும், விற்பனை செய்யவும் தடை விதித்து மத்திய சுகாதாரத்துறை அமைச்சகம் அதிரடியாக உத்தரவிட்டுள்ளது.
100 மில்லி கிராமுக்கு மேல் உள்ள நிமெசுலைட் மருந்து, மாத்திரைகளை பயன்படுத்துவது உடல்நலனில் தீவிர பிரச்சனையை ஏற்படுத்த வாய்ப்புள்ளதால் இந்த உத்தரவு பிறப்பிக்கப்பட்டுள்ளது. இதுதொடர்பாக மத்திய சுகாதார அமைச்சகம் பிறப்பித்த உத்தரவில் கூறப்பட்டுள்ளதாவது:
‛‛100 மில்லி கிராமுக்கு அதிகமாக இருக்கும் நிமெசுலைட் மாத்திரை, மருந்துகள் உடலுக்கு பிரச்சனையை ஏற்படுத்தும் என்ற தகவலை ஏற்றுக்கொள்கிறோம். இதனால் அந்த மருந்து, மாத்திரைகளுக்கு தடை விதிக்கப்படுகிறது. இதற்கு மாற்றாக புதிய மருந்துகள் மார்க்கெட்டில் கிடைக்கிறது'' என்று தெரிவிக்கப்பட்டுள்ளது.
இந்த ‛நிமெசுலைட்' மாத்திரை, மருந்துக்கு தடை விதிக்கப்படுவது இது முதல் முறையல்லை. இதற்கு முன்பு பல நாடுகள் தடை விதித்துள்ளன. கல்லீரல் பாதிப்பை ஏற்படுத்தும் குற்றச்சாட்டில் இந்த மாத்திரைக்கு ஏற்கனவே அமெரிக்கா, ஐரோப்பா, கனடா, ஆஸ்திரேலியா உள்ளிட்ட சில நாடுகள் தடை விதித்துள்ளன. அந்த வரிசையில் தற்போது இந்தியாவும் தடை விதித்துள்ளது என்பது குறிப்பிடத்தக்கது.
Click it and Unblock the Notifications
Sign in with Google