சிஏஏ சட்ட விதிகளை வகுக்கும் பணி தீவிரம்.. மீண்டும் காலஅவகாசம் கோரிய மத்திய உள்துறை அமைச்சகம்

டெல்லி: சிஏஏ எனும் குடியுரிமை திருத்த சட்ட விதிகளை வகுக்க கூடுதல் காலஅவகாசம் வேண்டும் என மத்திய உள்துறை அமைச்சகம் நாடாளுமன்றத்துக்கு கடிதம் எழுதி உள்ளது.

இந்தியாவில் சிஏஏ எனும் குடியுரிமை திருத்த சட்ட மசோதா கடந்த 2019 டிசம்பர் மாதம் 11ம் தேதி நாடாளுமன்றத்தில் நிறைவேற்றப்பட்டது, அதே ஆண்டு டிசம்பர் 12ம் தேதி ஜனாதிபதி ஒப்புதல் அளித்த நிலையில் சட்டமானது. இந்த சட்டம் முஸ்லிம் மக்களுக்கு எதிரானதாக உள்ளதாக கூறப்படுகிறது.

அதாவது இந்தியாவின் அண்டை நாடுகளாக பாகிஸ்தான், வங்கதேசம், ஆப்கானிஸ்தான் உள்ளிட்ட நாடுகளில் இருந்து துன்புறுத்தப்படும் சிறுபான்மையினருக்கு இந்தியாவில் குடியுரிமை வழங்க இந்த சட்டம் வழிவகுக்கிறது.

இன்னும் புரியும் படி கூற வேண்டும் என்றால் 2014 டிசம்பர் 31ம் தேதிக்கு முன்பு பாகிஸ்தான், வங்கதேசம், ஆப்கானிஸ்தான் நாடுகளில் இருந்து குடியேறிய இந்துக்கள், சீக்கியர்கள், பவுத்தர், ஜைனர்கள், பார்சி, கிறிஸ்தவ மக்களுக்கு இந்திய குடியுரிமை வழங்க வழிவகை செய்யும். இவர்கள் அந்த நாடுகளில் இருந்து இந்தியா வந்த பிறகு 6 ஆண்டுகளில் இந்திய குடியுரிமைக்கு விண்ணப்பம் செய்ய முடியும்.

இதில் முஸ்லிம் மக்கள் பற்றி எந்த விபரமும் இடம்பெறவில்லை. இதனால் சிஏஏ சட்டம் என்பது சர்ச்சையை கிளப்பியது. இஸ்லாமிய அமைப்புகள் எதிர்க்கட்சிகள் கடும் எதிர்ப்பு தெரிவித்து வருகின்றன. மேலும் கர்நாடகா, உத்தர பிரதேசம் உள்பட பல மாநிலங்களில் நடந்த போராட்டங்களில் 80க்கும் அதிகமானவர்கள் இறந்தனர்.

இருப்பினும் மத்திய அரசு தனது நிலைப்பாட்டில் உறுதியாக உள்ளது. இதற்கிடையே தான் குடியுரிமை திருத்த சட்டம் குறித்த விதிகளை வகுத்து வருகிறது. இந்த விதிகளை மத்திய உள்துறை அமைச்சகம் வகுக்கிறது. இந்த விதிகளை வகுக்க 7 முறை தொடர்ந்து காலஅவகாசம் வழங்கப்பட்டுள்ளது.

இருப்பினும் விதிகளை வகுப்பதில் சிக்கல் உள்ளதாக கூறப்படுகிறது. இதனால் 8 வது முறையாக காலஅவகாசத்தை நீட்டிக்க மத்திய உள்துறை அமைச்சகம் சார்பில் நாடாளுமன்ற லோக்சபா துணை சட்ட குழுவுக்கு கடிதம் எழுதப்பட்டுள்ளது. இதற்கு ஒப்புதல் கிடைக்கும் பட்சத்தில் 8 வது முறையாக குடியுரிமை திருத்த சட்டத்துக்கான விதிகளை வகுக்க காலஅவகாசம் என்பது மத்திய உள்துறை அமைச்சகத்துக்கு கிடைக்கும் என்பது குறிப்பிடத்தக்கது.

English summary

The Ministry of Home Affairs has written to the Parliament asking for more time to frame the rules of the Citizenship Amendment Act (CAA).சிஏஏ எனும் குடியுரிமை திருத்த சட்ட விதிகளை வகுக்க கூடுதல் காலஅவகாசம் வேண்டும் என மத்திய உள்துறை அமைச்சகம் நாடாளுமன்றத்துக்கு கடிதம் எழுதி உள்ளது.