ஹேக் செய்யப்பட்ட மத்திய தகவல், ஒளிபரப்பு அமைச்சகத்தின் ட்விட்டர் அக்கவுண்ட்!

டெல்லி: மத்திய தகவல் மற்றும் ஒளிபரப்பு அமைச்சகத்தின் ட்விட்டர் அக்கவுண்ட் @MIB_India இன்று காலை மர்ம நபர்களால் சிறிது நேரம் ஹேக் செய்யப்பட்டது. பின்னர் இந்த ட்விட்டர் அக்கவுண்ட் மீட்கப்பட்டுள்ளது.

இன்று காலை தகவல் மற்றும் ஒளிபரப்பு அமைச்சகத்தின் ட்விட்டர் அக்கவுண்ட் @MIB_India திடீரென ஹேக் செய்யப்பட்டது. ஹேக்கர்கள் இந்த அக்கவுண்ட் பெயரை Elon Musk என மாற்றியதுடன் great job எனவும் ட்வீட் செய்திருந்தனர்.

மத்திய அரசின் ட்விட்டர் அக்கவுண்ட் ஹேக் செய்யப்பட்டது அதிர்ச்சியை ஏற்படுத்தியது. இதனையடுத்து சிறிது நேரத்திலேயே ட்விட்டர் அக்கவுண்ட்டை மத்திய தகவல் மற்றும் ஒளிபரப்பு அமைச்சகம் மீட்டது. இதன் பின்னர் வழக்கமான பதிவுகள் இந்த பக்கத்தில் வெளியிடப்பட்டு வந்தது.

கடந்த டிசம்பர் மாதம் 12-ந் தேதி பிரதமர் மோடியின் அதிகாரப்பூர்வ ட்விட்டர் அக்கவுண்ட் ஹேக் செய்யப்பட்டது. அப்போது இந்தியா பிட்காயினை அங்கீகரித்துவிட்டதாக போலியான பதிவையும் ஹேக்கர்கள் பதிவிட்டிருந்தனர். இது மிகப் பெரும் சர்ச்சையானது.

கடந்த 3-ந் தேதியன்று Indian Council of World Affairs, Indian Medical Association, Mann Deshi Mahila Bank ஆகியவற்றின் ட்விட்டர் அக்கவுண்ட்டுகளும் ஹேக் செய்யப்பட்டு Elon Musk என பெயர் மாற்றம் செய்யப்பட்டது. பின்னர் இந்த அக்கவுண்ட்கள் மீட்கப்பட்டன. இருந்தபோதும் ஹேக்கர்களின் சில பதிவுகள் நீக்கப்பட முடியாமல் இருந்தது.

மத்திய அரசின் துறைகள் மற்றும் நாட்டின் முக்கிய நிறுவனங்களின் ட்விட்டர் அக்கவுண்ட்டுகளை குறிவைத்து வருகின்றனர் ஹேக்கர்கள். டிஜிட்டல் மயமாக்கம் என்பதை கேள்விக்குள்ளாக்கும் வகையில் ஹேக்கர்கள் இத்தகைய நடவடிக்கையை மேற்கொண்டு வருவது பாதுகாப்பின்மையை வெளிப்படுத்தி வருகிறது.

English summary

Union Ministry of Information and Broadcasting's Twitter account was hacked today morning.