தமிழக பாஜக உட்கட்சி மோதல் பற்றி அறிக்கை கேட்டேனா? பியூஷ் கோயல் என்ன சொன்னார் தெரியுமா?

Published: Thursday, June 13, 2024, 11:38 [IST]

Subscribe to Oneindia Tamil

டெல்லி: தமிழக பாஜகவின் உட்கட்சி மோதல் பற்றி மத்திய அமைச்சர் பியூஷ் கோயல் அறிக்கை கேட்டிருப்பது தொடர்பாக மாறுபட்ட தகவல்கள் வெளியாகி உள்ளன.

லோக்சபா தேர்தலில் தமிழ்நாட்டில் பாஜக ஒரு இடத்தில் கூட வெற்றி பெறவில்லை. தமிழ்நாடு பாஜக தலைவர் அண்ணாமலை, தமிழக பாஜக முன்னாள் தலைவரும் மத்திய அமைச்சருமான எல்.முருகன், தமிழக பாஜக முன்னாள் தலைவரும் முன்னாள் ஆளுநருமான தமிழிசை சவுந்தரராஜன், முன்னாள் மத்திய இணை அமைச்சர் பொன்.ராதாகிருஷ்ணன் உள்ளிட்ட அத்தனை பாஜக தலைவர்களும் தேர்தலில் தோல்வி அடைந்தனர்.

தமிழகத்தில் பாஜக தோல்வி தொடர்பாக தமிழிசை சவுந்தரராஜன் தெரிவித்த சில கருத்துகள் பெரும் சர்ச்சையானது. குறிப்பாக குற்றப் பின்னணி கொண்டவர்கள் பாஜகவில் சேர்க்கப்படுவது குறித்து விமர்சித்திருந்தார் தமிழிசை சவுந்தரராஜன். இதற்கு அண்ணாமலை தரப்பு பதில் தர தமிழக பாஜகவில் உட்கட்சி மோதல் வெடித்தது.

இதனிடையே தமிழக பாஜக உட்கட்சி மோதல் தொடர்பாக மத்திய அமைச்சர் பியூஷ் கோயல் அறிக்கை கேட்டுள்ளதாகவும் ஊடக செய்திகள் வெளியாகி இருந்தன. இதனால் நேற்று காலை முதலே பாஜகவில் பரபரப்பு நிலவியது. இந்த பரபரப்புக்கு நடுவே ஆந்திரா விஜயவாடாவில் முதல்வர் சந்திரபாபு நாயுடு பதவியேற்பு விழாவில் தமிழிசை சவுந்தராஜனிடம் மத்திய அமைச்சர் அமித்ஷா கடுமையாக பேசும் வீடியோ பதிவுகள் வெளியாகி மிகப் பெரும் சர்ச்சையானது. தமிழ்நாட்டைச் சேர்ந்த பெண் தலைவர் ஒருவரை பொதுமேடையில் அமித்ஷா எப்படி இழிவுபடுத்தலாம் என்றும் இதற்கு மேலும் தமிழிசை பாஜகவில் நீடிப்பதா? எனவும் பல்வேறு கருத்துகள் முன்வைக்கப்பட்டன. இது குறித்து செய்தியாளர்களிடம் பதில் தரவும் தமிழிசை மறுத்திருந்தார்.

தற்போது, தமிழக பாஜகவின் உட்கட்சி மோதல் தொடர்பாக தாம் அறிக்கையே கேட்கவில்லை என மத்திய அமைச்சர் பியூஷ் கோயல் மறுத்திருக்கிறார். அதாவது தாம் தமிழக பாஜகவுக்கு மேலிடப் பொறுப்பாளரே இல்லையே.. அரவிந்த் மேனன்தான் பொறுப்பாளர். அப்படி இருக்க நான் எப்படி தமிழக பாஜக உட்கட்சி மோதல் தொடர்பாக அறிக்கை கேட்க முடியும்? என மறுத்திருக்கிறாராம் பியூஷ் கோயல். அதேபோல லோக்சபா தேர்தலுக்கு முன்னரே தமிழக பாஜகவின் உட்கட்சி மோதல் குறித்து மத்திய அமைச்சர் நிர்மலா சீதாராமனும் டெல்லி மேலிடத்துக்கு அறிக்கை அனுப்பினார் எனவும் ஒரு தகவல் வலம் வருகிறது.

Published On June 13, 2024