ஏர் இந்தியாவில் கேட்ட அந்த சத்தம்.. அடுத்த நொடி இறக்கப்பட்ட RAT.. விபத்திற்கு காரணமே இதுதானாம்!

டெல்லி: அகமதாபாத்தில் நிகழ்ந்த ஏர் இந்தியா விமான விபத்து குறித்து தொடர்ச்சியாகப் பல புதிய தகவல்கள் வெளியாகி வருகிறது. இதற்கிடையே இரட்டை எஞ்சின் செயலிழப்பு காரணமாக விபத்து ஏற்பட்டு இருக்கலாம் என்று முன்னாள் அமெரிக்கக் கடற்படை விமானி கேப்டன் ஸ்டீவ் ஷீப்னர் தெரிவித்துள்ளார். அவரது இந்த கருத்து முக்கியமானதாகப் பார்க்கப்படுகிறது.

ஏர் இந்தியா விமானம் கடந்த வாரம் குஜராத்தில் இருந்து லண்டனுக்கு செல்லும்போது அது எதிர்பாராத விதமாக விபத்தில் சிக்கியது. இதில் விமானத்தில் பயணித்த 242 பேரில் 241 பேர் உயிரிழந்தனர். ஒரே ஒரு பயணி மட்டுமே உயிர் தப்பினார். இந்த விபத்து நாடு முழுக்க பெரும் அதிர்வலைகளை ஏற்படுத்தியுள்ளது.

ஸ்டீவ் ஷீப்னர்

இதற்கிடையே விபத்து தொடர்பாக முன்னாள் அமெரிக்கக் கடற்படை விமானி கேப்டன் ஸ்டீவ் ஷீப்னர் சில முக்கிய கருத்துகளைத் தெரிவித்துள்ளார். விமான விபத்து குறித்த வீடியோக்களை ஆராய்ந்து அதற்கு என்ன காரணம் என்பது குறித்து விளக்குபவர் ஸ்டீவ் ஷீப்னர். முன்பு வெளியான ஏர் இந்தியா விபத்து குறித்த வீடியோவை ஆய்வு செய்த அவர், விமானிகள் லேண்டிங் பிளாப்ஸை சரியாக செட் செய்யாதது கூட விபத்துக்கு ஒரு காரணமாக இருக்கலாம் என்று கூறியிருந்தார். அதோடு பறவை மோதல் அல்லது எரிபொருள் சிக்கல் போன்ற காரணங்களாலும் எஞ்சின் செயலிழந்திருக்கலாம் எனவும் அவர் தெரிவித்தார்.

ராம் ஏர் டர்பைன்

இதற்கிடையே ஏர் இந்தியா விபத்து குறித்த புதிய வீடியோவை ஆய்வு செய்த ஸ்டீவ் ஷீப்னர் வேறு தகவல்களைக் கூறியிருக்கிறார். இரட்டை எஞ்சின் பெய்லியர் காரணமாக விபத்து நடந்திருக்கலாம் என அவர் குறிப்பிடுகிறார். விபத்து வீடியோவில் விமானத்தின் ராம் ஏர் டர்பைன் (RAT) இயக்கப்பட்டதற்கான ஆடியோ மற்றும் வீடியோ ஆதாரங்கள் இருப்பதாக ஷீப்னர் கூறுகிறார். விமானம் புறப்பட்ட சிறிது நேரத்திலேயே இந்த டர்பைன் இயக்கப்பட்டுள்ளது.

விபத்துக்குள்ளான விமானம் தரையில் இருந்து 625 அடி உயரம் வரை சென்ற நிலையில், அது விபத்தில் சிக்கியது. முன்பு, விமானிகள் லேண்டிங் பிளாப்ஸை சரியாக செட் செய்யாதது கூட விபத்துக்கு ஒரு காரணமாக இருக்கலாம் என்று ஷீப்னர் கூறியிருந்தார். இந்த வீடியோ ஆதாரங்களை ஆய்வு செய்த பிறகு ஸ்டீவ் முந்தைய கருத்தை மாற்றிக்கொண்டதாகவும் தெரிவித்தார்.

ஆதாரம் இருக்கு

விமானம் விபத்துக்குள்ளாகும் முன் எடுக்கப்பட்ட வீடியோவில் இருந்து சில முக்கிய தகவல்களை ஷீப்னர் சுட்டிக்காட்டுகிறார். விமானத்தின் வலது பக்கத்தில் இறக்கைக்குச் சற்று பின்புறம் ராம் ஏர் டர்பைன் (RAT) பொருத்தப்பட்டிருக்கும். விமானத்தின் எலக்டிரிக் மற்றும் ஹைட்ராலிக் அமைப்புகள் செயலிழந்தாலோ அல்லது இரட்டை எஞ்சின் செயலிழப்பு ஏற்பட்டாலோ, விமானத்தின் முக்கியமான சிஸ்டங்களுக்கு பவர் கொடுப்பதற்காக இது பயன்படுத்தப்படும்.

இது குறித்து ஷீப்னர் கூறுகையில், "விமானத்தின் அடிப்பகுதியில் ஒரு சிறிய சாம்பல் நிறப் புள்ளி தெரியும். அது திரையில் உள்ள ஏதோ புள்ளி போலத் தோன்றலாம். ஆனால் அதுதான் ராம் ஏர் டர்பைன் (RAT). RAT இயக்கப்பட்டதை இது உறுதிப்படுத்துகிறது.. விபத்துக்குச் சற்று முன்பு ஒருவிதமான சத்தம் கேட்டது. அது RAT ஏற்படுத்தும் ஒலி. 400 அல்லது 500 அடி உயரத்தில் இருக்கும்போது விமானம் தனது சக்தியை இழந்தால், இந்த டர்பைன் எந்தப் பயனும் தராது. ஏனெனில் அந்த உயரத்தில் எஞ்சினை மீண்டும் ஸ்டார்ட் செய்ய போதுமான நேரம் இருக்காது" என்றார்.

பலத்த சத்தம்

முன்னதாக இந்த விபத்தில் உயிர் பிழைத்த பயணியும் கூட, விமானம் புறப்பட்ட சில நொடிகளில் "பலத்த சத்தம்" கேட்டதாகவும், கேபின் விளக்குகள் எரிந்ததாகவும் கூறினார். இது RAT இயங்கும் போது நடக்கும் நிகழ்வுகளுடன் ஒத்துப்போவதாக ஷீப்னர் தெரிவித்தார்.

அதேநேரம் விமானம் புறப்பட்ட உடனேயே எஞ்சின்கள் செயலிழந்ததற்கான உண்மையான காரணம் இன்னும் முழுமையாகத் தெரியவில்லை என்றும் அவர் குறிப்பிட்டார். இருப்பினும், மே டே அழைப்புக்கான உண்மையான காரணம் இரட்டை எஞ்சின் செயலிழப்பா என்பதை ஏர் டிராஃபிக் கண்ட்ரோல் ஆடியோ மூலம் கண்டறிய முடியும் என்று அவர் கூறுகிறார்.

English summary

A US aviation expert suggests double engine failure caused the Air India crash in Ahmedabad (ஏர் இந்தியா விபத்து புதிய ஆதாரத்தை பகிர்ந்த எக்ஸ்பர்ட்): Deployment of RAT is the reason for Air India crash.