"இந்தியா" கூட்டணியில் டம்மியான நிதிஷ்குமார்! முதல்வர் ஸ்டாலின் மீது கோபத்தை கொட்டியதன் பின்னணி என்ன?
டெல்லி: "இந்தியா" கூட்டணியில் தமக்கு முக்கியத்துவம் இல்லாமல் போவதால் கடும் அதிருப்தி அடைந்த பீகார் முதல்வர் நிதிஷ்குமார் அந்த கோபத்தை இந்தி மொழி விவகாரத்தை முன்வைத்து தமிழ்நாடு முதல்வர் மு.க.ஸ்டாலின் மீது காட்டியதாக டெல்லி தகவல்கள் தெரிவிக்கின்றன.
டெல்லியில் 'இந்தியா' கூட்டணியின் 4-வது ஆலோசனைக் கூட்டம் நேற்று நடைபெற்றது. இதில் தமிழ்நாடு முதல்வர் மு.க.ஸ்டாலின் பங்கேற்றார். பீகார் முதல்வர் நிதிஷ்குமார், மேற்கு வங்க முதல்வர் மமதா பானர்ஜி, டெல்லி முதல்வர் அரவிந்த் கெஜ்ரிவால் உள்ளிட்டோரும் பங்கேற்றனர். 'இந்தியா' கூட்டணியில் உள்ள 28 கட்சிகளின் தலைவர்கள் இந்தக் கூட்டத்தில் பங்கேற்றனர்.
இந்தக் கூட்டத்தில் "இந்தியா" கூட்டணியின் பிரதமர் வேட்பாளராக அகில இந்திய காங்கிரஸ் கமிட்டித் தலைவர் மல்லிகார்ஜூன கார்கேவை முன் நிறுத்துவோம் என மமதா பானர்ஜியும் அரவிந்த் கெஜ்ரிவாலும் பரிந்துரைத்தனர். ஆனால் மல்லிகார்ஜூன கார்கே இதனை திட்டவட்டமாக ஏற்க மறுத்துவிட்டார்.
மேலும் இந்தக் கூட்டத்தில் நிதிஷ்குமார் இந்தியில் பேசும் போது, வழக்கம் போல ஆங்கிலத்தில் மொழி பெயர்க்க வேண்டும் என திமுக தரப்பில் கேட்கப்பட்டது. ஆனால் திடீரென நிதிஷ்குமார், இந்தி தேசிய மொழி; இந்தியை அனைவரும் கற்க வேண்டும் என பாடம் நடத்தி கோபத்தை கொட்டியது அதிர்ச்சியை ஏற்படுத்தியது.
நிதிஷ்குமாரின் இந்த கோபம் குறித்து பேசும் பத்திரிகையாளர்கள், "இந்தியா" கூட்டணியை உருவாக்கியதில் நிதிஷ்குமார் முக்கிய பங்கு வகித்தார். அத்துடன் இந்தியா கூட்டணியின் பிரதமர் வேட்பாளர் அல்லது ஒருங்கிணைப்பாளர் பதவி ஆகியவை தமக்கு கிடைக்கும் என தவமாய் தவமிருந்து வருகிறார் நிதிஷ்குமார். ஆனால் தற்போதைய நிலையில் இந்த இரண்டுமே நிதிஷ்குமாருக்கு கிடைக்காது என்பது முடிவான ஒன்றாக தெரிந்துவிட்டது.
மேலும் "இந்தியா" கூட்டணியை காங்கிரஸ் தன் வசம் கையில் எடுத்துக் கொண்டது. இந்தியா கூட்டணியில் பத்தோடு பதினொன்றாகவே தாமும் இருக்கிறோம் என்கிற குமுறலையும் கோபத்தையுமே இந்தி மொழிபெயர்ப்பு பிரச்சனையில் திமுக தலைவர்களான ஸ்டாலின், டிஆர் பாலு மீது காட்டிவிட்டார் நிதிஷ்குமார் எனவும் சுட்டிக்காட்டுகின்றனர். அதாவது இந்தியா கூட்டணியில் டம்மியாகிவிட்டோமே என்கிற விரக்தியின் வெளிப்பாடுதான் திமுக தலைவர்கள் மீதான நிதிஷ் கோபம் எனவும் மூத்த பத்திரிகையாளர்கள் சுட்டிக்காட்டுகின்றனர்.
Click it and Unblock the Notifications
Sign in with Google