ஈரோடு கிழக்கு: 2021, 2023-ல் தமாகா, அதிமுக வாங்கிய ஓட்டுகள் மொத்தமாக நாதகவுக்கு கிடைத்தால் திமுக?
ஈரோடு: ஈரோடு கிழக்கு சட்டசபை தொகுதி இடைத்தேர்தலில் வேட்பு மனுத் தாக்கல் செய்ய நாளை கடைசி நாள். திமுகவின் விசி சந்திரகுமார் மற்றும் நாம் தமிழர் கட்சியின் சீதாலட்சுமி ஆகியோர் நாளை வேட்பு மனுத் தாக்கல் செய்கின்றனர். ஈரோடு கிழக்கு தொகுதியில் தற்போதைய நிலையில் திமுக vs நாதக என இருமுனைப் போட்டி நிலவும் நிலையில் எதிர்க்கட்சிகளின் மொத்த வாக்குகளும் நாதகவுக்கு கிடைத்தால் திமுக கடும் போட்டியை சந்திக்க நேரிடும் என்கிறது களநிலவரம்.
ஈரோடு கிழக்கு தொகுதி எம்.எல்.ஏ.வாக இருந்த மூத்த காங்கிரஸ் தலைவர் ஈவிகேஎஸ் இளங்கோவன் காலமானதையடுத்து இடைத்தேர்தல் நடைபெறுகிறது. ஈரோடு கிழக்கு தொகுதிக்கு பிப்ரவரி 5-ந் தேதி வாக்குப் பதிவு நடைபெறுகிறது. இத்தொகுதியில் பதிவாகும் வாக்குகள் அனைத்தும் பிப்ரவரி 8-ந் தேதி எண்ணப்பட்டு முடிவுகள் அறிவிக்கப்படும்.
ஈரோடு கிழக்கு தொகுதியில் ஆளும் திமுகவின் வேட்பாளராக விசி சந்திரகுமார் போட்டியிடுகிறார். இதே தொகுதியில் தேமுதிக வேட்பாளராக போட்டியிட்டு ஏற்கனவே வென்றவர் விசி சந்திரகுமார். தற்போது திமுக வேட்பாளராக களம் காண்கிறார்.
அதேநேரத்தில் பிரதான எதிர்க்கட்சியான அதிமுக இத்தேர்தலைப் புறக்கணிப்பதாக அறிவித்தது. மேலும் பாஜக தலைமையிலான தேசிய ஜனநாயகக் கூட்டணி கட்சிகளும் ஈரோடு கிழக்கு தொகுதி இடைத்தேர்தலில் போட்டியிடவில்லை என அறிவித்துவிட்டன. அதிமுகவின் கூட்டணி கட்சியான தேமுதிகவும் ஈரோடு கிழக்கு தொகுதி இடைத்தேர்தலைப் புறக்கணித்துள்ளது. ஆனால் நாம் தமிழர் கட்சி மட்டும் சீதாலட்சுமி என்ற வேட்பாளரை அறிவித்துள்ளது.
ஈரோடு கிழக்கு தொகுதி இடைத்தேர்தலில் பிரசாரம் ஏற்கனவே தொடங்கிவிட்டது. இத்தொகுதியில் வேட்பு மனுக்கள் தாக்கல் செய்ய நாளை கடைசி நாள். திமுகவின் விசி சந்திரகுமார், நாம் தமிழர் கட்சியின் சீதாலட்சுமி ஆகியோர் நாளை வேட்பு மனுத் தாக்கல் செய்ய உள்ளனர்.
2023-ம் ஆண்டு ஈரோடு கிழக்கு தொகுதி இடைத்தேர்தலில் திமுக கூட்டணியில் காங்கிரஸ் வேட்பாளராகப் போட்டியிட்ட ஈவிகேஎஸ் இளங்கோவன் 1,10,156 வாக்குகளைப் பெற்றார். அதிமுகவின் தென்னரசு 43, 923, நாம் தமிழர் கட்சியின் மேனகா 10,827 வாக்குகளைப் பெற்றிருந்தனர்.
2021-ம் ஆண்டு காங்கிரஸின் திருமகன் ஈவெரா 67,300 வாக்குகளையும் பாஜக கூட்டணி வேட்பாளர் தமாகாவின் யுவராஜா 58,396 வாக்குகளையும் நாம் தமிழர் கட்சியின் கோமதி 11,629 வாக்குகளையும் பெற்றிருந்தனர். மக்கள் நீதி மய்யத்தின் ராஜ்குமார் 10,005 வாக்குகளைப் பெற்றிருந்தார்.
தற்போதைய தேர்தலில் அதிமுக, பாஜக கூட்டணியின் தாமக வாக்குகள் சிந்தாமல் சிதறாமல் நாம் தமிழர் கட்சியின் சீதாலட்சுமிக்கு கிடைத்தால் திமுகவுக்கு கடும் போட்டியாக இருக்கும் என்பது அரசியல் பார்வையாளர்கள் கருத்து.
Click it and Unblock the Notifications
Sign in with Google