திமுகவுக்கு ஆதரவாக வீடியோ வெளியிட்ட ஓவைசி.. தேர்தல் நெருங்கும் நிலையில் சொன்ன முக்கிய மேட்டர்

ஹைதராபாத்: தமிழகத்தில் ஏப்.23ம் தேதி சட்டப்பேரவை தேர்தல் நடைபெற இருக்கும் நிலையில், அசாதுதீன் ஓவைசி வீடியோ வெளியிட்டு, திமுக மற்றும் அதன் கூட்டணி கட்சி வேட்பாளர்களை வெற்றி பெற செய்ய வேண்டும் என்று கேட்டுக்கொண்டிருக்கிறார்.

முன்னதாக திமுக தலைமையிலான மதச்சார்பற்ற முற்போக்கு கூட்டணிக்கு ஆதரவு தெரிவித்திருந்ததை சுட்டிக்காட்டிய ஓவைசி, ஸ்டாலின் மீண்டும் முதலமைச்சராக வாழ்த்துகளை தெரிவித்திருக்கிறார்.

திமுகவுக்கு ஆதரவாக தலைவர்கள்

திமுகவுக்கு ஆதரவாக காங்கிரஸ் தலைவர்களில் ஒருவரும், நாடாளுமன்ற எதிர்க்கட்சி தலைவருமான ராகுல் காந்தி, டெல்லி முன்னாள் முதல்வர் அரவிந்த் கெஜ்ரிவால் உள்ளிட்டோர் பிரச்சாரம் மேற்கொண்டிருந்தனர்.

முதலமைச்சர் ஸ்டாலினுக்கு ஆதரவாக பிரச்சாரம் செய்வது குறித்து பேசிய கெஜ்ரிவால், "டெல்லியில் பாஜக ஆட்சிக்கு வந்த பிறகு, நாங்கள் செய்த அனைத்து நல்ல பணிகளையும் அவர்கள் முழுமையாகச் சிதைத்துவிட்டனர். அந்த கசப்பான அனுபவங்களை நான் இங்குள்ள மக்களிடம் பகிர்ந்து கொள்ள விரும்புகிறேன். ஸ்டாலின் மீண்டும் ஒருமுறை மிகப்பெரிய பெரும்பான்மையுடன் வெற்றி பெறுவார்.

ஸ்டாலின் எனது நண்பர், எனது சகோதரரை போன்றவர். இருப்பினும் நான் அவருக்காக பிரச்சாரம் செய்ய வந்திருக்க காரணம், அவர் தமிழ்நாட்டிற்கு செய்திருக்கும் பணிகள்தான்" என்று கூறியிருந்தார்.

அதேபோல கடந்த 18ம் தேதி தொடங்கி ராகுல் காந்தியும் திமுக தலைமையிலான கூட்டணி வேட்பாளர்களை ஆதரித்து தீவிர பிரச்சாரம் மேற்கொண்டார். இப்படியாக திமுகவுக்காக பல முக்கிய தலைகள் பிரச்சாரத்தில் குதித்திருந்தனர். இதன் தொடர்ச்சியாக தற்போது ஓவைசி வீடியோ வெளியிட்டிருக்கிறார்.

English summary

With the Legislative Assembly elections scheduled to take place in Tamil Nadu on April 23rd, Asaduddin Owaisi has released a video appealing for the victory of the candidates from the DMK and its alliance partners.