வாங்குன காசுக்கு மேல கூவிய காங்கிரஸ் பிரமுகர்..தெலுங்கானாவில் டிகே சிவகுமார் பிரசாரத்தில் கூத்து!

ஹைதராபாத்: தெலுங்கானா சட்டசபை தேர்தலில் கர்நாடகா துணை முதல்வர் டிகே சிவகுமார் தேர்தல் பிரசார கூட்டத்தில் நடந்த 'மொழிபெயர்ப்பு' விவகாரம் அம்மாநில தேர்தல் களத்தில் பரபரப்பான பேசு பொருளாகி இருக்கிறது.

தெலுங்கானா சட்டசபைக்கு நவம்பர் 30-ந் தேதி தேர்தல் நடைபெறுகிறது. தெலுங்கானாவில் ஆளும் பிஆர்எஸ், காங்கிரஸ் மற்றும் பாஜக இடையே போட்டி உள்ளது. தெலுங்கானா தேர்தல்களைப் பொறுத்தவரை பிஆர்எஸ், காங்கிரஸ் கட்சிகள் கணிசமான இடங்களைப் பெற்றாலும் தொங்கு சட்டசபைக்கு வாய்ப்புள்ளது என்கின்றன கருத்து கணிப்புகள்.

தெலுங்கானாவில் கர்நாடகா துணை முதல்வர் டிகே சிவகுமார் நேற்று பிரசாரம் செய்தார். அப்போது டிகே சிவகுமார் பேசியதாவது: முதல்வர் சந்திரசேகர ராவ், அவரது குடும்பத்தினர் மற்றும் பிஆர்எஸ் கட்சியினரை தெலுங்கானா எல்லையில் உள்ள கர்நாடகா கிராமங்களுக்கு அழைத்து செல்கிறேன். கர்நாடகா தேர்தலில் அளித்த வாக்குறுதிகளை காங்கிரஸ் நிறைவேற்றி இருக்கிறது என்பதை பொதுமக்கள் உங்களுக்கு விளக்கம் தருவார்கள். ஆட்சிக்கு வந்த ஒரு மாதத்திற்குள் நாங்கள் வாக்குறுதியளித்த அனைத்தும் நிறைவேற்றப்பட்டு விட்டன என்பதை உறுதியாக என்னால் கூற முடியும். ஆனால் நீங்கள் 10 ஆண்டுகளுக்கு முன்பு கொடுத்த வாக்குறுதிகளை நிறைவேற்றினீர்களா?

கர்நாடகாவின் ஐந்து தேர்தல் வாக்குறுதிகளை விட காங்கிரஸ் கட்சியானது தெலுங்கானாவில் தந்துள்ள 6 வாக்குறுதிகள்தான் அற்புதமானவை. தெலுங்கானாவில் புதிய காங்கிரஸ் அரசு டிசம்பர் 9-ந் தேதி அமைந்த உடன் முதலாவது அமைச்சரவைக் கூட்டத்திலேயே 6 வாக்குறுதிகளும் நிறைவேற்றப்படும் என் நான் உங்களுக்கு உறுதியளிக்கிறேன் என்றார்.

டிகே சிவகுமார் ஆங்கிலத்தில் பேசியதை தெலுங்கில் மொழி பெயர்த்த காங்கிரஸ் பிரமுகர், தெலுங்கானாவில் முதல்வராக ரேவந்த் ரெட்டி பொறுப்பேற்ற உடன் முதல் கையெழுத்தே 6 வாக்குறுதிகளை நிறைவேற்றுவதான் என கூறினார்.

தெலுங்கானா சட்டசபை தேர்தலில் காங்கிரஸ் கட்சி முதல்வர் வேட்பாளர் என யாரையும் இது அதிகாரப்பூர்வமாக அறிவிக்கவில்லை. அதனால் டிகே சிவகுமாரும், பொதுவாக தெலுங்கானாவில் காங்கிரஸ் ஆட்சி அமைந்ததும் என குறிப்பிட்டார். ஆனால் மொழிபெயர்த்த காங்கிரஸ் பிரமுகரோ, ரேவந்த் ரெட்டிதான் முதல்வர் வேட்பாளர் என அறிவித்தது இப்போது பேசு பொருளாகி இருக்கிறது.

English summary

Karnataka Deputy Chief Minister DK Shivakumar said that Congress wiill form the Govt in Telangana.