ஹிஜாப் அணிந்த பெண் அதிகாரியிடம் வெற்றிச்சான்றிதழ் பெற்ற பாஜக கவுன்சிலர்! தென்காசியில் நடந்த ருசிகரம்!
தென்காசி: தென்காசி நகராட்சியில் ஹிஜாப் அணிந்த பெண் தேர்தல் அதிகாரியிடம் பாஜக வேட்பாளர் தனது வெற்றிச்சான்றிதழை பெற்ற ருசிகர நிகழ்ச்சி நடந்துள்ளது.
தேர்தல் அன்று எந்த ஹிஜாப்பிற்கு எதிராக பாஜக முகவர் ஆர்ப்பாட்டம் செய்து சலசலப்பை ஏற்படுத்தினாரோ, இன்று அதே ஹிஜாப் அணிந்த பெண் அதிகாரியிடம் சத்தமின்றி சான்றிதழை பெற்றுச் சென்றிருக்கிறார் பாஜக கவுன்சிலர்.
இந்த நிகழ்வை சுட்டிக்காட்டி சமூகவலைதளங்களில் நெட்டிசன்கள் பல்வேறு விமர்சனங்களை முன் வைத்து வருகின்றனர்.
நகர்ப்புற உள்ளாட்சி
தமிழக நகர்ப்புற உள்ளாட்சித் தேர்தல் முடிவுகள் ஏறத்தாழ முழுமையாக வெளிவந்துவிட்டன. திமுக வெற்றிமுகத்தில் இருக்கும் சூழலில் அதிமுக, பாஜக, உள்ளிட்ட கட்சிகள் இந்த தேர்தலில் படுதோல்வி அடைந்துள்ளன. இந்நிலையில் தென்காசி நகராட்சியில் 8-வது வார்டில் போட்டியிட்ட பாஜக வேட்பாளர் பொன்னம்மாள் கவுன்சிலராக வெற்றிபெற்றிருக்கிறார். இதற்கான வெற்றிச்சான்றிதழை அவர் பெற்ற நிகழ்வு தான் சமூக வலைதளங்களில் வைரலாகி வருகிறது.
ஹிஜாப் எதிர்ப்பு
அதாவது கர்நாடகாவில் ஹிஜாப்புக்கு எதிராக அண்மையில் மாணவர்கள் சிலர் செய்த அலப்பறைகளை தொடர்ந்து கடந்த சனிக்கிழமை அன்று நடைபெற்ற தமிழக நகர்ப்புற உள்ளாட்சித் தேர்தலில், மேலூரில் பாஜக முகவர் ஒருவர் ஹிஜாப் அணிந்து ஓட்டளிக்க வந்த இஸ்லாமிய பெண்ணுக்கு எதிர்ப்பு தெரிவித்தார். ஹிஜாப்பை கழற்றிவிட்டு வாக்களிக்க வேண்டும் என பிடிவாதம் பிடித்ததோடு வாக்குச்சாவடி மையத்திற்குள் பெரும் குரல் எழுப்பி வாக்குவாதமும் செய்தார்.
தென்காசி நகராட்சி
இந்தச் சூழலில் இன்று தென்காசி நகராட்சியில் ஹிஜாப் அணிந்த பெண் தேர்தல் அதிகாரியான ஃபிர்ஜானிடம் சத்தமின்றி வெற்றிச்சான்றிதழை வாங்கிச் சென்றிருக்கிறார் பாஜக கவுன்சிலர் பொன்னம்மாள். அன்று எந்த ஹிஜாப்பை கழற்ற வேண்டும் என பாஜக முகவர் தகராறு செய்தாரோ, இன்று அதே ஹிஜாப் அணி பெண்ணின் கையால் பாஜகவை சேர்ந்தவர் சான்றிதழ் பெற்றிருக்கிறார். இதனைச் சுட்டிக்காட்டி சமூக வலைதளங்களில் நெட்டிசன்கள் கருத்து பதிவிட்டுள்ளனர்.
தனித்துப் போட்டி
நகர்ப்புற உள்ளாட்சித் தேர்தலில் பாஜக தனித்து போட்டியிட்ட நிலையில், தென்காசி, கன்னியாகுமரி, கோவை, மதுரை, உள்ளிட்ட ஒரு சில மாவட்டங்களில் மட்டும் ஓரிரு இடங்களில் நகராட்சிகளிலும், மாநகராட்சிகளிலும் வெற்றி பெற்றிருப்பது குறிப்பிடத்தக்கது.
Click it and Unblock the Notifications
Sign in with Google