2ஜி வழக்கு குற்றவாளிகளுடன் சந்திப்பா? உச்சநீதிமன்றத்தில் சிபிஐ இயக்குநர் பிரமாண பத்திரம் தாக்கல்!

டெல்லி: 2ஜி ஊழல் வழக்கில் தொடர்புள்ள குற்றவாளிகளை சந்தித்து பேசியதாக எழுந்த குற்றச்சாட்டு குறித்து, உச்சநீதிமன்றத்தில் சிபிஐ இயக்குநர் ரஞ்சித் சின்கா பிரமாணப் பத்திரம் தாக்கல் செய்துள்ளார்.

2ஜி ஸ்பெக்ட்ரம் ஊழல் வழக்கை சிபிஐ விசாரித்து வருகிறது. இந்நிலையில் குற்றச்சாட்டுக்கு உள்ளானவர்கள் சிலர், சிபிஐ இயக்குநர் ரஞ்சித் சின்காவை அவரது அரசு இல்லத்தில் வைத்து சந்தித்து பேசியதாக வழக்கறிஞரும், ஆம் ஆத்மி தலைவர்களில் ஒருவருமான பிரசாந்த் பூசன் குற்றம் சாட்டி, இதுகுறித்த பிரமாணப் பத்திரத்தை உச்சநீதிமன்றத்தில் தாக்கல் செய்துள்ளார்.

அதில், ரஞ்சித் சின்கா வீட்டு வருகை பதிவேட்டில் 2ஜி ஊழல் குற்றச்சாட்டுக்கு உள்ளானவர்கள் கையெழுத்திட்டிருந்ததை முக்கிய ஆதாரமாக காண்பித்திருந்தார். இதையடுத்து, பதிலுக்கு ரஞ்சித் சின்காவும் பிரமாணப்பத்திரம் தாக்கல் செய்ய வேண்டும் என்று உச்சநீதிமன்றம் கேட்டுக் கொண்டிருந்தது. இதுகுறித்து நோட்டீஸ் அனுப்பப்பப்பட்டது.

இதையடுத்து உச்சநீதிமன்றத்தில் இன்று ரஞ்சித் சின்கா பிரமாணப்பத்திரத்தை தாக்கல் செய்தார். சீலிடப்பட்ட கவரில் வைத்து பிரமாணப்பத்திரம் தாக்கல் செய்யப்பட்டது. ரகசியம் காப்பதற்காக இவ்வாறு செய்யப்பட்டது.

"வீட்டின் வருகை பதிவேட்டு நகலை பிரசாந்த் பூசன் பெற்ற விதம் கேள்விக்கு உட்படுத்தப்பட வேண்டியது என்றும், சிபிஐ அமைப்பின் மரியாதையை கெடுக்க சதி நடந்துள்ளதாகவும்" ரஞ்சித் சின்கா ஏற்கனவே தெரிவித்திருந்தார் என்பது குறிப்பிடத்தக்கது.

English summary

Central Bureau of Investigation (CBI) director Ranjit Sinha has filed an affidavit in the Supreme Court in a sealed cover, as a response to the allegations made on him by Aam Aadmi Party (AAP) leader and lawyer Prashant Bhushan of him meeting several of the 2G scam accused at his official residence.