'ஓசி’ ரேஷன் வாங்குற.. பாஜகவுக்கு ஓட்டுப் போட முடியாதா? உ.பி.யில் தலித் இளைஞர் மீது கொடூர தாக்குதல்!

லக்னோ: உத்தரப்பிரதேச மாநிலத்தில் ஆளும் பாஜகவுக்கு வாக்களித்த மறுத்ததால் தலித் இளைஞர் ஒருவர் கொடூரமாக தாக்கப்பட்ட சம்பவம் பெரும் அதிர்ச்சியை ஏற்படுத்தியுள்ளது. இத் தாக்குதலுக்கு மூத்த காங்கிரஸ் தலைவர் ராகுல் காந்தி, காங்கிரஸ் பொதுச்செயலாளர் பிரியங்கா காந்தி உள்ளிட்டோர் கடும் கண்டனம் தெரிவித்துள்ளனர்.

18-வது லோக்சபா தேர்தல் 7 கட்டங்களாக நடைபெற்று வருகிறது. தற்போது வரை மொத்தம் 4 கட்ட தேர்தல் முடிவடைந்துவிட்டது. ஜூன் 1-ந் தேதி வரை எஞ்சிய 3 கட்ட தேர்தல் நடைபெற உள்ளது.

இந்த நிலையில் உத்தரப்பிரதேசத்தில் பாஜகவுக்கு வாக்களிக்காத தலித் இளைஞர் மீது ஊர்க்காவல் படை போலீசார் கொடூரமாக தாக்குதல் நடத்தி இருப்பது பெரும் அதிர்ச்சியை ஏற்படுத்தி உள்ளது. உ.பி. பரேலி தொகுதியின் பஹோரங்காலா என்ற கிராமத்தைச் சேர்ந்த வீரேந்தர் குமார் இலவச ரேஷன் வாங்குவதற்காக சென்றிருக்கிறார். அந்த கிடங்கு முன்பு பணியில் இருந்த ஊர்க்காவல் படையினர் 2 பேர், வீரேந்திர குமாருடன் லோக்சபா தேர்தல் குறித்து பேசி இருக்கின்றனர். அப்போது வீரேந்திர குமார் தாம் பாஜகவுக்கு வாக்களிக்கவில்லை என கூறியிருக்கிறார். இதனால் ஓசி ரேஷன் வாங்க தெரியுது.. பாஜகவுக்கு ஓட்டுப் போடத் தெரியாதா? என சொல்லியபடி வீரேந்திர குமாரை 2 ஊர்க்காவல் படையினர் கடுமையாகவும் தாக்கி இருக்கின்றனர். தலித் இளைஞர் வீரேந்திர குமார் கொடூரமாக தாக்கப்படும் வீடியோ பதிவுகள் சமூக வலைதளங்களில் வெளியாகி பெரும் அதிர்ச்சியை ஏற்படுத்தி இருக்கிறது.

இந்த வீடியோவைப் பகிர்ந்துள்ள மூத்த காங்கிரஸ் தலைவர் ராகுல் காந்தி, நீங்கள் பார்த்துக் கொண்டிருப்பது ஒவ்வொரு நாளும் நடக்கும். இந்த சம்பவம் வேதனையை ஏற்படுத்தி இருக்கிறது என தெரிவித்துள்ளார். காங்கிரஸ் கட்சியின் பொதுச்செயலாளர் பிரியங்கா காந்தி தமது எக்ஸ் பக்கத்தில், நாட்டின் ஒவ்வொரு குடிமகனுக்கும் உணவு உரிமை உண்டு. இதனால் இலவச ரேஷன் வழங்கப்படுகிறது. மக்களிடம் இருந்து பெறப்படும் மக்களுக்காக செலவிடப்படுவதுதான் இலவச ரேஷன் என்பது. அப்படியான நிலையில் இவ்வளவு கொடூரமாக எப்படித் தாக்குதல் நடத்த தைரியம் வந்தது? என கேள்வி எழுப்பி இருக்கிறார்.

English summary

A Dalit Youth was assaulted by UP home guards for not voting to BJP.