80 லட்ச ரூபாய் வைரத்தை தோண்டி எடுத்த பழங்குடி! ஒரே நாளில் அடித்த ஜாக்பாட்
பன்னா: மத்தியப் பிரதேசத்தில் உள்ள சுரங்கத்திலிருந்து பழங்குடி ஒருவர் ரூ.80 லட்சம் மதிப்பிலான வைரத்தைக் கண்டுபிடித்து எடுத்துள்ளார். இதுவரை கூலித் தொழிலாளியாக இருந்து வந்த அவர், இதன் மூலம் ஒரே நாளில் லட்சாதிபதியாக மாறி இருக்கிறார்.
மத்தியப் பிரதேசம் பன்னா மாவட்டத்தில் உள்ள வைர சுரங்கம் மிகப் பிரபலமானது. அங்கே உள்ள சுரங்கங்களில் வைரத்தை எடுக்கும் தொழிலில் பலர் வேலை செய்து வருகின்றனர். பல ஆண்டுகளாக பன்னாவில் வாழ்ந்து வரும் கோண்டு பழங்குடியின மக்களின் வாழ்வாதாரத்திற்கான ஆதாரமாக இந்த வைரச் சுரங்கங்கள் இருந்து வருகின்றன.
இங்கே பல ஆண்டுகளாக ராஜூ கோண்டு மத்தியப் பிரதேசத்தில் உள்ள பன்னா சுரங்கங்களில் குழி தோண்டி எடுக்கப்படும் மணலை சல்லடைப் போட்டு சுத்தம் செய்யும் தொழிலைக் கச்சிதமாகச் செய்து வந்தார். கடந்த 10 ஆண்டுகளில் அவரது கைக்கு ஒரு சின்ன வைரம் கூட அகப்படவில்லை. ஆனால், அந்தச் சோக கதை ஒருநாள் மாறும் என்று அவர் கனவிலும் நினைத்துப் பார்க்கவில்லை.
திடீரென்று அவர் கரங்களில் மின்னும் கண்ணாடி போன்ற ஒன்றைக் கண்டு எடுத்துள்ளார். அதைப் பார்த்த உடனேயே அதை வைரம் என கண்டுபிடித்துவிட்டார் ராஜூ. அது 19.22 காரட் வைரம். அரசு ஏலத்தில் சுமார் ரூ.80 லட்சத்திற்கு மேல் அதை விற்கலாம் என நிபுணர்கள் தெரிவித்துள்ளனர்.
"நான் இறுதியாக என் கைகளில் அதை எடுத்தபோது அது ஒரு வைரம்தான் என்பது எனக்குத் தெரிந்துவிட்டது. இந்தக் கல்லைப் பெற நான் மதியம் முழுவதும் உழைத்தேன். ஆனால், இந்த நிலையை அடைவதற்கு நான் கடந்த 10 வருடங்கள் உழைத்துள்ளேன்" என்று கோண்டு கூறியுள்ளார். இந்தக் கண்டுபிடிப்பு பற்றிப் பரவசமடைந்த அவர், தனது குழந்தைகளின் எதிர்காலத்தை இதைவைத்து பிரகாசமாக மாற்ற விரும்புவதாகக் கூறி இருக்கிறார். "எனது குழந்தைகளின் படிப்பு செலவை நான் கவனித்துக் கொள்ள இது உதவும். இதன் மூலம் எனது பொருளாதாரக் கஷ்டம் எல்லாம் குறைந்து போகும் என்று நான் உறுதியாக நம்புகிறேன்" என்றும் அவர் நெகிழ்ந்து போய் பேசியுள்ளார்.
இந்த வைரத்தை விற்று முதலில் தனது குடும்ப கடன் ரூ.5 லட்சத்தை அடைக்கப் போவதாகக் கூறியுள்ள கோண்டு மேற்கொண்டு ஏலத்தில் கிடைக்கும் பணத்தைத் தனது குடும்ப உறுப்பினர்களுக்கு கொடுக்கவும் திட்டமிட்டுள்ளதாகவும் கூறுகிறார். மிச்சம் உள்ள பணத்தில் ஒரு சொந்த வீடு கட்டி, நிலம் வாங்கி விவசாயம் செய்ய உள்ளதாகவும் தெரிவித்துள்ளார். மேலும், 'இந்த வைரம் கிடைத்து விட்டாலும் இதற்குப் பிறகும் நான் வைரங்களைத் தேடுவதை நிறுத்த மாட்டேன்" என்கிறார் இவர்.
வட மத்தியப் பிரதேசத்தில் மிகவும் பின்தங்கிய மாவட்டமான பன்னா, பல நூற்றாண்டுகளாக வைரச் சுரங்கத்திற்காக முக்கிய பகுதியாக இருந்து வருகிறது. ஆனாலும் பல ஆண்டுகளாக வைரம் கிடைப்பது கணிசமாகக் குறைந்துள்ளது. இப்போது அங்கே பெரிய வைரம் கிடைப்பது அரிதான விசயம். கடந்த ஆண்டு நொய்டாவில் வசிக்கும் ஒருவர் ரூ.35 லட்சம் மதிப்புள்ள 8 காரட் வைரத்தைக் கண்டுபிடித்தார். இங்கே வேலை செய்தால் கிடைக்கும் வருமானம் மிகவும் குறைவானது. எட்டு மணி நேர வேலைக்கு 250 முதல் 300 ரூபாய் வரை கிடைக்கும்.
கோண்டு வழக்கம் போல அதிகாலையில் கிருஷ்ணா கல்யாண்பூர் பட்டி கிராமத்தில் உள்ள ஒரு சுரங்கத்திற்குப் போய் உள்ளார். இதை அவரது தந்தை கான்ராட்க் வேலை எடுத்துச் செய்து வந்துள்ளார். “நாங்கள் பெரும்பாலும் மழைக்காலங்களில் விவசாய வேலை செய்வோம். அது போகக் கொத்தனார் வேலைகளைச் செய்கிறோம். கூடுதல் வருமானம் கிடைக்கும் என்பதால் வைரச் சுரங்கம் பணியையும் செய்து வருகிறோம்” என்றார் கோண்டு. இதற்கு முன் இவர் டிராக்டர் ஓட்டி பிழைப்பு நடத்தி வந்துள்ளார்.
தேசிய கனிம வளர்ச்சிக் கழகம் (என்எம்டிசி) பன்னாவில் இயந்திரமயமாக்கப்பட்ட வைரச் சுரங்கத் திட்டத்தைச் செயல்படுத்தி வரும் அதே வேளையில், கோண்ட் போன்ற தொழிலாளர்கள் பகுதிநேரமாகக் குழிகளை கையால் தோண்டி வைரக் கற்களைத் தேடும் வேலையைச் செய்து வருகிறார்கள். “குழிகளைத் தோண்டி அங்கே கிடைக்கும் பாறைகளையகற்ற மண்வெட்டிகளைத் தான் பயன்படுத்துகிறோம். மணல் துகள்களை ஒரு சல்லடையில் கழுவி, வைரம் கிடைக்கிறதா என்று ஆராய்வோம்” என்கிறார்.
கல்லைக் கண்டுபிடித்த பிறகு, கோண்டு அதை அரசாங்க அதிகாரிகளிடம் டெபாசிட் செய்துள்ளார். அடுத்து நடக்க இருக்கும் ஏலத்தில் வைரம் விற்பனைக்கு விடப்படும் என்று பன்னா வைர அலுவலக அதிகாரி அனுபம் சிங் தெரிவித்திருக்கிறார்.
Click it and Unblock the Notifications
Sign in with Google