தமிழகம், பீகார் தேர்தலுக்காகவே மத்திய அமைச்சரவையில் மாற்றம்? செம்ம எதிர்பார்ப்பில் தமிழக 'தலைகள்'

டெல்லி: தமிழ்நாடு, பீகார் உள்ளிட்ட மாநிலங்களின் சட்டசபை தேர்தல்களுக்கு முன்னதாக பிரதமர் நரேந்திர மோடி தலைமையிலான மத்திய அமைச்சரவையில் மாற்றம் செய்யப்படலாம் என்றும் சட்டசபை தேர்தல்களை எதிர்கொண்டிருக்கும் மாநிலங்களைச் சேர்ந்தவர்களுக்கு மத்திய அமைச்சரவையில் இடம் கிடைக்கக் கூடும் என்றும் டெல்லி தகவல்கள் தெரிவிக்கின்றன.

பீகார் மாநில சட்டசபைக்கு இந்த ஆண்டு இறுதியில் தேர்தல் நடைபெற உள்ளது. 2026-ம் ஆண்டு தமிழ்நாடு, புதுச்சேரி, கேரளா, அஸ்ஸாம் மற்றும் மேற்கு வங்க மாநிலங்களின் சட்டசபை தேர்தல்கள் நடைபெற உள்ளன. பீகார் மற்றும் 2026-ம் ஆண்டு சட்டசபை தேர்தல்களுக்கான பணிகளில் அனைத்து அரசியல் கட்சிகளும் முழு வீச்சில் இறங்கிவிட்டன.

பீகாரில் நிதிஷ்குமாரின் ஜேடியூ தலைமையில்தான் பாஜக தேர்தலை எதிர்கொள்ள இருக்கிறது; பீகாரில் ஆர்ஜேடி- காங்கிரஸ் இணைந்து தேர்தலை சந்திக்க இருக்கின்றன. தமிழ்நாட்டில் பாஜக தலைமையிலான தேசிய ஜனநாயகக் கூட்டணியில் அதிமுக இடம் பெற உள்ளது. மேற்கு வங்கத்தில் எப்படியாவது ஆட்சியை கைப்பற்ற முடியுமா? என போராடுகிறது பாஜக. ஆனால் பாஜகவிடம் ஆட்சியை பறிகொடுத்துவிடக் கூடாது என்கிற பரிதவிப்பில் களத்தில் நிற்கிறது திரிணாமுல் காங்கிரஸ். கேரளாவில் இடதுசாரிகள் ஆட்சி மீது பெரும் அதிருப்தி நிலவுவதால் காங்கிரஸ் கட்சி முழு நம்பிக்கையில் இருக்கிறது.

இந்த பின்னணியில் பிரதமர் நரேந்திர மோடி தலைமையிலான மத்திய அமைச்சரவையில் மாற்றங்கள் மேற்கொள்ளப்படலாம் எனவும் கூறப்படுகிறது. இந்த ஆண்டும் அடுத்த ஆண்டும் சட்டசபை தேர்தல் நடைபெறும் மாநிலங்களை கவனத்தில் கொண்டு மத்திய அமைச்சரவை மாற்றம் செய்யப்படலாம் எனவும் தகவல்கள் தெரிவிக்கின்றன.

தமிழ்நாட்டில் பாஜக தலைமையிலான கூட்டணியில் பாமக, தமாகா ஆகியவை தொடர்ந்து இடம் பெற்றுள்ளன. இந்த இரு கட்சிகளுமே மத்தியில் அமைச்சர் பதவிகளை எதிர்பார்த்து பல ஆண்டுகளாக காத்திருக்கின்றன. தற்போது பாஜக கூட்டணியில் அதிமுகவும் இணைகிறது. அதிமுகவுக்கு லோக்சபாவில் எம்பிக்கள் இல்லை என்ற போதும் ராஜ்யசபாவில் எம்பிக்கள் இருக்கின்றனர். இதனால் அதிமுகவும் மத்திய அமைச்சர் பதவியை எதிர்பார்க்கிறது. அதிமுகவில் மூத்த தலைவர் தம்பிதுரையின் பதவி காலம் முடிவடைவதால் சிவி சண்முகத்துக்கு மத்திய அமைச்சராகும் வாய்ப்புள்ளது. அத்துடன் அதிமுக கூட்டணிக்காக தமிழ்நாடு பாஜக தலைவர் பதவியை இழக்க தயாராகும் அண்ணாமலைக்கும் கூட மத்திய அமைச்சரவையில் இடம் கிடைத்தாலும் ஆச்சரியமில்லை என்றே கூறப்படுகிறது. இதனால் பாஜக கூட்டணியில் உள்ள தமிழக அரசியல் கட்சிகள் பெரும் எதிர்பார்ப்புடன் இருக்கின்றன

English summary

In light of upcoming assembly elections in states like Tamil Nadu and Bihar, Prime Minister Modi's potential cabinet reshuffle aims to enhance the BJP's influence. Speculations suggest ministerial positions may be offered to leaders from key electoral regions as alliances form and political dynamics shift.