Eleven-க்கு ஸ்பெல்லிங் இதுவா? அரசு ஆசிரியர்கள் - தலைமை ஆசிரியர் எழுதியதை பாருங்க.. அடக்கொடுமையே

ராய்ப்பூர்: சத்தீஸ்கர் மாநிலத்தில் உள்ள அரசு பள்ளியில் பணியாற்றி வரும் தலைமையாசிரியர், ஆசிரியர்களுக்கு அடிப்படை ஆங்கில அறிவு கூட இல்லை. Eleven, Eighteen, Nineteen என்பது கூட எழுத தெரியாமல் தவறாக எழுதிய வீடியோ இணையதளங்களில் வெளியாகி அனைவரையும் அதிர்ச்சியடைய வைத்துள்ளது.

சத்தீஸ்கரில் பாஜக ஆட்சி நடக்கிறது. கடந்த 2023ம் ஆண்டு நடந்த தேர்தலில் காங்கிரஸ் கட்சியை வீழ்த்தி பாஜக ஆட்சியை பிடித்தது. காங்கிரஸின் பூபேஷ் பாகேல் முதல்வர் பதவியை ராஜினாமா செய்தார். இதையடுத்து புதிய முதல்வராக பாஜகவின் விஷ்ணு தியோ சாய் பொறுப்பேற்று செயல்பட்டு வருகிறார்.

இந்நிலையில் தான் தற்போது இணையதளத்தில் சில வீடியோக்கள் பரவி வருகிறது. அந்த வீடியோ அரசு பள்ளி ஆசிரியர்களுக்கே அடிப்படை ஆங்கிலம் தெரியாமல் இருப்பதை வெளிச்சம் போட்டு காட்டுகிறது.

அதாவது சத்தீஸ்கர் மாநிலம் பல்ராம்பூர் மாவட்டம் மத்வா கிராம பஞ்சாயத்துக்கு உட்பட்டு கோடாசாட் கிராமம் உள்ளது. இங்கு அரசு பள்ளி உள்ளது. இந்த பள்ளியில் பணியாற்றும் தலைமையாசிரியர், 2 ஆசிரியர்களுக்கு ஆங்கிலம் சரியாக தெரியவில்லை. ஆங்கிலத்தில் Eleven, Eighteen, Nineteen உள்ளிட்டவற்றை எழுத தெரியவில்லை. ஆங்கிலத்தில் தவறாக எழுதினர்.

அதேபோல் மாவட்ட கலெக்டர் யார்? எஸ்பி யார்? என்ற கேள்விகளுக்கும் அவர்களால் பதில் சொல்ல முடியவில்லை. அதேபோல் பள்ளி குழந்தைகளிடம் நாட்டின் பிரதமர் யார்? மாநில முதல்வர் யார்? என்ற கேள்விகள் கேட்கப்பட்டது. அதனை கேட்டதும் பள்ளி மாணவ -மாணவிகளும் அமைதியாகினர். பதில் தெரியாமல் விழித்தனர்.

இந்த சம்பவம் நடந்த பல்ராம்பூர் மாவட்டம் கேடாசாட் கிராமம் மலை அல்லது வனப்பகுதியையொட்டி ஒதுக்குப்புறத்தில் உள்ள ஊரும் கிடையாது. இங்கு அரசின் திட்டங்கள், சலுகைகள் முறையாக சென்று சேருகின்றன. இருப்பினும் பள்ளி ஆசிரியர்கள், தலைமையாசிரியர்களின் இத்தகைய செயல்பாடு அனைவரையும் அதிர்ச்சியடைய வைத்துள்ளது.

இதுதொடர்பான வீடியோக்கள் தற்போது இணையதளங்களில் வேகமாக பரவி வருகிறது. பள்ளி ஆசிரியர்கள், தலைமையாசிரியர்களுக்கே அடிப்படை ஆங்கிலம் தெரியவில்லையே.. இவர்கள் எப்படி மாணவ-மாணவிகளுக்கு நன்றாக பாடம் கற்று கொடுப்பார்கள். உடனடியாக இவர்கள் மீது நடவடிக்கை எடுக்க வேண்டும் என்று நெட்டிசன்கள், சமூக ஆர்வலர்கள் கூறி வருகின்றனர்.

English summary

The Chhattisgarh government school two teachers and the headmaster struggling to spell basic words like "eleven," "eighteen," and "nineteen" has gone viral on social media.