வீட்டுல உட்கார்ந்து பேசாதீங்க.. கேஜ்ரிவாலை போல அரசியலுக்கு வாங்க..: திக்விஜய்சிங்

பெங்களூர்: டெல்லி முதல்வரும் ஆம் ஆத்மி கட்சித் தலைவருமான அரவிந்த் கேஜ்ரிவாலை காங்கிரஸ் பொதுச்செயலர் திக்விஜய்சிங் மீண்டும் புகழ்ந்து தள்ளியிருக்கிறார். வீட்டில் அமர்ந்து கொண்டு அவதூறுகளை வீசுவோர் அரவிந்த் கேஜ்ரிவாலைப் போல அரசியலுக்கு வர வேண்டும் என்பது திக்விஜய்சிங்கின் லேட்டஸ்ட் கமெண்ட்.

டெல்லி முதல்வராக பொறுப்பேற்ற அரவிந்த் கேஜ்ரிவால் பதவியேற்பு விழாவிற்கு மெட்ரோ ரயிலில் மிக எளிமையாக வந்தார். அவருக்கு அளிக்கப்பட்ட உயர் பாதுகாப்பையும் ஏற்க மறுத்து சிக்கனமாக இருக்கிறார்.

இது குறித்து கருத்து தெரிவித்திருந்த காங்கிரஸ் பொதுச்செயலர் திக்விஜய்சிங், டெல்லி முதல்வர் கேஜ்ரிவாலிடம் இருந்து எளிமை மற்றும் பணிவை நரேந்திர மோடி கற்றுக்கொள்ள வேண்டும் என்று கூறியிருந்தார்.

இதைத் தொடர்ந்து பெங்களூரில் நேற்று செய்தியாளர்களிடம் பேசிய திக்விஜய்சிங், அரசியல்கட்சிகளும் அதன் தலைவர்களும் டெல்லி முதல்வர் கேஜ்ரிவாலிடம் இருந்து பாடம் கற்றுக்கொள்ள வேண்டும். வீடுகளில் உட்கார்ந்து கொண்டு விமர்சிப்பவர்கள் கேஜ்ரிவாலைப் போல அரசியலுக்கு வருவதை வரவேற்கிறேன். சமூக ஆர்வலர்கள் நிறைய பேர் அரசியலுக்கு வரவேண்டும். அவர்கள் சட்டங்களை கொண்டு வர ஆலோசனைகளையும் வழங்க வேண்டும் என்றார்.

ஒருபக்கம் கேஜ்ரிவால் எது செய்தாலும் குற்றம் என பாரதிய ஜனதா கட்சியினர் விமர்சித்து வரும் நிலையில் திக்விஜய்சிங் போன்ற காங்கிரஸ் மூத்த தலைவர்கள் கேஜ்ரிவாலை புகழ்ந்து தள்ளுவது குறிப்பிடத்தக்கது.

English summary

Continuing with his praise of Arvind Kejriwal, senior Congress leader Digvijaya Singh on Monday asked civil society leaders 'hurling abuses' at political parties and their leaders to learn from the Aam Aadmi Party leader to join politics to enact laws.