சொகுசு டூ அதிசொகுசு: புதுவையில் இருந்து 'ஆரஞ்ச் கவுன்டி கூர்க்'கில் தினகரன் எம்.எல்.ஏக்கள் 'டேரா'

புதுவையை காலி செய்த தினகரன் ஆதரவு எம்.எல்.ஏக்கள் கர்நாடகாவில் கூர்க்கில் முகாமிட சென்றுள்ளனர்.

By Mathi

Updated: Friday, September 8, 2017, 17:42 [IST]

Subscribe to Oneindia Tamil

பெங்களூரு: புதுவை விண்ட் ப்ளவர் சொகுசு விடுதியை காலி செய்த தினகரன் ஆதரவு எம்.எல்.ஏ.க்கள் தற்போது கர்நாடகாவின் கூர்க் மலைவாசஸ்தலத்தில் உள்ள அதிசொகுசு ரிசார்ட்டான 'ஆரஞ்ச் கவுன்டி' கூர்க்கில் முகாமிட்டுள்ளனர்.

முதல்வர் எடப்பாடி பழனிச்சாமிக்கு ஆதரவை விலக்கிக் கொண்ட தினகரன் ஆதரவு 19 அதிமுக எம்.எல்.ஏக்கள் கடந்த 17 நாட்களாக புதுவை சொகுசு ரிசார்ட் மற்றும் ஹோட்டல்களில் முகாமிட்டிருந்தனர். ஆனாலும் எம்.எல்.ஏக்கள் நினைத்தபடி முதல்வர் எடப்பாடி பழனிச்சாமி மாற்றப்படவில்லை.

ஜக்கையன் ஜம்ப்

இந்நிலையில் தினகரன் ஆதரவு முகாமில் இருந்து கம்பம் எம்.எல்.ஏ. ஜக்கையன் தப்பி ஓடி முதல்வர் எடப்பாடி அணியில் ஐக்கியமாகிவிட்டார். இதையடுத்து புதுவையை காலி செய்த தினகரன் ஆதரவு எம்.எல்.ஏக்கள் கர்நாடகாவில் தஞ்சமடைந்துள்ளனர்.

கர்நாடகாவில் அடைக்கலம்

கர்நாடகா மாநில மலைவாசஸ்தலமான கூர்க்கில் 18 எம்.எல்.ஏக்கள் முகாமிட்டுள்ளனர். முதலில் இந்த எம்.எல்.ஏக்கள் மைசூரில் தங்கியிருப்பதாக கூறப்பட்டது. தற்போது கூர்க் சென்றுள்ளது உறுதியாகி உள்ளது.

கட்டுப்பாட்டில்...

புதுவையில் எம்.எல்.ஏக்கள் தங்கியிருந்த விண்ட் ப்ளவர் சொகுசு ரிசார்ட்டை கட்டுப்பாட்டில் வைத்திருக்கும் 'எஸ்ஆர் குரூப்ஸ்' குழுமங்களுக்கு சொந்தமானதுதான் ஆரஞ்சு கவுன்டி கூர்க். 'எஸ்ஆர் குரூப்ஸ்' மூலமே முன்பதிவு செய்யப்படுகிறது.

அதிசொகுசு ரிசார்ட்

இந்த அதிசொகுசு ரிசார்ட் காட்டேஜ்களில் ஒரு இரவுக்கு ரூ33,000 முதல் ரூ67,000 வரை கட்டணம். இந்த காட்டேஜ்களில் அத்தனை "சொகுசு" வசதிகளும் தாராளமாக கிடைக்கும்.