மேற்கு வங்கத்தில் இடதுசாரிகள் உதவியுடன் பாஜக விஸ்வரூப பாய்ச்சல்? மமதாவுக்கு மரண அடியா?

கொல்கத்தா: மேற்கு வங்கத்தில் மோடி அலை வீசியபோதே கடந்த தேர்தலில் 2 இடங்களை மட்டுமே பெற்ற பாஜக இம்முறை டபுள் டிஜிட் இடங்களை பெற்று விஸ்வரூபம் எடுக்கும் என்கின்றன எக்ஸிட் போல் முடிவுகள்.

லோக்சபா தேர்தல் 7 கட்டங்களாக நேற்றுடன் நடைபெற்று முடிவடைந்தது. இதையடுத்து தேர்தலுக்கு பிந்தைய கருத்து கணிப்பு முடிவுகளை ஊடகங்கள் வெளியிட்டு வருகின்றன.

மத்தியில் பாஜக தலைமையிலான தேசிய ஜனநாயகக் கூட்டணியே மீண்டும் ஆட்சி அமைக்கும் என்பது பெரும்பாலான ஊடகங்களின் கருத்து கணிப்புகள். தமிழகத்தில் திமுக அதிக இடங்களைக் கைப்பற்றும் என்றும் எக்ஸிட் போல் முடிவுகள் தெரிவிக்கின்றன.

பாஜக படுதோல்வியை சந்திக்கக் கூடும் என எதிர்பார்க்கப்பட்ட மாநிலங்களில் ஒன்றாக மேற்கு வங்கத்தில் இம்முறை டபுள் டிஜிட் இடங்களை அக்கட்சி பெற வாய்ப்புள்ளது என்கின்றன எக்ஸிட் போல் முடிவுகள். 2014 லோக்சபா தேர்தலில் நாடு முழுவதும் மோடி அலை வீசிய போதும் கூட மேற்கு வங்கத்தில் 2 தொகுதிகளில் பாஜக வெல்ல முடிந்தது.

பாஜகவுக்கு இடதுசாரிகள் ஆதரவு?

ஆனால் இம்முறை அதிகபட்சமாக 23 தொகுதிகள் வரை பாஜக கைப்பற்றலாம் என்கின்றன எக்ஸிட் போல் முடிவுகள். மேற்கு வங்கத்தில் திரிணாமுல் காங்கிரஸை வீழ்த்த இடதுசாரி கட்சிகள் முழு வீச்சில் பாஜகவுடன் இணைந்து செயல்பட்டதாக கூறப்பட்டது. இடதுசாரிகளின் வாக்குகள் அப்படியே பாஜகவுக்கு சென்றிருந்தால்தான் இத்தகைய விஸ்வரூபத்தை அக்கட்சி வெளிப்படுத்தவும் வாய்ப்பு இருக்கிறது. மேற்கு வங்கம் தொடர்பான எக்ஸிட் போல் முடிவுகள்:

பாஜகவுக்கு 11 இடங்கள்

ரிபப்ளிக் - சிவோட்டர் இணைந்து நடத்திய கருத்து கணிப்பில் பாஜகவுக்கு 11 தொகுதிகள்; திரிணாமுல் காங்கிரஸுக்கு 29 தொகுதிகள் கிடைக்குமாம். டைம்ஸ் நவ்- விஎம்ஆர் கருத்து கணிப்பில் திரிணாமுல் காங்கிரஸுக்கு 28; பாஜகவுக்கு 11 இடங்கள் கிடைக்குமாம்.

திரிணாமுலை வீழ்த்தும் பாஜக?

இந்தியா டுடே ஆக்சிஸ் கருத்து கணிப்பானது பாஜகவுக்கு 19 முதல் 23 இடங்கள் கிடைக்கும் என்கிறது. திரிணாமுல் காங்கிரஸுக்கு 19 முதல் 22 இடங்கள்தான் கிடைக்குமாம். சிஎன்என் நியூஸ் 18- ஐபிஎஸ்ஓஎஸ் கருத்து கணிப்பில் பாஜகவுக்கு அதிகபட்சம் 5 இடங்களும் திரிணாமுல் காங்கிரஸுக்கு அதிகபட்சம் 38 இடங்களும் கிடைக்கலாம் என கூறப்பட்டுள்ளது.

திரிணாமுல் காங்கிரஸுக்கு பின்னடைவு?

ஏபிபி-ஏசி நீல்சன் முடிவுகளில் பாஜக-16; திரிணாமுல் 24; நியூஸ் 24- சாணக்கியா கருத்து கணிப்பில் பாஜக 18- திரிணாமுல் -23; ரிபப்ளிக் - ஜான்கிபாத் முடிவில் பாஜக 18 முதல் 26; திரிணாமுல் 13 முதல் 21 என தெரிவிக்கப்பட்டுள்ளது. இந்தியா டிவி-சிஎன்எக்ஸ் கருத்து கணிப்பில் பாஜக 12; திரிணாமுல் 29 இடங்களைக் கைப்பற்றும் என கூறப்பட்டுள்ளது.

English summary

Exit polls have predicted an exponential leap in West Bengal for the BJP, which had won only two parliament seats in the state in 2014.