குஜராத்தில் அக்.30-ல் போர் விமான தொழிற்சாலைக்கு அடிக்கல் நாட்டும் மோடி- அப்ப தேர்தல் தேதி எப்போ?

அகமதாபாத்: குஜராத்தில் வரும் 30-ந் தேதி போர் விமானங்கள் தயாரிப்பு தொழிற்சாலைக்கு பிரதமர் மோடி அடிக்கல் நாட்ட இருக்கிறார். இதனால் குஜராத் மாநில சட்டசபைக்கான தேர்தல் தேதி அறிவிப்பு மேலும் தாமதமாகும் என கூறப்படுகிறது.

குஜராத் மற்றும் இமாச்சல சட்டசபைகளுக்கான பொதுத்தேர்தல் தேதி ஒரே நேரத்தில் அறிவிக்கப்படும் என எதிர்பார்ப்பு நிலவியது. ஆனால் இமாச்சல பிரதேசத்துக்கு மட்டும் தேர்தல் தேதியை தலைமை தேர்தல் ஆணையம் அறிவித்தது.

இமாச்சல் தேர்தல்

68 எம்.எல்.ஏக்களைக் கொண்ட இமாச்சல சட்டசபைக்கு நவம்பர் 12-ல் தேர்தல் நடைபெற உள்ளது. டிசம்பர் 10-ந் தேதி வாக்குகள் எண்ணப்பட்டு முடிவுகள் அறிவிக்கப்படும் என தலைமை தேர்தல் ஆணையம் அறிவித்தது. ஆனால் குஜராத் சட்டசபை தேர்தல் தேதி பின்னர் அறிவிக்கப்படும் என கூறப்பட்டது.

2017 ரிப்பீட்டு

கடந்த 2017-ம் ஆண்டும் இதேபோல் இமாச்சல பிரதேசத்துக்கு முன்கூட்டியே தேர்தல் நடத்தப்பட்டது. அதன்பின்னர் குஜராத் சட்டசபை தேர்தல் 2 கட்டங்களாக நடத்தப்பட்டது. தற்போதைய இமாச்சல பிரதேச சட்டசபையின் பதவிக் காலம் ஜனவரி 8-ந் தேதியும் குஜராத் சட்டசபை பதவிக் காலம் பிப்ரவரி 18-ந் தேதியும் நிறைவடைகிறது. இதனால்தான் தேர்தல் தேதியை தேர்தல் ஆணையம் தாமதமாக அறிவிக்கிறது எனவும் கூறப்பட்டது.

மோடி பயணம்

ஆனால் பிரதமர் மோடி பல்வேறு திட்டங்களுக்கு அடிக்கல் நாட்டியும் தொடங்கி வைக்க இருப்பதால்தான் தேர்தல் தேதியை தேர்தல் ஆணையம் அற்விக்கவில்லை என எதிர்க்கட்சிகள் குற்றம் சாட்டின. கடந்த 19-ந் தேதி குஜராத் மாநிலத்துக்கு பயணம் மேற்கொண்ட பிரதமர் மோடி ரூ15,670 கோடி மதிப்பிலான திட்டங்களுக்கு அடிக்கல் நாட்டி, தொடங்கி வைத்தார். அதன்பின்னர் தேர்தல் தேதி அறிவிப்பு வெளியாகும் என எதிர்பார்க்கப்பட்ட போதும் அப்படி எந்த அறிவிப்பும் வெளியாகவில்லை.

மீண்டும் குஜராத் செல்லும் மோடி

இந்நிலையில் பிரதமர் மோடி மீண்டும் அக்டோபர் 30-ந் தேதி குஜராத் மாநிலம் பயணம் மேற்கொள்கிறார். அப்போது, டாடா- ஏர்பஸ் நிறுவனங்களின் ரூ22,000 கோடி மதிப்பிலான போர் விமானங்கள் தயாரிப்பு தொழிற்சாலைக்கு பிரதமர் மோடி அடிக்கல் நாட்டுகிறார். இந்த தொழிற்சாலையில் இருந்து 2026-ல் முதலாவது போர் விமானம் வானில் பறக்க உள்ளது. பிரதமர் மோடியின் இந்த பயணத்துக்கு பின்னரே குஜராத் சட்டசபை தேர்தல் தேதியை தேர்தல் ஆணையம் அறிவிக்கும் என தெரிகிறது.

English summary

Ahead of Gujarat Assembly Election, PM Modi will lay foundation stone to make military planes.