அய்யய்யோ வேட்பாளராக அறிவிக்காதீங்க..போட்டியிடவே மாட்டேன்.. குஜராத் மாஜி துணை முதல்வர் செம்ம "அடம்"!
அகமதாபாத்: குஜராத் முன்னாள் துணை முதல்வர் நிதின் பட்டேல் தம்மை மேஹ்சனா தொகுதி வேட்பாளராக அறிவிப்பதற்கான பரிசீலனை நடைபெறுகிறது. என்னை வேட்பாளராக அறிவிப்பதற்கு முன்னரே நான் தேர்தலில் போட்டியிட விரும்பவில்லை என்பதை தெரிவித்துவிடுகிறேன் என கூறியிருப்பது புதிய பரபரப்பை ஏற்படுத்தியுள்ளது.
லோக்சபா தேர்தலுக்கான முதல் கட்ட வேட்பாளர்கள் பட்டியலை பாஜக நேற்று வெளியிட்டது. 34 மத்திய அமைச்சர்களை உள்ளடக்கிய 195 வேட்பாளர்களை பாஜக அறிவித்தது. பாஜகவின் இந்த வேட்பாளர்கள் பட்டியல் வேகம் குறித்து சிலாகித்து பேசப்பட்டு வருகிறது.
ஆனால் பாஜகவின் வேட்பாளர்கள் பட்டியல் வெளியான அடுத்த நாளே பேரிடியாக அக்கட்சிக்கு செய்திகள் சென்று கொண்டிருக்கின்றன. மேற்கு வங்க மாநிலம் அன்சோல் லோக்சபா தொகுதி வேட்பாளராக அறிவிக்கப்பட்ட போஜ்புரி நடிகர் பவன் சிங், தாம் தேர்தலில் போட்டியிட முடியாது என அறிவித்துவிட்டார். மேற்கு வங்க பெண்களை இழிவாக பேசிய சர்ச்சை விஸ்வரூபம் எடுத்ததால் தேர்தலில் போட்டியிட அஞ்சி பவன் சிங் விலகிவிட்டார்.
மாஜி கிரிக்கெட் வீரர் கவுதம் காம்பீர், முன்னாள் மத்திய அமைச்சர் டாக்டர் ஹர்ஷ்வர்தன் ஆகியோருக்கு தேர்தலில் போட்டியிட வாய்ப்பு கிடைக்காததால் இருவருமே தீவிர அரசியலில் இருந்து விலகுவதாக அறிவித்துவிட்டனர்.
இதனைத் தொடர்ந்து தற்போது பிரதமர் மோடி, மத்திய அமைச்சர் அமித்ஷாவின் குஜராத் மாநிலத்தில் இருந்து அதிர்ச்சி குரல் வெளிப்பட்டிருக்கிறது. குஜராத்தில் பாஜக நேற்று 15 லோக்சபா தொகுதிகளுக்கான வேட்பாளர்களை அறிவித்தது. இதில் மேஹ்சனா தொகுதிக்கான வேட்பாளர் அறிவிக்கப்படவில்லை.
பாஜக அடுத்து வெளியிடும் பட்டியலில் குஜராத்தின் மேஹ்சானா லோக்சபா தொகுதி வேட்பாளராக அம்மாநில முன்னாள் துணை முதல்வர் நிதின் பட்டேல் அறிவிக்கப்படக் கூடும் என்கிற எதிர்பார்ப்பு நிலவுகிறது. இதனால் மேஹ்சானா தொகுதி வேட்பாளர் நிதின் பட்டேல் என கூறப்பட்டு வருகிறது. ஆனால் நிதின் பட்டேலோ தாம் மேஹ்சனா தொகுதியில் போட்டியிடவே முடியாது என கூறியுள்ளார்.
இது தொடர்பாக தமது சமூக வலைதளப் பக்கங்களில் பதிவிட்டுள்ள நிதின் பட்டேல், குஜராத்தின் 15 லோக்சபா தொகுதிகளுக்கான வேட்பாளர்கள் அறிவிக்கப்பட்டுவிட்டனர். எஞ்சிய தொகுதிகளுக்கான வேட்பாளர்கள் பரிசீலனை நடைபெற்று வருகிறது. அதற்கு முன்னதாகவே நான் மேஹ்சனா தொகுதியில் போட்டியிடவில்லை என்பதை அறிவித்துவிடுகிறேன் என கூறியுள்ளார். இத்தகைய அடுத்தடுத்த தகவல்களால் பாஜக மேலிடம் ரொம்பவே அப்செட் ஆகிவிட்டதாம்.
Click it and Unblock the Notifications
Sign in with Google