தோல்வி பயமா? ஹரியானா சட்டசபை தேர்தல் தேதியை மாற்ற பாஜக திடீர் கோரிக்கை - விளாசும் காங்கிரஸ்!
சண்டிகர்: ஹரியானா மாநில சட்டசபை தேர்தல் தேதியை மாற்ற வேண்டும் என்று அம்மாநிலத்தில் ஆளும் பாஜக, இந்திய தேசிய லோக் தள் கட்சிகள் திடீரென கோரிக்கை விடுத்திருப்பது பரபரப்பை ஏற்படுத்தி உள்ளது. ஹரியானா சட்டசபை தேர்தலில் தோல்வி பயம் தெரிவதாலேயே சட்டசபை தேர்தலை ஒத்திவைக்க வேண்டும் என பாஜக கோரிக்கை விடுப்பதாக காங்கிரஸ் கடுமையாக எதிர்ப்புத் தெரிவித்துள்ளது.
ஹரியானா மாநில சட்டசபை தேர்தல் அக்டோபர் 1-ந் தேதி நடைபெற உள்ளது. அன்றைய தினம் பதிவாகும் வாக்குகள் அக்டோபர் 4-ந் தேதி எண்ணப்பட்டு முடிவுகள் அறிவிக்கப்படும் என இந்தியத் தேர்தல் ஆணையம் அறிவித்துள்ளது.
ஹரியானாவில் மொத்தம் 90 சட்டசபை தொகுதிகள் உள்ளன. இம்மாநிலத்தில் பெரும்பான்மைக்கு தேவை 46 இடங்கள். 2019-ம் ஆண்டு ஹரியானா சட்டசபை தேர்தலில் எந்த கட்சிக்கும் பெரும்பான்மை கிடைக்கவில்லை. இதனால் பாஜக- ஜேஜேபி கட்சிகள் இணைந்து கூட்டணி ஆட்சி அமைத்தன. ஆனாலும் பாஜக அரசுக்கான ஆதரவை கடந்த மார்ச் மாதம் ஜேஜேபி வாபஸ் பெற்றது.
தற்போதைய தேர்தல் களத்தில் ஆளும் பாஜக அரசுக்கு எதிரான அதிருப்தி அலை வீசுகிறது. இதனை அறுவடை செய்ய காங்கிரஸ் மும்முரம் காட்டி வருகிறது. ஆனால் காங்கிரஸுக்கு குடைச்சல் தரும் வகையில் ஆம் ஆத்மி கட்சியும் தனித்து போட்டியிடுவதாக அறிவித்திருக்கிறது. இதனால் காங்கிரஸ் கட்சிக்கு கடும் நெருக்கடி ஏற்பட்டுள்ளது. இன்னொரு பக்கம் துஷ்யந்த் சவுதலா கட்சியின் எம்.எல்.ஏக்கள் அடுத்தடுத்து பதவிகளை ராஜினாமா செய்துவிட்டு பாஜக பக்கம் தாவி வருகின்றனர். இதனால் ஹரியானா தேர்தல் களம் பரபரத்துக் கொண்டிருக்கிறது.
இந்த சூழ்நிலையில், ஹரியானா சட்டசபை தேர்தல் தேதியை மாற்ற வேண்டும் என்று பாஜக , இந்திய தேசிய லோக் தள் உள்ளிட்ட கட்சிகள் இந்தியத் தேர்தல் ஆணையத்துக்கு கடிதம் எழுதி உள்ளன. அக்டோபர் 1-ந் தேதி முதல் அக்டோபர் 3-ந் தேதி வரை தொடர் விடுமுறை வருவதால் வாக்குப் பதிவு சதவீதம் குறையக் கூடும்; ஆகையால் தேர்தல் தேதியை மாற்ற வேண்டும் என்கிறது பாஜக.
ஆனால் காங்கிரஸ் கட்சியோ இதற்கு கடும் எதிர்ப்பு தெரிவித்துள்ளது. ஹரியானாவில் ஆளும் பாஜகவுக்கு தேர்தலில் தோல்வி அடைவோம் என்கிற பயம் கண்ணில் தெரிகிறது; அதனால்தான் தேர்தல் தேதியை மாற்ற வேண்டுகோள் வைக்கிறது என காங்கிரஸ் கன்டனம் தெரிவித்துள்ளது.
Click it and Unblock the Notifications
Sign in with Google