மத்தியப் பிரதேசத்தில் ஒரு லிட்டர் பெட்ரோல் ரூ.120; டீசல் விலை ரூ.110; தலைசுற்ற வைக்கும் விலை உயர்வு

Updated: Thursday, October 28, 2021, 19:22 [IST]

Subscribe to Oneindia Tamil

போபால்: மத்தியப் பிரதேச மாநிலத்தின் எல்லையோர மாவட்டங்களில் ஒரு லிட்டர் பெட்ரோல் ரூ.120-க்கும், ஒரு லிட்டர் டீசல் ரூ.110-க்கும் விற்பனை செய்யப்படுகிறது.

நாடு முழுவதும் ராக்கெட் வேகத்தில் உயர்ந்து வரும் பெட்ரோல், டீசல் விலையால் போக்குவரத்துக் காரணமாக அத்தியாவசியப் பொருட்களின் விலையும் உயரத் தொடங்கியுள்ளது. இதனால் ஏழை எளிய மக்களும், நடுத்தர வர்க்கத்தினரும் கலக்கம் அடைந்துள்ளனர்.

In Madhya Pradesh, a liter of petrol sells for Rs 120

வரலாறு காணாத வகையில் பெட்ரோல், டீசல், மற்றும் சமையல் எரிவாயு சிலிண்டரின் விலை உயர்ந்து வரும் நிலையில், எதிர்க்கட்சியினர் விலை குறைப்பை வலியுறுத்தி போராட்டம் நடத்தி வருகின்றனர்.

இதனிடையே நாட்டிலேயே எங்கும் இல்லாத வகையில் மத்தியப் பிரதேசம் மாநிலம் அனுபூர், பால்காட் உள்ளிட்ட எல்லையோர மாவட்டங்களில் ஒரு லிட்டர் பெட்ரோல் ரூ.120-க்கு விற்பனை செய்யப்படுகிறது. இதேபோல் ஒரு லிட்டர் டீசல் ரூ.110-க்கு விற்பனை செய்யப்படுகிறது. நீண்ட தூரத்திலிருந்து இந்த மாவட்டங்களுக்கு எரிபொருள் கொண்டு வர வேண்டியுள்ளதால் இந்த விலை உயர்வு தவிர்க்க முடியாதது எனக் காரணம் கூறப்படுகிறது.

மத்தியப்பிரதேசம் மாநிலம் போபாலில் பெட்ரோல் ஒரு லிட்டர் ரூ.116-க்கும், டீசல் ஒரு லிட்டர் ரூ.106-க்கும் விற்பனை செய்யப்படுவது கவனிக்கத்தக்கது. போகிற போக்கை பார்த்தால் தமிழகத்திலும் இத்தகைய விலை உயர்வு விரைவில் வந்துவிடும் எனத் தெரிகிறது.

கடந்த 2014-ம் ஆண்டு ஒரு லிட்டர் பெட்ரோலுக்கு ரூ.9.48 ஆக இருந்த கலால் வரி தற்போது ரூ.32.90 ஆகவும், ரூ.3.56 -ல் இருந்து ஒரு லிட்டர் டீசலுக்கான கலால் வரி ரூ.31.80 ஆகவும் உயர்ந்திருப்பது குறிப்பிடத்தக்கது. கடந்த இரண்டு வாரங்களில் மட்டும் 15 முறைக்கும் மேல் முறை பெட்ரோல், டீசல் விலை உயர்ந்திருப்பது கவனிக்கத்தக்கது.

பெட்ரோல், டீசல் விலை விவகாரத்தில் இன்றைய மத்தியப்பிரதேசத்தின் நிலை நாளை தமிழகத்திற்கும் வரலாம். இதனிடையே விலைவாசி உயர்வை கட்டுப்படுத்த வேண்டும் என்றால் எரிபொருள் விலையை குறைக்க மத்திய அரசு நடவடிக்கை எடுக்க வேண்டும் என நாடு தழுவிய அளவில் எதிர்க்கட்சிகள் குரல் குடுத்து வருகிறது.

பெட்ரோல் லிட்டர் ஒன்றுக்கு ரூ.120-க்கு விற்கப்படும் மத்தியப் பிரதேசத்தில் பாஜக ஆட்சி நடந்து வருவதும் அம்மாநிலத்தின் முதலமைச்சராக சிவ்ராஜ் சிங் சவுகான் இருப்பதும் கவனிக்கத்தக்கது.