பறக்குது கை கொடி.. சத்தீஸ்கரில் மீண்டும் ஆட்சி.. பாஜக ஆட்சி கனவு கலைந்தது- இந்தியா டிவி கணிப்பு

ராய்ப்பூர்: சத்தீஷ்கரில் காங்கிரஸ் கட்சியே மீண்டும் ஆட்சியை தக்க வைக்க வாய்ப்புகள் உள்ளதாக இந்தியா டிவி - சி.என்.எக்ஸ் தேர்தலுக்கு பிந்தைய கருத்துக்கணிப்பு முடிவுகள் வெளியாகியுள்ளன. கருத்துக்கணிப்பு முடிவின் முழு விவரங்களை பார்க்கலாம்.

வரும் 2024 ஆம் ஆண்டு நடைபெறும் நாடாளுமன்ற தேர்தலுக்கு முன்னோட்டமாக கருதப்படும் இந்த ஐந்து மாநில தேர்தல் நாடு முழுவதும் பெரும் எதிர்பார்ப்புகளை ஏற்படுத்தி இருக்கிறது. இதில் மத்திய பிரதேசம், ராஜஸ்தான், சத்தீஷ்கார் ஆகிய 3 மாநிலங்களில் பாஜகவும் காங்கிரசும் ஆட்சியில் உள்ளது. இந்த மாநிலங்களை கைப்பற்றுவதில் 2 கட்சிகளுக்கு இடையே நேரடி போட்டி ஏற்பட்டு உள்ளது.

தெலுங்கானாவில் ஆளும் பாரதிய ராஷ்டிர சமிதி, காங்கிரஸ், பாஜக இடையே மும்முனை போட்டி ஏற்பட்டு உள்ளது. நாடாளுமன்ற தேர்தலுக்கு முன் நடைபெறும் கடைசி சட்டசபை தேர்தல் என்பதால் இந்த மாநிலங்களில் வெற்றியை உறுதி செய்வதற்காக அரசியல் கட்சிகள் தீவிரமாக களமாடி வருகின்றன. நாடுமுழுவதும் கவனம் பெற்றுள்ள 5 மாநிலங்களுக்கான வாக்குப்பதிவு இன்று மாலை 6 மணியுடன் முடிந்தது.

தேர்தலில் பதிவாகும் வாக்குகள் வரும் 3 ஆம் தேதி எண்ணப்படுகின்றன. தேர்தல் முடிந்துள்ள நிலையில், தேர்தலுக்கு பிந்தைய கருத்துக்கணிப்பு முடிவுகள் வெளியாகி வருகின்றன. சத்தீஷ்கரை பொறுத்தவரை அங்கு தற்போது காங்கிரஸ் ஆட்சியில் உள்ளது. தனிப்பெரும்பான்மையுடன் காங்கிரஸ் ஆட்சி நீடித்து வரும் நிலையில், காங்கிரசை வீழ்த்தி ஆட்சியை பிடிக்க பாஜக வியூகம் வகுத்து வருகிறது.

இந்தியா டிவி - சி.என்.எக்ஸ் தேர்தலுக்கு பிந்தைய கருத்துக்கணிப்பின் படி சத்தீஷ்கரில் பாஜக - காங்கிரஸ் இடையே கடும் போட்டி நிலவும் எனக் கூறப்பட்டுள்ளது. எனினும், காங்கிரஸ் கட்சியின் கையே சற்று ஓங்கியுள்ளது. சத்தீஷ்கரில் பாஜகவுக்கு 30-40 இடங்களும், காங்கிரஸ் கட்சிக்கு 46-56 இடங்களும் கிடைக்க வாய்ப்பு உள்ளது என்று கணித்துள்ளது. சத்தீஷ்கரில் பெரும்பான்மைக்கு தேவையான இடங்கள் 46 ஆகும். எனவே, சத்தீஷ்கரில் காங்கிரஸ் கட்சியே மீண்டும் ஆட்சி அமைக்க வாய்ப்பு அதிகம் உள்ளது என்று இந்தியா டிவி சி.என்.எக்ஸ் தெரிவித்துள்ளது.

சத்தீஹ்கரில் மொத்த தொகுதிகள் : 90

பெரும்பான்மைக்கு : 46

காங்கிரஸ்: 46-56 தொகுதிகளில் வெற்றிக்கு வாய்ப்பு
பாஜக: 30-40

English summary

The India TV-CNX post-election poll results have revealed that the Congress party is likely to retain power in Chhattisgarh. Check the full details of the survey result.