104 செயற்கைக்கோள்களுடன் விண்ணில் பாய்ந்தது பிஎஸ்எல்வி சி37 ராக்கெட்.. இஸ்ரோ உலக சாதனை

ஸ்ரீஹரிகோட்டா: 104 செயற்கைகோள்களுடன் பிஎஸ்எல்வி - சி37 ராக்கெட் வெற்றிகரமாக விண்ணில் ஏவப்பட்டது. இதன்மூலம் 100க்கும் மேற்பட்ட செயற்கைக்கோள்களை ஒரே நேரத்தில் விண்ணில் செலுத்தி இஸ்ரோ புதிய உலக சாதனை படைத்துள்ளது.

ஆந்திர மாநிலம் ஸ்ரீஹரிகோட்டா சதீஷ்தவான் விண்வெளி ஆராய்ச்சி மையத்தில் இருந்து 714 கிலோ எடை கொண்ட கார்ட்டோ சாட்-2 செயற்கைகோள் மற்றும் 664 கிலோ எடை கொண்ட 103 செயற்கை கோள்களும் பி.எஸ்.எல்.வி. சி-37 ராக்கெட் மூலம் இன்று காலை விண்ணில் செலுத்தப்பட்டது.

320 டன் எடை கொண்ட இந்த ராக்கெட் 44.4 மீட்டர் உயரம் கொண்டது. இதில் வெளிநாடுகளைசேர்ந்த 101 நானோ வகை செயற்கைகோள்களும், நமது நாட்டை சேர்ந்த 2 நானோ வகை செயற்கைகோள்களும் இடம் பெற்றுள்ளன.

இந்த செயற்கைகோள் பூமியில் இருந்து 505 கிலோ மீட்டர் உயரத்தில் சுற்றுப்பாதையில் நிலை நிறுத்தப்படுகிறது. அதில் இயற்கை வளங்களை பல்வேறு கோணங்களில் துல்லியமாக படம் எடுக்க உதவும் 3 கேமராக்கள் பொருத்தப்பட்டுள்ளன.

இதன் ஆயுள்காலம் 5 ஆண்டுகள் ஆகும். 104 செயற்கைக்கோள்களை ஒரே நேரத்தில் விண்ணில் செலுத்தியதன் மூலம் இஸ்ரோ புதிய உலக சாதனையை படைத்துள்ளது. இதற்கு முன் 37 செயற்கைகோள்களை ரஷ்யா ஒரே நேரத்தில் விண்ணில் செலுத்தியதே உலக சாதனையாக இருந்தது குறிப்பிடத்தக்கது.

English summary

Indian Space Research Organisation launched 104 satellites in one go. those satelites were on board a single rocket from the Satish Dhawan Space Centre in Sriharikota Andhra Pradesh.