இவான்கா, ஆலோசகர் ஜாரேட் குஷ்னர் ... குடும்பத்தோடு இந்தியா வருகை தரும் டிரம்ப்- மெலானி தம்பதி!

டெல்லி: அமெரிக்கா அதிபர் டொனால்ட் டிரம்ப், அவரது மனைவி மெலானியுடன் மகள் இவான்கா, ஆலோசகர் ஜாரேட் குஷ்னர் ஆகியோரும் இந்தியாவுக்கு வருகை தருகின்றனர்.

அமெரிக்கா அதிபர் டிரம்ம்ப் வரும் 24,25 ஆகிய நாட்களில் இந்தியாவில் சுற்றுப் பயணம் மேற்கொள்கிறார். இதற்கான ஏற்பாடுகள் தீவிரமாக நடைபெற்று வருகின்றன.

குஜராத்தின் அகமதாபாத்துக்கு டிரம்ப் வருகை தருவதையொட்டி அங்கு குடிசை பகுதிகளை மறைத்து கட்டப்பட்ட சுவர் பெரும் சர்ச்சையாக வெடித்திருக்கிறது. இந்நிலையில் டிரம்ப்புடன் அவரது மகளும் ஆலோசகருமான இவான்கா, மற்றொரு ஆலோசகர் ஜாரேட் குஷ்னர் ஆகியோரும் இந்தியா வருகை தருகின்றனர்.

முதலில் அகமதாபாத் பயணம் மேற்கொள்ளும் இவர்கள் பின்னர் ஆக்ரா சென்று தாஜ்மஹாலை பார்வையிடுகின்றனர். இதனையடுத்து அனைவரும் டெல்லி நிகழ்ச்சிகளில் பங்கேற்கின்றனர்.

இதற்கு முன்னர் 2017-ம் ஆண்டு நவம்பர் மாதம் இவான்கா, ஹைதராபாத் வருகை தந்திருந்தார். மேலும் டிரம்ப்புடன் வர்த்தகத் துறை செயலாளர் வில்பர் ரோஸ், எரிசக்தி துறை செயலாளர் டான் பிரவுல்லைட், தேசிய பாதுகாப்பு ஆலோசகர் ராபர்ட் சி பிரைன், வெள்ளை மாளிகை தலைமை அதிகாரி மைக் முல்வானே ஆகியோர் அடங்கிய குழுவும் இந்தியா வருகை தருகிறது.

மனைவி மெலானி, மகள் இவான்கா என குடும்பத்திடன் டிரம்ப் மேற்கொள்ளும் முதலாவது வெளிநாட்டுப் பயணம் இது. ஆகையால் இந்திய பயணத்தை டிரம்ப் முக்கியமானதாக கருதுவதாக கூறப்படுகிறது. ஏற்கனவே அமெரிக்காவின் பொருட்கள் மீது இந்தியா அதிக அளவில் வரி விதித்திருப்பதாக டிரம்ப் அதிருப்தியை வெளியிட்டு வருகிறார். இந்நிலையில்தான் தம்முடன் வர்த்தக குழு ஒன்றையும் டிரம்ப் இந்தியாவுக்கு அழைத்து வருவது குறிப்பிடத்தக்கது.

English summary

US President Donald Trump and wife Melania Trump will visit to India on Feb. 24-25, with daughter Ivanka Trump and Jared Kushner.