காஷ்மீர் தாக்குதல்: பாகிஸ்தான் பயங்கரவாதிகளை 'போராளிகள்' என குறிப்பிடும் BBC- மத்திய அரசு எச்சரிக்கை

டெல்லி: ஜம்மு காஷ்மீரின் பஹல்காம் சுற்றுலா தலத்தில் 26 அப்பாவி சுற்றுலா பயணிகளை சுட்டுப் படுகொலை செய்த பாகிஸ்தான் பயங்கரவாதிகளை (Terrorists) பிபிசி (British Broadcasting Corporation BBC) ஊடகமானது போராளிகள் - Militants என குறிப்பிடுவதற்கு எதிர்ப்பு தெரிவித்து அந்நிறுவனத்துக்கு மத்திய அரசு எச்சரிக்கை கடிதம் அனுப்பி உள்ளது.

பஹல்காம் படுகொலையைத் தொடர்ந்து பாகிஸ்தானுக்கு எதிராக மத்திய அரசு பல்வேறு அதிரடி நடவடிக்கைகளை மேற்கொண்டு வருகிறது. பாகிஸ்தானுடனான சிந்து நதிநீர் ஒப்பந்தம்; பாகிஸ்தானியர்கள் வெளியேற்றம்; பாகிஸ்தானில் உள்ள இந்திய தூதரக அதிகாரிகள் எண்ணிக்கை குறைப்பு என அடுத்தடுத்த நடவடிக்கைகளை மேற்கொண்டு வருகிறது மத்திய அரசு.

மேலும் பாகிஸ்தானின் Dawn, Samaa TV, ARY News, Geo News, Razi Naama, GNN, Irshad Bhatti உள்ளிட்ட 16 ஊடகங்களின் யூடியூப் சேனல்களும் முடக்கப்பட்டுள்ளன. பாகிஸ்தான் முன்னாள் கிரிக்கெட் வீரர் சோயப் அக்தரின் யூடியூப் சேனலும் முடக்கப்பட்டுள்ளது.

இந்த பரபரப்புக்கு நடுவே தற்போது பிபிசி (BBC) ஊடகமும் சர்ச்சையில் சிக்கி இருக்கிறது. பிபிசி ஊடகத்தில் பஹகல்காம் தாக்குதலில் ஈடுபட்ட பயங்கரவாதிகளை- பயங்கரவாதிகள் என குறிப்பிடப்படுவது இல்லை. பயங்கரவாதிகளுக்கு மதிப்பு தரும் வகையில் 'போராளிகள்' என குறிப்பிடுகிறது பிபிசி ஊடகம். இதற்கு மத்திய அரசு கடும் எதிர்ப்பு தெரிவித்துள்ளது.
மேலும் இந்தியாவில் உள்ள பிபிசியின் தலைமை நிர்வாகிக்கு இந்த விவகாரத்தை சுட்டிக்காட்டி மத்திய அரசு கடிதமும் அனுப்பி வைத்துள்ளது.

ஏற்கனவே 2002-ம் ஆண்டு குஜராத் படுகொலைகள் தொடர்பான ஆவணப்பட விவகாரத்தில் பிரதமர் நரேந்திர மோடியை குற்றம்சாட்டியதால் பிபிசி ஊடகம், மத்திய அரசின் கண்டனத்துக்குள்ளானது. 2002-ம் ஆண்டு குஜராத் முதல்வராக மோடி பதவி வகித்த போது அந்த படுகொலைகள் நடந்தன. அதனால் மோடியை பிபிசி ஆவணப் படம் குற்றசாட்டுவதாக இருந்தது. இதனையடுத்து பிபிசி ஆவணப்படத்துக்கு அப்போது தடை விதிக்கப்பட்டது. இது மிகப் பெரும் சர்ச்சையாகவும் வெடித்தது குறிப்பிடத்தக்கது.

English summary

The Indian government has issued a warning letter to the British Broadcasting Corporation (BBC) for referring to the Pakistan-backed terrorists-who brutally gunned down 26 innocent tourists at the Pahalgam tourist spot in Jammu & Kashmir-as "militants" instead of terrorists.