ஓணம் பண்டிகைக்கு வருகிறாரா மலாலா? கேரள மாணவர்கள் கடிதம் மூலம் அழைப்பு

திரிச்சூர் : பாகிஸ்தானைச் சேர்ந்த நோபல் பரிசு வென்ற மலாலா யூசுப்சாயின் துணிச்சலான நடவடிக்கைகளால் ஈர்க்கப்பட்ட கேரளாவைச் சேர்ந்த மாணவர்கள் குழு, அவருக்கு ஓணம் பண்டிகைக்கு அழைப்பு விடுத்துள்ளது.

கேரளாவின் கூனமூச்சி என்ற குக்கிராமத்தில் உள்ள பல்வேறு பள்ளிகளைச் சேர்ந்த 1-ம் வகுப்பிலிருந்து 12-ம் வகுப்பு வரை படிக்கும் மாணவ-மாணவியர்கள், 18 வயதான மலாலாவுக்கு கடிதம் எழுதியுள்ளனர். இவர்கள் அனைவரும் ‘ஷ்ரேயாஸ் வித்யார்த்தி கூட்டயமா' என்ற மாணவர் அமைப்பு மூலமாக ஒன்றிணைந்தவர்கள்.

இந்த அமைப்பைச் சேர்ந்தவர்கள் மலாலாவின் நடவடிக்கைகளை குழந்தைகளும் புரிந்து கொள்ளும் வகையில் பல மேடை நிகழ்ச்சிகளை நடத்தியுள்ளனர். மேலும் கடந்த 20-ம்தேதி மலாலாவின் பிறந்த நாளை புத்தக வடிவம் கொண்ட கேக்கை வெட்டி கொண்டாடினர்.

இந்த நிகழ்ச்சிகளின்போது எடுக்கப்பட்ட படங்களையும் இணைத்து அவர்கள் மலாலாவுக்கு எழுதியுள்ள கடிதத்தில், வருகிற ஆகஸ்ட் 27 மற்றும் 28-ம் தேதிகளில் கொண்டாடப்படவுள்ள, கேரளாவின் பிரம்மாண்ட பண்டிகையான ஓணம் பண்டிகைக்கு அழைப்பு விடுத்துள்ளனர்.

இந்த அழைப்பை ஏற்று மலாலா வருவார் என்று கேரள மாணவர்கள் ஆவலுடன் காத்திருக்கின்றனர்.

English summary

Pakistani Nobel Laureate Malala Yousafzai has been invited by a group of Kerala school students, who have been motivated by her activities, to join them for Kerala's harvest festival 'Onam' next month.